កោះកុង៖ មន្រ្តីសមត្ថកិច្ចជំនាញនៅច្រកទ្វារព្រំដែនអន្តរជាតិចាំយាម ខេត្តកោះកុង បានឱ្យដឹងថា ពួកគាត់បានត្រៀមឃាត់ខ្លួនមុខសញ្ញាបុរសជនជាតិស្បែកខ្មៅដែលឆ្លងជំងឺអុកស្វា ពីប្រទេសថៃ ខណៈបុរសម្នាក់នេះ ត្រូវបានដាក់បម្រាមមិនឱ្យចូលមកកម្ពុជា។

លោក សុវណ្ណ ប៊ុនធឿន ប្រធានទីស្នាក់ការត្រួតពិនិត្យច្រកទ្វារព្រំដែនអន្តរជាតិចាំយាម ថ្លែង​នៅ​ថ្ងៃទី២៣ ខែកក្កដានេះថា រូបលោក និងកងកម្លាំង​នគរបាលអន្តោប្រវេសន៍​ដែល​ប្រចាំ​ការតាម​វេន​នីមួយៗ​បាននឹងកំពុងរឹតបន្តឹងចំពោះការឆ្លងដែនពីប្រទេសថៃ ​ចំពោះជនបរទេសស្បែកខ្មៅ មាន​សញ្ជាតិនីហ្សេរីយ៉ាម្នាក់​ ដែលត្រូវបានគេកំណត់ថា ជាអ្នកជំងឺអុតស្វា ទី១របស់ប្រទេសថៃ នៅភូកេត។

បើតាមលោក សុវណ្ណ ប៊ុនធឿន អះអាងថា បច្ចុប្បន្ននេះ ជនសង្ស័យខាងលើ បានកំណត់ជាមុខសញ្ញាប្រុងប្រយ័ត្នខ្ពស់អំពីជំងឺឆ្លងអុកស្វា។ ហើយមិនត្រឹមករណីជំងឺអុកស្វាទេ សូម្បីតែជំងឺបំប្លែងថ្មីនៃជំងឺកូវីដប្រភេទថ្មី ក៏បង្កើនការអនុវត្តតាមវិធានការសុខាភិបាល និងស្ថានការណ៍បច្ចុប្បន្នភាពផ្សេងៗដែលថ្នាក់ដឹកនាំដាក់ផែនការមក។

ដោយឡែកលោកវរៈសេនីយ៍ឯក ង៉ុយ ជៀង នាយប៉ុស្តិ៍នគរបាលអន្តោប្រវេសន៍ច្រកទ្វារព្រំដែនអន្តរជាតិចាំយាម ក៏ឱ្យដឹងបន្ថែមដែរថា ជនជាតិ​ស្បែកខ្មៅ មានឈ្មោះOsmond Chihazirim Nzerem អាយុ២៧ឆ្នាំនេះ ដាក់បម្រាមមិនឱ្យ​ចូលមក​កម្ពុជា​តាំងតែពីថ្ងៃទី២២ ខែកក្កដា មកម្ល៉េះ។ ​តែទោះយ៉ាងកងកម្លាំងនគរបាលរបស់លោក នៅ​តែបង្កើនកិច្ចសហការល្បាតតាមដានកំណត់មុខសញ្ញានេះតាមផ្លូវគោក​ និងផ្លូវទឹក ឃាត់ខ្លួន​ជនសង្ស័យស្បែកខ្មៅឱ្យខានតែបាន ប្រសិនបើប្រទះរកឃើញនៅក្នុងដែនសមត្ថកិច្ចគោល​ដៅគ្រប់គ្រង៕អត្ថបទ៖ មករា