​​ប្រណាំង​កង់៖ ​កីឡាករ​​ដា​ណឺ​ម៉ាក Jonas Vingegaard កាន់តែ​កៀក​ក្នុងការ​គ្រង​ជើងឯក​ប្រណាំង​កង់ Tour de France ហើយ​ក្រោយ​ប្រជែង​ឈ្នះ​ដំណាក់កាល​ទី១៨ ថ្ងៃ​ព្រហស្បតិ៍​ម្សិលមិញ ជាមួយនឹង​វត្តមាន​ជា​កិត្តិយស​របស់​ប្រធានាធិបតី​បារាំង​លោក Emmanuel Macron​។

​​ដំណាក់កាល​ទី១៨ ដែលមាន​ចំងាយ​ផ្លូវ ១៤៣.៥គីឡូម៉ែត្រ កីឡាករ​របស់​ក្រុម​ប្រណាំង Jumbo-Visma រូបនេះ​បាន​មក​ដល់ទី​ព្រ័ត្រ​មុនគេ​ចំណាយពេល ៣ ម៉ោង ៥៩ វិនាទី ៥០ វិនាទី តាម​ពីក្រោយ​ដោយ​អ្នកការពារ​តំណែង​ជើងឯក​សញ្ជាតិ​ស្លូ​វេ​នី Tadej Pogacar យឺត​ជាង ១ នាទី ៤ វិនាទី និង​លេខ ៣ កីឡាករ​ប៊ែ​ល​ហ្ស៊ិ​ក Wout van Aert យឺត​ជាង ២ នាទី ១០ វិនាទី​។ ​​ឈ្នះ​ដាច់​ដល់​ទៅ ១ នាទី ៤ វិនាទី​ពីលើ Tadej Pogacar នៅពេលនេះ Jonas Vingegaard បាន​ពន្លាត់​ថេរវេលា​នាំមុខ​ក្នុង​តារាង​រួម​ដល់​ទៅ ៣ នាទី ២៦ វិនាទី​ពីលើ​កីឡាករ​ស្លូ​វេ​នី​របស់​ក្រុម UAE Team Emirate និង​កាន់តែ​កៀក​ក្នុងការ​គ្រង​ជើងឯក Tour de France ឆ្នាំនេះ​។

​​អ្នក​លេខ ៣ ក្នុង​តារាង​រួម​នៅតែ​ជា​កីឡាករ​អង់គ្លេស Geraint Thomas តែ​ថេរវេលា​តាម​ពីក្រោយ​កើនឡើង​ដល់​ទៅ ៨ នាទី​ពីក្រោយ Vingegaard​។ ​​សំរាប់​ដំណាក់កាល​ទី១៩ ថ្ងៃ​សុក្រ​នេះ​មាន​ចំងាយ​ផ្លូវ ១៨៨.៥គីឡូម៉ែត្រ ដំណាក់កាល​ទី២០ ស្អែក​ជាការ​ប្រណាំង​យក​ថេរវេលា​ផ្ទាល់ខ្លួន និង​ដំណាក់កាល​ទី២១ ចុងក្រោយ​នៅ​ថ្ងៃអាទិត្យ​មាន​ចំងាយ​ផ្លូវ ១១៦គីឡូម៉ែត្រ​បញ្ចប់​នៅ​ទីក្រុង​ប៉ារីស​៕

​អត្ថបទ​៖​នាង សុភា​វុ​ធ