បាត់ដំបង៖ ឯកឧត្តម លឹម គានហោ រដ្ឋមន្ដ្រីក្រសួងធនធានទឹក និងឧតុនិយម បានសម្រេច​អនុញ្ញាត​ឱ្យ​ធនាគារ​ចំនួនពីរ​គឺធនាគារអភិវឌ្ឍន៍អាស៊ី ADB​ និងធនាគារវិនិយោគរបស់សហគមន៍​អឺរ៉ុប EIB បើកប្រតិបត្តិការកិច្ចការទំនើបកម្មវិស្វកម្មលើប្រព័ន្ធធារាសាស្រ្ត​ទំនប់អាងកំពីងពួយ​ដើម្បីធានាឲ្យអាងទឹកមួយនេះ សម្រេចបាននូវសុវត្ថិភាព​ទឹកលើពហុវិស័យវេចខ្ជប់​ទឹកទុក​បានច្រើនជាងចំនួន ១២០ លានម៉ែត្រគូប ។

ការធ្វើទំនើបកម្មទំនប់អាងកំពីងពួយសំដៅធានាឱ្យបានការទប់ទល់នឹងបម្រែបម្រួលលអាកាសធាតុ ជំនន់ទឹកភ្លៀងមកតំបន់អូរដូនតា តំបន់ប៉ៃលិន និងពីគ្រប់ច្រកនៃតំបន់ព្រំដែនបានដល់ចំនួន ៣០០ ម៉ែត្រគូបក្នុងមួយនាទី។

ការគិតគូរមួយទៀតដ៏សំខាន់ក្នុងបណ្តាបេសកកម្មដ៏ច្រើនរបស់ ឯកឧត្តមរដ្ឋមន្ដ្រីក្រសួងធនធានទឹក និងឧតុនិយមនោះគឺប្រព័ន្ធធារាសាស្រ្តទំនប់អាងកំពីងពួយត្រូវតែធ្វើការស្រោចស្រពឲ្យបាន​ច្រើនដងក្នុងមួយឆ្នាំៗ លើវាលស្រែតេជោសែន។

ជាក់ស្ដែងកាលពីថ្ងៃទី១៩ ខែកក្កដា ឆ្នាំ២០២២នេះ ឯកឧត្តម ចាន់ ស៊ីណាត រដ្ឋលេខាធិការនៃ​ក្រសួងធ​នធានទឹក ​និងឧតុនិយម និងជានាយក PMU-ADB and WB MOWRAM ដែលជាប្រធាន​មុខព្រួញ​ទិសខេត្តបន្ទាយមានជ័យ​ សហការីជាតិ អន្តរជាតិ និងមន្រ្តីបច្ចេកទេសមកពីគ្រប់អង្គភាព​ចំណុះ​ឱ្យក្រសួងធនធានទឹក ​និងឧតុនិយម ​បានអញ្ជើញធ្វើការដឹកនាំក្រុមបេសកកម្មរបស់ ADB ដែលបាន​អញ្ជើញមកពីស្នាក់ការកណ្តាលនៃស្ថានតំណាងរបស់ ​ADB ប្រចាំទីក្រុងម៉ានីឡា ប្រទេសហ្វីលីពីន ចុះធ្វើការត្រួតពិនិត្យលើវឌ្ឍនភាព​នៃការដ្ឋានទំនប់អាងកំពីងពួយ​ក្នុង​ស្រុកបាណន់ ខេត្តបាត់ដំបង ៕