​សហរដ្ឋអាមេរិក៖ សហរដ្ឋអាមេរិក និង​សម្ព័ន្ធមិត្ត​បាន​ប្តេជ្ញា​ផ្តល់ជំនួយ​ប្រព័ន្ធ​រ៉ុក្កែត គ្រាប់រំសេវ និង​ជំនួយ​យោធាបន្ថែម​ទៀត​ដល់​អ៊ុយ​ក្រែ​ន ខណៈ​ប្រមុខ​ការពារជាតិ​សហរដ្ឋអាមេរិក​បាន​និយាយ​ថា ពួកគេ​មើល​ឃើញ​សង្គ្រាម​ដើម្បី​រារាំង​ជ័យជំនះ​របស់​រុស្ស៊ី​នៅក្នុង​តំបន់ Donbas ភាគ​ខាងកើត​ដែល​កំពុង​ប្រយុទ្ធ​គ្នា​។

​

​ថ្លែង​នៅក្នុង​ការបិទ​កិច្ចប្រជុំ​តាម​បណ្តាញ​អ៊ីនធឺណិត ​ជាមួយ​ប្រមុខ​ដឹកនាំ​ការពារ​ជាតិប្រមាណ 50នាក់​មកពី​ជុំវិញពិភពលោក រដ្ឋមន្ត្រី​ការពារជាតិ​អាមេរិក​លោក Lloyd Austin បាន​និយាយ​ថា វា​នឹង​ជា​ការ​ងារ​លំបាក​ដើម្បី​រក្សា​សម្ព័ន្ធមិត្ត និង​ដៃគូ​ទាំងអស់​ឲ្យ​នៅ​ប្តេជ្ញាចិត្ត​ចំពោះ​កិច្ចខិតខំ​ប្រឹងប្រែង​ក្នុង​សង្គ្រាម​នេះ ខណៈដែល​បានអូសបន្លាយ​ពេល​ជាច្រើន​ខែ​ជា​បន្តបន្ទាប់​។ លោក Austin បាន​និយាយថា យើង​កំពុង​ជំរុញ​យ៉ាងខ្លាំង​ក្នុងការ​រក្សា​ឲ្យ​បាន និង​បង្កើន​សន្ទុះ​នៃ​ការ​ផ្តល់ជំនួយ​។​ ​ក្រុមមន្ត្រី​មានការ​ស្ទាក់ស្ទើរ​ក្នុងការ​និយាយថា ​តើ​សង្គ្រាម​អាចមាន​រយៈពេល​យូរ​ប៉ុណ្ណា ប៉ុន្តែឧ​ត្ត​ម​សេនីយ៍​លោក Mark Milley ប្រធាន​នាយសេនាធិការ​ចម្រុះ​បាន​និយាយថា វា​អាចជា​រយៈពេល​វែង ខណៈការប្រយុទ្ធ​គ្នា​ខ្លាំង​បំផុត​កំពុង​កើតឡើង​នៅ​តំបន់ Donbas។

ក្រុមមន្ត្រី​បាន​និយាយ​កាលពី​ថ្ងៃ​ពុធ​ថា សហរដ្ឋអាមេរិក​នឹង​បញ្ជូន​ប្រព័ន្ធ​រ៉ុក្កែត​កាំភ្លើង​ធំ​ចល័ត​សមត្ថភាព​ខ្ពស់ (HIMARS) ដល់​ប្រទេស​អ៊ុយ​ក្រែ​ន​ចំនួន​ ៤​គ្រឿង និង​រ៉ុក្កែត​ស៊ី​ប​គោលដៅ​សម្រាប់​ពួកគេ ក៏ដូចជា​កាំភ្លើង​ធំ​បន្ថែម ទៀត​។ ជំនួយ​នេះ​ធ្វើឡើង ​ខណៈ​កងកម្លាំង​រុស្ស៊ី​ព្យាយាម​ពង្រឹង​ការដណ្តើមយក​ខេត្ត​ចំនួន​ពីរ​នៅក្នុង​តំបន់ Donbas ភាគ​ខាងកើត​របស់​អ៊ុយ​ក្រែ​ន​គឺ Donetsk និង Luhansk ក្នុងពេលដែល​កំពុង​បន្ថែម​ការវាយប្រហារ​ទៅកាន់​តំបន់​ផ្សេងទៀត​។ ​កងទ័ព​អ៊ុយ​ក្រែ​ន​បាននឹងកំពុង​ប្រើប្រាស់​ប្រព័ន្ធ​អាវុធ HIMARS ដើម្បី​វាយប្រហារ​លើ​ការដឹកជញ្ជូន និងមជ្ឈមណ្ឌល​ទី​បញ្ញា​ការរបស់​រុស្ស៊ីដើម្បី​កាត់ផ្តាច់​ខ្សែសង្វាក់​ផ្គត់ផ្គង់​។ ហើយ​កាលពី​ថ្ងៃ​ពុធពួកគេ​បាន​វាយប្រហារ និង​បំផ្លាញ​ស្ពាន​ដែលជា​មធ្យោបាយ​សម្រាប់​ការផ្គត់ផ្គង់​កងទ័ព​រុស្ស៊ី​ នៅ​ភាគខាងត្បូង​ប្រទេស​អ៊ុយ​ក្រែ​ន៕

អត្ថបទ៖ ប៊ុនថន