​សហរដ្ឋអាមេរិក៖ សេត​វិមាន​បាន​ប្រកាស​កាលពី​ថ្ងៃ​សុក្រ​ថា សហរដ្ឋអាមេរិក​នឹង​បញ្ជូន​ជំនួយ​ផ្នែក​សន្តិសុខ​បន្ថែម​ទៀត​ចំនួន 270លាន​ដុល្លារ​ដល់​ប្រទេស​អ៊ុយ​ក្រែ​ន ជា​កញ្ចប់​ជំនួយ​ដែល​នឹង​រួម​បញ្ចូល​ប្រព័ន្ធ​រ៉ុក្កែត​រយៈ​ចម្ងាយ​មធ្យម​ និង​យាន​ដ្រូ​ន​យុទ្ធសាស្ត្រ​បន្ថែម​ទៀត​។

​

​ជំនួយ​ចុងក្រោយ​បំផុត​នេះ​នាំ​ឲ្យ​ជំនួយ​សន្តិសុខ​សរុប​របស់​សហរដ្ឋអាមេរិក ​ដែល​បាន​ប្តេជ្ញា​ចំពោះ​អ៊ុយ​ក្រែ​ន​ដោយ​រដ្ឋបាល​របស់លោក Joe Biden មាន​រហូតដល់ ​8.2ពាន់​លាន​ដុល្លារ ហើយ​កំពុង​ត្រូវ​បាន​ចំណាយ​តាមរយៈ​ជំនួយ​សេដ្ឋកិច្ច និង​សន្តិសុខ​ចំនួន 40ពាន់​លាន​ដុល្លារ​សម្រាប់​អ៊ុយ​ក្រែ​ន ​ដែល​ត្រូវ​បានអនុម័ត​ដោយ​សភា​កាលពី​ខែឧសភា​។​ អ្នកនាំពាក្យ​ក្រុមប្រឹក្សាសន្តិសុខ​ជាតិ​សេត​វិមាន​លោក John Kirby បាន​និយាយ​កាលពី​ថ្ងៃ​សុក្រ​ថា ​ប្រធានាធិបតី​បានបញ្ជាក់​ច្បាស់​ថា​ យើង​នឹង​បន្ត​គាំទ្រ​រដ្ឋាភិបាល និង​ប្រជាជន​អ៊ុយ​ក្រែ​ន​ក្នុង​រយៈពេល​វែង​តាម​ដែល​ពួកគេ​ត្រូវការ​។​

​ជំនួយ​ថ្មី​នេះ​រួមមាន​ប្រព័ន្ធ​រ៉ុក្កែត​កាំភ្លើង​ធំ​សមត្ថភាព​ខ្ពស់ចំនួន 4​គ្រឿង ឬ HIMARS ហើយនឹង​អនុញ្ញាតឱ្យ​ទីក្រុង Kyiv ទទួលបាន​យាន​ដ្រូ​ន​ Phoenix Ghost រហូតដល់ 580គ្រឿងដែលជា​ប្រព័ន្ធ​អាវុធ​សំខាន់ៗ​ទាំងពីរដែល​នឹង​ធ្វើឱ្យ​អ៊ុយ​ក្រែ​ន​បន្ត​ប្រយុទ្ធ ទោះបីជា​កាំភ្លើង​ធំ​របស់​រុស្ស៊ី​មាន​ឥទ្ធិពល​ខ្លាំង​ក៏ដោយ​។​ ជំនួយ​ថ្មី​បំផុត​នេះក៏​រួមបញ្ចូល​គ្រាប់កាំភ្លើង​ធំ​ចំនួន ៣៦,០០០ជុំ និង​គ្រាប់រំសេវ​បន្ថែម​សម្រាប់ប្រព័ន្ធ​អាវុធ HIMARS៕

អត្ថបទ៖ ប៊ុនថន