បន្ទាយមានជ័យ៖ ដើម្បីពង្រឹងសមត្ថភាព ជំនាញ យុទ្ធវិធីរបស់កងទ័ពឲ្យបានស្ទាត់ជំនាញ កងទ័ពវរសេនាតូចថ្មើរជើងលេខ៥១៣ ចាប់ផ្តើមវគ្គហ្វឹកហ្វឺនបំប៉នលំហាត់យុទ្ធដំណើរទ័ព។

កាលពីថ្មីៗនេះ ឧត្តមសេនីយ៍ទោ សេង ធារិន មេបញ្ជាការរង នាយសេនាធិការ យោធភូមិភាគទី៥ អមដំណើរដោយ និងឧត្តមសេនីយ៍ត្រី សឹង្ហ ទុំ មេបញ្ជាការ កងពលតូច ថ្មើរជើងលេខ៥១ បានចុះពិនិត្យ លំហាត់យុទ្ធដំណើរទ័ព បញ្ជប់វគ្គហ្វឹកហ្វឺនបំប៉នពង្រឹងវរសេនាតូចថ្មើរជើងលេខ៥១៣ ចំណុះឲ្យ កងពលតូច ថ្មើរជើងលេខ៥១ វគ្គហ្វឹកហ្វឺននេះបានចាប់ផ្តើមបើកវគ្គកាលពីថ្ងៃទី២១ ខែមីនា ឆ្នាំ២០២២ មានរយះពេល៦១ថ្ងៃ ។

ក្នុងពេលចុះពិនិត្យ ឧត្តមសេនីយ៍ទោ សេង ធារិន មានប្រសាសន៍ថា ស្ថិតនៅក្នុងកាលៈទេសៈប្រទេសមានសុខសន្តិភាព ស្ថិរភាពនយោបាយ គឺជាឱកាសមាស សំរាប់កងទ័ពធ្វើការហ្វឹកហ្វឺន ពង្រឹងសមត្ថភាព ជំនាញ យុទ្ធវិធី កងទ័ពឲ្យបានស្ទាត់ជំនាញ ធានាបានទាំងបរិមាណ គុណភាព ធានាបាននូវតួនាទីភារកិច្ច ការពារជាតិមាតុភូមិ និងប្រជាជន។

ឧត្តមសេនីយ៍ទោ សេង ធារិន បានគូសបញ្ជាក់ថា ក្រុមការងារហ្វឹកហ្វឺនត្រូវត្រួតពិនិត្យវាយតម្លៃឲ្យបានច្បាស់លាស់ ចំពោះសិក្ខាកាម ដែលទទួលបាននិទ្ទេសល្អ ត្រូវផ្តល់នូវ ប័ណ្ណសរសើរ លិខិតសរសើរ ប្រកបដោយ តម្លាភាព ដើម្បីកសាងពង្រឹងគុណភាពនាយទាហានបន្តវេន។

លំហាត់ យុទ្ធ ដំណើរទ័ពនេះ មានចំងាយ ៧១គីឡូម៉ែត្រ ក្នុងនោះធ្វើដំណើរចល័តដោយរថយន្តចំងាយ ៥១គីឡូម៉ែត្រ និងចល័តដោយថ្មើរជើង ចំងាយ ២១គីឡូម៉ែត្រ និងធ្វើលំហាត់ចល័តវាយលុក ក្នុងភូមិសាស្រ្ត ទីលានបាញ់គ្រាប់ពិត កងពលតូចថ្មើរជើងលេខ៥១ ភ្នំផ្គាំ ស្រុកស្វាយចេក ខេត្តបន្ទាយមានជ័យ។

ក្រៅពីហ្វឹកហ្វឺនពង្រឹងសមត្ថភាព កងទ័ពត្រូវត្រៀមអន្តរាគមន៍២៤ម៉ោងលើ២៤ម៉ោង ទាំងកម្លាំង សម្ភារ មធ្យោបាយ សម្រាប់ជួយសង្រ្គោះប្រជាពលរដ្ឋ រងគ្រោះ ដោយគ្រោះមហន្តាយធម្មជាតិផ្សេងៗ ឲ្យបានទាន់ពេលវេលាផងដែរ។ អត្ថបទ ៖ ឧត្ដម