ព្រៃវែង ៖ ក្រោយមានការសំណូមពរ និងទទួលបានសេចក្ដីរាយការជាក់លាក់ ពីទីតាំងល្បែងស៉ីសង ជល់មាន់អនឡាញ ក្នុងមូលដ្ឋាន ប៉ុស្តិ៍រដ្ឋបាលនគរបាលព្រែកខ្សាយ ខ លោកវរសេនីយ៍ឯក សេង ពន្លក អធិការនៃអធិការដ្ឋាននគរបាលស្រុកពាមរក៍ បានដឹកនាំកម្លាំងនគរបាលជំនាញផ្នែកព្រហ្មទណ្ឌ ចុះបិទនិងបង្ក្រាបទីតាំង ហាងការហ្វេបង្កប់ល្បែងស៉ីសង ប្រភេទ មាន់ជល់ អនឡាញ ទាំងនោះ និងបានណែនាំដល់នាយប៉ុស្តិ៍ទាំង៨ ក្នុងមូលដ្ឋានស្រុក បើនៅមានទីតាំងណាលួចបន្តបើកទៀត តហរូវទទួលខុសត្រូវជាមួយ លោកអធិការ។

គួរបញ្ជាក់ផងដែរ ប្រជាពលរដ្ឋបានឱ្យដឹងថា ទីតាំងល្បែងជល់មាន់អនឡាញក្នុងឃុំព្រែកខ្សាយខ ស្រុកពាមរក៍ ខេត្តព្រៃវែង កំពុងកើតមាននៅតាមភូមិមួយចំនួនដូចជានៅក្នុងភូមិ ៦ មានម្ចាស់ផ្ទះឈ្មោះ យិន នៅភូមិ ៥ មានម្ចាស់ផ្ទះឈ្មោះ វណ្ណា និងមាននៅភូមិ ៣ មានម្ចាស់ផ្ទះឈ្មោះ ម៉ៅ ជាដើម ដែលជាការកត់សម្គាល់ទីតាំងល្បែងជល់មាន់អនឡាញទាំងនេះមានប្រជាពលរដ្ឋក្មេងចាស់ប្រុសស្រីចូលទៅភ្នាល់ និងលេងជាប្រចាំថ្ងៃ ចាញ់ប្រាក់យ៉ាងច្រើនដែលធ្វើឱ្យមានជម្លោះក្នុងគ្រួសារ និងបង្ហាញភាពអសន្តិសុខក្នុងមូលដ្ឋាន ដែលផ្ទុយទៅនឹងគោលនយោបាយ ភូមិ ឃុំ មានសុវត្ថិភាព ដែលរាជរដ្ឋាភិបាលបានដាក់ឲ្យថ្នាក់ក្រោមជាតិធ្វើការអនុវត្តលុបបំបាត់ ដើម្បីក្ដីសុខ និងការរស់នៅរបស់ប្រជាពលរដ្ឋតាមមូលដ្ឋាននោះ។

ប្រជាពលរដ្ឋបានសង្កត់ធ្ងន់ថា ទីតាំងល្បែងជល់មាន់អនឡាញទាំងនោះ មិនមែនទើបតែកើតមាននោះទេ ហើយសកម្មភាពល្បែងទាំងនោះបានជះឥទ្ធិពលអាក្រក់ពីមួយថ្ងៃទៅមួយថ្ងៃ ដោយជ្រកតាមហាងកាហ្វេជាដើម ប្រសិនបើអាជ្ញាធរមានសមត្ថកិច្ចមិនលុបបំបាត់ល្បែងអនឡាញនេះទេប្រជាពរដ្ឋច្បាស់ជាគ្មានក្ដីសុខទេ ព្រោះល្បែងស៊ីសងនេះហើយ ដែលវាជាដើមចមបង្កើតឲ្យមានបទល្មើសចោរលួច ចោរប្លន់ មានជម្លោះក្នុងគ្រួសារ ដែលបង្កភាពអសន្តិសុខរំខានការរស់នៅរបស់ប្រជាពលរដ្ឋ ដូច្នេះសូមអាជ្ញាធរស្រុកពាមរក៍ ក៏ដូចជាខេត្តព្រៃវែង មានវិធានការបង្រ្កាបទីតាំងល្បែងទាំងនេះផង។

ពាក់ព័ន្ធល្បែងជល់មាន់អនឡាញនេះ ភ្នាក់ងារ ទូរទស្សន៍BTV បានធ្វើការទំនាក់ទំនងទៅ លោកវរសេនីយ៍ត្រី អាត អ៊ន នាយប៉ុស្តិ៍រដ្ឋបាលនគរបាលព្រែកខ្សាយខ តាមរយះទូរស័ព្ទ ប៉ុន្តែ ខលចូលមិនទទួល។

បន្ថែមទៀតនោះ ភ្នាក់ងារ BTV បានបន្តទំនាក់ទំនងទៅលោកវរសេនីយ៍ឯក សេង ពន្លក អធិការនគរបាលស្រុកពាមរក៍ ចំពោះសំណូមពររបស់ បងប្អូនពលរដ្ឋ លោក បានឲ្យដឹងថា ទីតាំងទាំងនេះ លោកបានដឹកនាំផ្ទាល់នៅព្រឹកថ្ងៃទី២៤ ខែកក្កដា ឆ្នាំ២០២២ នេះ ដើម្បីចុះបង្ក្រាប់និងបិទទាំងស្រុង ហើយបានណែនាំ ដល់នាយនគរបាលប៉ុស្តិ៍ទាំងអស់ក្នុងមូលដ្ឋានស្រុក បើកនៅមានលួចបើកត្រូវទទួលខុសត្រូវជាមួយលោក អធិការ៕​ ​

អត្ថបទ៖ កុម្ភះ