​ស៊ីរី៖ កងទ័ព​ស៊ី​រី​បាន​បន្ថែម​វត្តមាន​កងកម្លាំង​របស់​ខ្លួន​នៅ​ទីក្រុង Kobani និង Ain Issa ភាគ​ខាងជើង​ប្រទេស ក្នុង​ការ​សម្របសម្រួល​ជាមួយ​កងកម្លាំង​ប្រជាធិបតេយ្យ​ស៊ី​រី (SDF) បន្ទាប់ពី​ការ​គំរាមកំហែង​របស់​ប្រទេស​ទួរគី​អំពី​ការវាយ​លុក​ចូលទៅក្នុង​តំបន់​ទាំងនេះ​។

​

​ប្រទេស​ទួរគី​បាន​សន្យាថា​ នឹង​ចាប់ផ្តើម​ប្រតិបត្តិការ​ថ្មី​មួយ​នៅ​ភាគ​ខាងជើង​ប្រទេស​ស៊ី​រី ដើម្បី​បង្កើត​ការការពារ​ក្នុង​ចម្ងាយ 30គីឡូម៉ែត្រ​តាម​បណ្តោយ​ព្រំដែន​រវាង​ប្រទេស​ទាំងពីរ និង​រុញច្រាន​ក្រុម​អ្នក​ប្រយុទ្ធ​ឃឺ​ដ​។​ ក្រសួងការបរទេស​ស៊ី​រីបាន​ព្រមាន​ម្តង​ហើយ​ម្តងទៀត ​ដល់ទី​ក្រុង​អង់កា​រ៉ា​ប្រឆាំង​ការវាយលុក​ថ្មី​។ ​អ៊ីរ៉ង់​ដែលជា​សម្ព័ន្ធមិត្ត​របស់​ខ្លួន​បាន​និយាយ​ថា ​នឹង​ព្យាយាម​សម្រប​សម្រួល​ដំណោះស្រាយ​ផ្នែក​ការទូត​រវាង​ស៊ី​រី និង​ទួរគី ហើយ​កាលពី​ថ្ងៃ​អង្គារ​អ៊ីរ៉ង់​បាន​រៀបចំ​ទទួល​ជំនួប​កំពូល​ត្រីភាគី​ជាមួយ​ប្រធានាធិបតី​ទួរគី Tayyip Erdogan និង​ប្រធានាធិបតី​រុស្ស៊ី​លោក Vladimir Putin។​ ​ប៉ុន្តែ​លោក Erdogan បាន​និយាយថា ការវាយលុក​របស់​ទួរគី​នឹង​នៅតែមាន​នៅលើ​តុ​ រហូតដល់​ក្តីបារម្ភ​សន្តិសុខ​របស់ខ្លួន​ទាក់ទង​នឹង​ក្រុម​ប្រដាប់អាវុធ​ឃឺ​ដ​នៅតាម​ព្រំដែន ដែល​ខ្លួន​ចាត់ទុកថា​ជាភេរវ​ករ​ត្រូវបាន​ដោះស្រាយ​។​

ការគំរាមកំហែង​ទាំងនេះ​ ហាក់ដូចជា​បាន​ជំរុញឱ្យមាន​ការសម្របសម្រួល​បន្ថែមទៀត​ រវាង​កង​កម្លាំង​ប្រជាធិបតេយ្យ​ស៊ី​រី (SDF) និង​កងទ័ព​ស៊ី​រី ដោយ​កងទ័ព​ដែល​ស្ម័គ្រស្មោះ​នឹង​ទីក្រុង​ដា​ម៉ាស់បាន​បន្ថែម​វត្តមាន​របស់​ពួកគេ​ នៅក្នុងតំបន់​ដែលមាន​វត្តមាន​ក្រុម​អ្នក​ប្រយុទ្ធ​ឃឺ​ដ​នៅ​ទីនោះ​។​ ​មេបញ្ជាការ​កងកម្លាំង​ប្រជាធិបតេយ្យ​ស៊ី​រី ​(SDF) លោក Mazlum Abdi បាន​ប្រាប់​សារព័ត៌មាន Reuters ថា លោក​សង្ឃឹមថា យោធា​ស៊ី​រីនឹង​ប្រើប្រាស់​ប្រព័ន្ធ​ការពារ​ដែនអាកាស​រប​ស់​ខ្លួនប្រឆាំងយន្តហោះ​ចម្បាំង​ទួរគី ក្នុងករណី​មានការ​វាយប្រហារ​តាម​អាកាស​លើ​កងកម្លាំង​ប្រជាធិបតេយ្យ​ស៊ី​រី ​(SDF)៕

អត្ថបទ៖ ប៊ុនថន