កំពង់ឆ្នាំង៖ នៅថ្ងៃទី២៣ខែកក្កដា ឆ្នាំ២០២២ ក្នុងពិធីសំណេះសំណាលជាមួយគណៈកម្មាធិការ​គណបក្សឃុំរលាប្អៀរ ក្រុមការងារថ្នាក់កណ្តាលចុះមូលដ្ឋាន បាន​ជំរុញអោយថ្នាក់ដឹកនាំ​គណបក្ស​នៅ​មូលដ្ឋាន បន្តយកចិត្តទុកដាក់ជួយប្រជាពលរដ្ឋ បើទោះជាលទ្ធផលឆ្នោតឃុំសង្កាត់របស់​គណបក្ស​ប្រជាជន​ល្អក៏ដោយ។

ឯកឧត្ដម អ៊ុក ពញ្ញា សមាជិកគណៈកម្មាធិការកណ្ដាលគណបក្សប្រជាជនកម្ពុជា និងជាអនុប្រធាន​ក្រុមការងារថ្នាក់កណ្តាលចុះមូលដ្ឋានស្រុករលាប្អៀរ បានកោតសរសើរពីសភាពការណ៍ទូទៅ នៃ​ដំណើរ​ការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៥ ដែលគណបក្ស​ប្រជាជនកម្ពុជា​ទទួលបានជ័យជំនះយ៉ាងត្រចះត្រចង់បំផុត ​ដែលសបញ្ជាក់ពីការបន្តគោរព ស្រលាញ់ គាំទ្រ និង​ជឿជាក់​ពីសំណាក់ប្រជាពលរដ្ឋទូទាំងប្រទេស ​មកលើការដឹកនាំរបស់រាជរដ្ឋាភិបាល ដែលមាន​សម្តេចតេជោ ហ៊ុន សែន ជានាយករដ្ឋមន្ត្រី បានដឹកនាំកម្ពុជាឱ្យមានការរីកចម្រើនលើគ្រប់វិស័យ។

សម្រាប់ការបោះឆ្នោតជ្រើសរើសក្រុមប្រឹក្សាឃុំ-សង្កាត់ក្នុងអាណត្តិទី៥នេះដែរ ឯកឧត្តម ក៏បាន​លើក​ឡើងអំពីកិច្ចខិតខំប្រឹងប្រែងរបស់អាជ្ញាធរគ្រប់ជាន់ថ្នាក់ ដែលបានចូលរួមយ៉ាងសកម្ម​ក្នុង​ដំណើរការរៀបចំការបោះឆ្នោតនេះ ​ពិសេសរៀបចំរក្សាសន្តិសុខ ​សណ្តាប់ធ្នាប់ ចាប់ពីពេលចាប់​ផ្តើម រហូតដល់ការបោះឆ្នោតចប់សព្វគ្រប់ ប្រព្រឹត្តទៅដោយត្រឹមត្រូវ សេរី យុត្តិធម៌ គ្មានការ​ប្រើអំ​ពើ​ហិង្សា ​និង​គំរាមកំហែង​ណាមួយកើតឡើងនោះទេ។

ឯកឧត្តម បន្ថែមថា កត្តាដែលធ្វើឱ្យគណបក្សប្រជាជនកម្ពុជាទទួលបានជ័យជំនះនេះ ពិតជា​មិន​អាច​កាត់ផ្តាច់ពីការចូលរួមចំណែកដ៏ធំធេង ​ពីសំណាក់ក្រុមការងារគ្រប់ជាន់ថ្នាក់​របស់គណបក្ស ដែលបាន​លះបង់​ទាំងកម្លាំងកាយចិត្ត ​មិនខ្លាចនឿយហត់ ទើបទទួលបានលទ្ធផល​ដ៏គាប់​ប្រសើរបែបនេះ៕ ហុង វាស្នា