ភ្នំពេញ៖ ឯកឧត្តមឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និង​សំណង់ និងជា ប្រធានគណៈកម្មាធិការបច្ចេកទេសអន្តរក្រសួងរៀបចំគោលនយោបាយ​គ្រប់គ្រង និងប្រើប្រាស់ដីធ្លីដើម្បីអភិវឌ្ឍន៍​ខេត្តព្រះសីហនុ ទៅជាតំបន់សេដ្ឋកិច្ចពិសេសគំរូពហុបំណង កាលពីថ្ងៃទី​២១ ខែកក្កដាម្សិលមិញ បានអញ្ជើញដឹកនាំកិច្ចប្រជុំអន្តរក្រសួង ស្តីពីការពិនិត្យ និង​ផ្តល់ការ​យល់ព្រមលើសេចក្តីព្រាងគោលនយោបាយគ្រប់គ្រង និង ប្រើប្រាស់ដីធ្លីដើម្បីអភិវឌ្ឍន៍​ខេត្តព្រះសីហនុ ទៅជាតំបន់សេដ្ឋកិច្ចពិសេសគំរូពហុបំណង ​តាមប្រព័ន្ធវីដេអូ។

ឯកឧត្តម ប៉ែន សុផល រដ្ឋលេខាធិការក្រសួងរៀបចំដែនដី នគរូបនីយកម្ម ​និងសំណង់ បានឱ្យដឹង ថា គោលនយោបាយគ្រប់គ្រង និងប្រើប្រាស់ដីធ្លីដើម្បីអភិវឌ្ឍខេត្តព្រះសីហនុទៅជាតំបន់​សេដ្ឋកិច្ច​ពិសេស គំរូពហុបំណង ត្រូវបានតាក់តែងឡើង ដោយបានប្រមូលទិន្នន័យ និងសិក្សាវិភាគទៅលើ​ក្រប​ខណ្ឌសមាហរណកម្មវិស័យពាក់ព័ន្ធនឹងដីធ្លី រួមមាន ១- រូបវ័ន្ត ២- សេដ្ឋកិច្ច ៣- សង្គម ៤- បរិស្ថាន និងការគ្រប់គ្រងធនធានធម្មជាតិ និង៥- ការថែរក្សាវប្បធម៌ និង​អត្តសញ្ញាណ​ជាតិ រួម​ជាមួយ​នឹងវិស័យពាក់ព័ន្ធនឹងការ គ្រប់គ្រង ​ទាំងក្នុងភូមិសាស្ត្រខេត្តព្រះសីហនុ ខេត្តនៃតំបន់ឆ្នេរ​សមុទ្រកម្ពុជា និងក្នុងក្របខណ្ឌជាតិ និងអន្តរជាតិ ព្រមទាំងការសិក្សាស្រាវជ្រាវពីអន្តរជាតិ​ជាច្រើន។

ឯកឧត្ដម បានបញ្ជាក់ថា គោលនយោបាយនេះ បានដាក់ចេញនូវគោលបំណង គោលដៅ និង សសរស្តម្ភ​យុទ្ធសាស្ត្រវិស័យដីធ្លី ចំនួន៥ រួមមាន ១- អនុវិស័យរដ្ឋបាលដីធ្លី ២- អនុវិស័យរៀបចំ​ដែនដី ៣- ការគ្រប់គ្រង និងការអភិវឌ្ឍតំបន់ឆ្នេរសមុទ្រកម្ពុជា ៤- អនុវិស័យបែងចែកដីធ្លី និង៥- ការគ្រប់គ្រង និងការអភិវឌ្ឍវិស័យសំណង់ ​និង​សសរស្តម្ភ​យុទ្ធសាស្ត្រវិស័យ​ពាក់ព័ន្ធចំនួន១៧ ដែល​ចែក​ចេញជាយុទ្ធសាស្ត្រ​សមាហរណកម្មវិស័យពាក់ព័ន្ធនឹងដីធ្លី និង​យុទ្ធសាស្ត្រពាក់ព័ន្ធនឹង​ការ​គ្រប់គ្រង។

ឯកឧត្តមឧបនាយករដ្ឋមន្ត្រី ជា សុផារ៉ា បានឱ្យដឹងថា ​កិច្ចប្រជុំអន្តរក្រសួងនាពេលនេះ ធ្វើឡើងក្នុង​គោលបំណងដើម្បី​ប្រមូលយកធាតុចូល​កាលពីក្នុងកិច្ចប្រជុំលើកទីមួយ ដែលធាតុចូលទាំង​អស់​នោះ ក៏បានយកមកបោះពុម្ពជាសៀវភៅគោលនយោបាយចំនួន ៥០០ក្បាល ដើម្បីចែកជូនទៅ​បណ្ដា​ស្ថាប័ន ពាក់ព័ន្ធទាំងអស់។

ចក្ខុវិស័យដល់ឆ្នាំ២០៣៨ នៃគោល​នយោបាយ​គ្រប់គ្រង ​និងប្រើប្រាស់​ដីធ្លីដើម្បី​អភិវឌ្ឍន៍​ខេត្តព្រះសីហនុ​ ទៅជាតំបន់សេដ្ឋកិច្ចពិសេសគំរូពហុបំណង ​គឺដែនដីនៅខេត្តព្រះសីហនុ ត្រូវ​បានគ្រប់គ្រងប្រើប្រាស់ បែងចែក ការពារ និងអភិវឌ្ឍន៍​ប្រកបដោយសមធម៌ តម្លាភាព ប្រសិទ្ធភាព ចីរភាព និងបរិយាបន្ន ​ដើម្បីអភិវឌ្ឍខេត្តព្រះសីហនុ​ទៅជាទីក្រុងបៃតងអាស៊ាន នៃប៉ូលអភិវឌ្ឍន៍​ជាតិទំនើប ប្រកបដោយចីរភាព ជីវភាព សុខភាព ​និងសុភមង្គល ​នៅតំបន់ឆ្នេរសមុទ្រកម្ពុជា តាម​រយៈការជំរុញ​សមាហរណកម្មការអភិវឌ្ឍ ទីក្រុងឆ្លាត ​ការអភិវឌ្ឍបៃតង ​រមណីយដ្ឋានឆ្នេរសមុទ្រ ដែលស្អាតបំផុតលើសកលលោក មជ្ឈមណ្ឌល កំណើនជាតិ​ មជ្ឈមណ្ឌលហិរញ្ញវត្ថុអន្តរជាតិ ច្រកចេញ​ចូលអន្តរជាតិ​ មជ្ឈមណ្ឌលភស្តុភារកម្មជាតិ ដោយមានទំនាក់ទំនងជាមួយទីផ្សារអាស៊ាន និង​សកលលោក និងមជ្ឈមណ្ឌលឧស្សាហកម្មវិទ្យាសាស្រ្តបច្ចេក វិទ្យាទំនើប ​និងនវានុវត្តន៍ ដែល​មានសុខដុមនីយកម្មជាមួយ​នឹងបរិស្ថានរស់នៅល្អប្រសើរ៕