​អ៊ីរ៉ាក់៖ ក្រុមមន្ត្រី​ឃឺ​ដ​អ៊ីរ៉ាក់បាន​និយាយ​កាលពី​ថ្ងៃ​ពុធ​ថា ​ការវាយប្រហារ​តាម​អាកាស​របស់​ប្រទេស​ទួរគី​បណ្តាល​ឲ្យ​អ្នកទេសចរ ៨នាក់​ស្លាប់ និង​ជាង ២០​នាក់​រងរបួស​នៅ​ភាគ​ខាងជើង​ប្រទេស​អ៊ីរ៉ាក់។​ ​អភិបាលស្រុក​លោក Mushir Mohammed បាន​ប្រាប់​សារព័ត៌មាន​ AP ​ថា យ៉ាងហោចណាស់​មី​ស៊ី​ល​ចំនួន ៤​គ្រាប់​បាន​វាយប្រហារ​លើ​តំបន់​រមណីយដ្ឋាន Barakh ក្នុងស្រុក Zakho នៃ​តំបន់​ពាក់កណ្តាល​ស្វយ័ត​ដែល​គ្រប់គ្រង​ដោយ​ជនជាតិ​ឃឺ​ដ​។

​ប្រជាជន​អ៊ីរ៉ាក់​រាប់រយ​នាក់​បាន​ប្រមូល​ផ្តុំគ្នា​នៅ​ខាងក្រៅ​ស្ថានទូត​ទួរគី​ក្នុង​ទីក្រុង​Baghdad ដើម្បី​តវ៉ា​ចំពោះ​ការវាយប្រហារ​ដែល​បណ្តា​ល​ឲ្យ​ភ្ញៀវទេសចរ​ ៨នាក់​ស្លាប់​។​ ​ទូរទស្សន៍​រដ្ឋ​អ៊ីរ៉ាក់​បាន​ផ្សាយ​ថា ការបាញ់​ផ្លោង​ដោយ​កាំភ្លើង​ធំ​បាន​វាយប្រហារ​លើ​រមណីយដ្ឋាន​មួយ​ក្នុង​តំបន់ ​Zakho ជាទី​ក្រុង​នៅ​ព្រំដែន​រវាង​តំបន់ Kurdistan របស់​ប្រទេស​អ៊ីរ៉ាក់ និង​ប្រទេស​ទួរគី​។ ប្រទេស​ទួរគីបាន​ច្រានចោល​ការអះអាង​របស់​អ៊ីរ៉ាក់​ដែលថា ​ខ្លួន​បានធ្វើការ​វាយប្រហារ​ដែ​ល​បាន​បណ្តាល​ឲ្យ​មនុស្ស ២៣នាក់​រងរបួស ដោយ​និយាយថា​ការវាយប្រហារ​នេះ​គឺជា​អំពើ​ភេរវកម្ម​។​ ​រដ្ឋាភិបាល​អ៊ីរ៉ាក់​បាន​និយាយថា ខ្លួន​នឹង​កោះហៅ​ភារៈធារី​អ៊ីរ៉ាក់​ប្រចាំ​នៅ​ប្រទេស​ទួរគី​មកវិញ​ដើម្បី​ពិភាក្សា​។

ក្រុមបាតុករ​បាន​ប៉ះទង្គិច​ជាមួយ​នគរបាល​នៅ​ខាងក្រៅ​ស្ថានទូត​ទួរគី​ក្នុង​ទីក្រុង Baghdad ខណៈ​ក្រុមបាតុករ​នៅ​ភាគខាងត្បូង​រដ្ឋធានី Najaf បាន​លើក​ស្លាក​ហៅ​ប្រធានាធិបតី​ទួរគី​លោក Tayyip Erdogan ថា​ជា​ភេរ​វករ​។​ ​ក្រសួងការបរទេស​ទួរគី​បាន​និយាយថា ទីក្រុង​អង់កា​រ៉ា​មានការ​សោកស្ដាយ​ដែល​បានទទួល​ដំណឹង​ អំពី​ជនរងគ្រោះ​ក្នុងការ​វាយប្រហារ​នេះ ហើយ​បាន​និយាយថា ប្រទេស​ទួរគី​បាន​យកចិត្តទុកដាក់​ខ្លាំង​ដើម្បី​ជៀសវាង​ការស្លាប់ និង​របួស​របស់​ជន​ស៊ីវិល ឬ​បំផ្លាញ​ទីតាំង​វប្បធម៌​ប្រវត្តិសាស្ត្រ ​នៅក្នុង​ប្រតិបត្តិ​ការប្រឆាំង​អំពើ​ភេរវកម្ម​របស់ខ្លួន​ លើ​កងជីវពល​គណបក្ស​ពលករ​ឃឺ​ត​ក្រៅច្បាប់​ និង​ក្រុមផ្សេងទៀត៕

អត្ថបទ៖ ប៊ុនថន