ភ្នំពេញ៖ បន្ទាប់ពីជំងឺកូវីដ-១៩បំប្លែងថ្មីបានផ្ទុះរីករាលដាលសារជាថ្មី គេសង្កេតឃើញ ប្រជាពលរដ្ឋនៅក្នុង ខេត្តតាកែវ បានចូលខ្លួនចាក់វ៉ាក់សាំងដូសជំរុញទី៣ជាហូរហែ ដែល​ជំរុញអត្រា ចាក់វ៉ាក់សាំងដូសទី៣នេះ កើនឡើងដល់៧៤ភាគរយ។

លោកវេជ្ជបណ្ឌិត នុត ស៊ីណាត ប្រធានមន្ទីរសុខាភិបាលខេត្តតាកែវ បានឲ្យដឹងថា ការផ្ទុះជំងឺ កូវីដ-១៩សារជាថ្មី នៅក្នុងប្រទេសកម្ពុជា ​បានធ្វើឲ្យប្រជាពលរដ្ឋមានការភ័យខ្លាច ​ដែលជាហេតុធ្វើឲ្យពួក គេចូលខ្លួនចាក់ដូសទី៣ ទី៤ និង៥ ដែលក្នុងនោះ ការចាក់ដូសជំរុញដូសទី៣ បានកើនឡើង​រហូតដល់ ជាង៥០ម៉ឺននាក់ លើកទី៤ ជាង១០ម៉ឺននាក់ ​ឬ៣០ភាគរយ និងការចាក់ដូសទី៥ បានចំនួន៦ភាគរយ។

លោកវេជ្ជបណ្ឌិត បានបញ្ជាក់ថា ការចូលមកចាក់ដូសជំរុញរបស់ប្រជាពលរដ្ឋ ​បានកើតឡើងមួយ រយៈក៏ស្ងាត់ទៅវិញ ​តែទោះជាយ៉ាងណា រដ្ឋបាលខេត្ត ​បានប្រើគ្រប់វិធីសាស្រ្ត ដោយបានចុះទៅ​ចាក់ដល់ សាលារៀន វត្តអារាម និងតាមខ្នងផ្ទះប្រជាពលរដ្ឋផ្ទាល់តែម្ដង ដើម្បីធ្វើយ៉ាងណាឲ្យមាន​ការ​គ្របដណ្ដប់ នៃការចាក់វ៉ាក់សាំងដូសជំរុញឲ្យបានគ្រប់ដូស ទៅតាមការណែនាំរបស់​ក្រសួង​សុខាភិបាល។

សម្រាប់ខេត្តតាកែវ ប្រជាពលរដ្ឋដែលបានចាក់វ់ាក់សាំងបង្ការជំងឺកូវីដ-១៩លើកទី១ មានចំនួន ជាង​៩០ម៉ឺននាក់ ឬ១១៨ភាគរយ ដូសទី២ ​មានចំនួន៩១ភាគរយ៕ អត្ថបទ៖ គុជ វិភាគ