ភ្នំពេញ៖ ឯកឧត្តមវេជ្ជបណ្ឌិត ងី មានហេង ប្រធានមនី្ទរសុខាភិបាលរាជធានីភ្នំពេញ តាមរយៈ BTV ព័ត៌មាន នាព្រឹកថ្ងៃទី២២ ខែកក្កដា ឆ្នាំ២០២២នេះថា គិតមកដល់ពេលនេះ ប្រជាពលរដ្ឋរាជធានី​ភ្នំពេញ អាយុចាប់ពី១៨ឆ្នាំឡើង បានសម្រុកមកចាក់វ៉ាក់សាំងបង្ការជំងឺកូវីដ-១៩ ដូសជំរុញទី៥ ក្នុងគោលដៅ១,៤១២,៧៦៩នាក់ បានចំនួន៩៧,៦៥៣នាក់(៦.៩១%) ។

ឯកឧត្តម វេជ្ជបណ្ឌិត ងី មានហេង បានបន្តទៀតថា ការចាក់វ៉ាក់សាំងបង្ការជំងឺកូវីដ-១៩ ជូន​ប្រជាពលរដ្ឋ អាយុ១៨ឆ្នាំឡើងនៅរាជធានីភ្នំពេញ គិតត្រឹមថ្ងៃទី២១ ខែកក្កដាម្សិលមិញ​នេះ ចាក់ដូសទី៣ បានចំនួន១០៥.៤១%, ចាក់ដូសទី៤ បានចំនួន៧៨.៨២% និងចាក់ដូសទី៥ បានចំនួន៦.៩១%។

ជាពិសេសសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រី្តនៃព្រះរាជាណាចក្រកម្ពុជា ក៏ដូចជាក្រសួងសុខាភិបាល​ រដ្ឋបាលរាជធានីភ្នំពេញ គឺអំពាវនាវដល់ប្រជាពលរដ្ឋ ដែលមិនទាន់​មកទទួលវ៉ាក់សាំងដូសជំរុញទី៣ ទៅចាក់វ៉ាក់សាំងឲ្យបានគ្រប់ប្រជាពលរដ្ឋទាំងអស់ ធ្វើយ៉ាងណា​ឲ្យបានចំនួនលើស១០០% ដោយចាប់ពីអាយុ៦ឆ្នាំឡើងទៅ។

ជាមួយគ្នានោះដែរ កុមារ យុវវ័យ និងប្រជាពលរដ្ឋ រស់នៅក្នុងរាជធានីភ្នំពេញ មកទទួលសេវាចាក់​វ៉ាក់សាំង​បង្ការជំងឺកូវីដ-១៩ ដូសមូលដ្ឋាន និងដូសជំរុញ ពីក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី និងក្រុមគ្រូពេទ្យ ​នៃមនី្ទរពេទ្យបង្អែករាជធានីភ្នំពេញ បានថ្លែងអំណរគុណជាខ្លាំង​ជូន​ចំពោះឯកឧត្តម ហ៊ុន ម៉ានី និងថ្នាក់ដឹកនាំ សមាជិក សមាជិកា​ នៃក្រុមការងារគ្រូពេទ្យស្ម័គ្រចិត្ត ជាពិសេសសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រី្ត នៃព្រះរាជាណាចក្រកម្ពុជា ដែលបានខិតខំប្រឹងប្រែងរកវ៉ាក់សាំងមកចាក់វ៉ាក់សាំងបង្ការជំងឺកូវីដ-១៩ ជូនពួកគាត់ និង​ប្រជាពលរដ្ឋទូទាំងប្រទេស ​សូមសម្តេចតេជោ ទទួលបានសុខភាពល្អ ហើយនឹងដឹកនាំនាវាប្រទេស​កម្ពុជា ឆ្ពោះទៅរកសុខសន្តិភាពជានិរន្តរ។

បើតាមលោកវេជ្ជបណ្ឌិត នេត សុវិរៈ ប្រធានមនី្ទរពេទ្យបង្អែករាជធានីភ្នំពេញ បានឲ្យដឹងដែរថា ក្រោយពីប្រមុខរាជរដ្ឋាភិបាល ប្រកាសបើកប្រទេសឡើងវិញ​ សង្កេតឃើញថាប្រជាពលរដ្ឋជាច្រើន បានមកទទួលសេវាពិគ្រោះ ពិនិត្យ និងព្យាបាលជំងឺក្នុងមនី្ទរពេទ្យមានចំនួនកើនឡើង។ ក្នុងនោះមនី្ទរពេទ្យបង្អែករាជធានីភ្នំពេញ ​មានបុគ្គលិកសុខាភិបាល ​និងអ្នកបំរើសេវាកម្មផ្សេងៗ ចំនួនជិត៣០០នាក់​ នៅគ្រប់ផ្នែកទាំងអស់រងចាំទទួល និងផ្តល់សេវាជូនប្រជាពលរដ្ឋ​ជារៀង​រាល់ថ្ងៃ។ ជាពិសេសក្រៅពីការផ្តល់សេវាពិនិត្យ ព្យាបាលជំងឺជូនប្រជាពលដ្ឋហើយនោះ មនី្ទរពេទ្យបង្អែករាជធានីភ្នំពេញ ក៏កំពុងមមាញឹកផ្តល់សេវាចាក់វ៉ាក់សាំងបង្ការជំងឺកូវីដ-១៩ ជូនប្រជាពលរដ្ឋ ចាប់ពីដូសទី១ ដូសទី២ ដូសទី៣ ដូសទី៤ និងដូសទី៥ផងដែរ៕អត្ថបទ៖ ហួត រដ្ឋា