ភ្នំពេញ៖ ក្រុមឧត្តមមន្ត្រី ក្រសួងទេសចរណ៍កម្ពុជា និងក្រុមឧត្តមមន្ត្រីក្រសួងវប្បធម៌កីឡា និង​ទេសចរណ៍វៀតណាម បានឯកភាពគ្នាជម្រុញបង្កើនកិច្ចសហប្រតិបត្តិជម្រុញចលនាទេសចរណ៍​រវាងបណ្តាខេត្តជាប់ព្រំដែន រវាងប្រទេសទាំងពីរ អោយមានភាពល្អប្រសើរឡើងវិញ ខណៈចលនា​ទេសចរណ៍រវាងប្រទេសពីរនេះបានធ្លាក់ចុះអស់រយៈ ពេលជាង ២ឆ្នាំដោយសារការរាតត្បាត​កូវីដ១៩។

នៅក្នុងឱកាសក្រសួងទេសចរណ៍កម្ពុជា រៀបចំព្រឹត្តិការណ៍តាំងពិព័រណ៍បង្ហាញផ្លូវទេសចរណ៍កម្ពុជា Cambodia Tourism Roadshow នៅក្រុងកាន់ធើប្រទេសវៀតណាម ឯកឧត្តម ថុក សុខុម អនុរដ្ឋលេខា​ធិការ ក្រសួងទេសចរណ៍កម្ពុជា ថ្លែងថា នៅក្នុងដំណើរការរៀបចំពិព័រណ៍​បង្ហាញ​ផ្លូវទេសចរណ៍​កម្ពុជានេះ ​ក្រុមឧត្តមមន្ត្រី ទេសចរណ៍កម្ពុជា វៀតណាមបានជួបប្រជុំជាមួយគ្នា និងបានឯកភាព​រួមគ្នា ជម្រុញលំហូរចលនាទេសចរណ៍រវាង ប្រទេសទាំងពីរឡើងវិញជាពិសេសចលនាទេសចរណ៍​រវាងខេត្តជាប់ឆ្នេរសមុទ្រពីខេត្តកោះកុង​ ខេត្តព្រះសីហនុ ខេត្តកំពត​ ខេត្តកែបរបស់ប្រទេសកម្ពុជា ទៅខេត្តគៀងយ៉ាង និង ទីក្រុង កាន់ធើ ជាដើមនៅភាគខាងត្បូងប្រទេស វៀតណាម។

ឯកឧត្តម ថុក សុខុម បន្តថា នៅក្នុងដំណើរការជម្រុញចលនាទេសចរណ៍កម្ពុជា វៀតណាមនេះដែរ ភាគីឧត្តម មន្ត្រីទេសចរណ៍​ប្រទេសទាំងពីរក៏បានពិភាក្សាជម្រុញចលនា​ទេសចរណ៍​ការធ្វើដំណើរ​បើកបរយានជំនិះដោយខ្លួនឯង ​ឆ្លងដែនចេញចូលគ្នាទៅវិញទៅមកតាមច្រកព្រំដែនអន្តរជាតិ ហើយសង្ឃឹមថា ការបើកច្រកនេះនឹងបង្កើន ឲ្យមានលំហូរទេសចរមកទស្សនាប្រទេសទាំងពីឲ្យ​បានច្រើនថែមទៀត។

សូមបញ្ជាក់ថា ការរៀបចំកម្មវិធីផ្សព្វផ្សាយបង្ហាញផ្លូវទេសចរណ៍កម្ពុជា “Cambodian Tourism Roadshow” នៅទីក្រុងកាន់ធើប្រទេសវៀតណាម រយៈពេល៥ថ្ងៃ ចាប់ពីថ្ងៃទី១៨ ដល់ថ្ងៃទី២២ ខែកក្តដា ឆ្នាំ២០២២នេះ បានធ្វើឡើងក្នុងគោលបំណង​ប្រកាស​ប្រាប់​ប្រជាជនវៀតណាម​អំពី​ការបើកឡើងវិញ​នៃវិស័យទេសចរណ៍កម្ពុជា ​ដោយកម្ពុជា​បានសម្រួលលក្ខខណ្ឌមួយចំនួនប្រកប​ដោយភាពងាយស្រួល ​សុវត្ថិភាព ផ្ដល់ភាពកក់ក្ដៅសម្រាប់ ​ភ្ញៀវទេសចរបរទេស ក្នុងនោះ ចំពោះភ្ញៀវ​ដែលបានចាក់វ៉ាក់សាំងពេញលេញ ​វិធាន​សុវត្ថិភាពតម្រូវត្រឹមតែ ការបង្ហាញកាត ឬវិញ្ញាបនប័ត្រ​ចាក់វ៉ាក់សាំង ​។ ដោយឡែកចំពោះអ្នកដែលមិនបានចាក់វ៉ាក់សាំង ឬបានចាក់វ៉ាក់ សាំងមិនពេញលេញ ​គ្រាន់តែតម្រូវឲ្យធ្វើតេស្តរហ័ស ​ប៉ុណ្ណោះនៅពេលមកដល់កម្ពុជា។

ព្រឹត្តិការណ៍ពិព័រណ៍​ Cambodian Tourism Roadshow នៅវៀតណាមនេះ បានធ្វើឡើងស្របតាម​ស្មារតី​ជំនួប រវាង ​សម្តេចអគ្គមហាសេនាបតីតេជោ ហ៊ុន សែន ​នាយករដ្ឋមន្ត្រីម្ពុជា និង ឯកឧត្តម Pham Minh Chinh, នាយករដ្ឋមន្ត្រីវៀតណាម កាលពីថ្ងៃទី១១​ ខែឧសភា ឆ្នាំ២០២២ នៅរដ្ឋធានី​វ៉ាស៊ីនតោន សហរដ្ឋអាមេរិក ផងដែរ៕ អត្ថបទ ស៊ុម សុខជា