ភ្នំពេញ៖ ឯកឧត្តម សុទ្ធ គឹមកុលមុន្នី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ (គ.ជ.គ.ម) បានលើកឡើងថា នៅឆ្នាំ២០២២នេះ គ.ជ.គ.ម បានត្រៀមកម្លាំងផ្ទាល់ចំនួនជាង ២ពាន់នាក់ រួមទាំងកងកម្លាំងទាំង៣ជាច្រើនម៉ឺននាក់ទៀត ដើម្បីចាំជួយអន្តរាគមន៍សង្គ្រោះពលរដ្ឋ ដែលរងគ្រោះដោយសារបញ្ហាគ្រោះទឹកជំនន់ ។

ឯកឧត្តម សុទ្ធ គឹមកុលមុន្នី បានថ្លែងប្រាប់ BTV នៅថ្ងៃទី២៣ ខែកក្កដា ឆ្នាំ២០២២នេះថា បច្ចុប្បន្ន មានខេត្តមួយចំនួនកំពុងរងគ្រោះដោយសារបញ្ហាជំនន់ទឹកភ្លៀង បង្កឲ្យប៉ះពាល់ដល់ដំណាំកសិកម្ម និងហេដ្ឋារចនាសម្ព័ន្ធនានា ហើយមន្ត្រី គ.ជ.គ.ម និងអាជ្ញាធរកំពុងចុះពិនិត្យ ដើម្បីត្រៀមស្ដារឡើងវិញ ។

ឯកឧត្តមបានបន្តថា ជាមួយនេះ កម្លាំងគណៈកម្មាធិការជាតិគ្រប់គ្រងគ្រោះមហន្តរាយ ក៏បានត្រៀមខ្លួនរួចជាស្រេចនូវកម្លាំង ស្បៀង ឧបករណ៍ និងមធ្យោបាយសង្រ្គោះ រួមទាំងសហការជាមួយកងកម្លាំងទាំង៣ និងអាជ្ញាធរតាមបណ្ដារាជធានីខេត្ត ដើម្បីឆ្លើយតបនឹងបញ្ហាគ្រោះទឹកជំនន់នៅឆ្នាំនេះ ៕ អត្ថបទ៖ បាន សុខរិទ្ធិ