បាល់ទាត់៖ ​ព័រទុយហ្កាល់​បាន​ត្រលប់​ឡើងមក​ឈរលើ​គេ​ក្នុង​ពូ​ល A វិញ​ក្រោយ​ជ័យជំនះ ៣-១ នៅ​ទឹកដី​លុច​ហ្សាំ​បួរ​យប់មិញ ក្នុងការ​ប្រកួត​ជំ​រុះ World Cup ២០២២ តំបន់​អឺរ៉ុប​។ ​​ខ្សែប្រយុទ្ធ Liverpool, Diogo Jota បន្ត​រក​គ្រាប់​បាន​ទៀត បន្ទាប់ពី​ស៊ុត​បាន​ពីរ​គ្រាប់​ពេល​ស្មើ​ស៊ែ​ប ២-២ សប្តាហ៍មុន ​ខណៈ Cristiano Ronaldo ក៏​រកបាន​មួយ​គ្រាប់​ដែរ មុនពេល​ដែល Joao Palhinha ​តែ​ត​គ្រាប់​ចុងក្រោយ​។

​​បី​ពិន្ទុ​នេះ​ធ្វើឲ្យ​ព័រទុយហ្កាល់​ឡើងមក​លើ​គេ​ក្នុង​ពូ​ល A នេះ​មាន​គ្រាប់​បាល់​ចំណេញ​ច្រើនជាង​ស៊ែ​ប​ ដែល​យកឈ្នះ​ម្ចាស់ផ្ទះ​អា​ស៊ែ​បៃ​សង់ ២-១ ឈរ​លេខ២ មាន ៧ពិន្ទុ​ដូចគ្នា​។ ងាក​​មក​ក្រុម​លេខ១ ពិភពលោក​ប៊ែ​ល​ហ្ស៊ិ​កបាន​បំបាក់​បេឡា​រុស​ចាស់ដៃ ៨-០​។ ខ្សែប្រយុទ្ធ Brigh​t​on, Leandro Trossard​ រកបាន​ពីរ​គ្រាប់​ម្នាក់ឯង, ​កីឡាករ​របស់ Leicester City, Dennis Praet​សុទ្ធតែ​រកបាន​គ្រាប់​ដំបូង​ឲ្យ​ក្រុម​ជំរើសជាតិ ខណៈ​គ្រាប់​បាល់​ផ្សេងទៀត​មានដូចជា Michy Batshuayi, Hans Vanakens ​ពីរ​គ្រាប់​ម្នាក់ឯង ក៏ដូចជា Christian Benteke ​មួយ​គ្រាប់ និង Jeremy Doku ​មួយ​គ្រាប់​។ ​ប៊ែ​ល​ហ្ស៊ិ​ក​នៅពេលនេះ​កំពុង​ឈរលើ​គេ​ក្នុង​ពូ​ល E មាន ៧ពិន្ទុ​ពីលើ​ក្រុម​លេខ២ ឆេ​ក​ដែល​ចាញ់​នៅ​ទឹកដី​វែ​ល ១-០ ដោយ​គ្រាប់​បាល់​របស់​ខ្សែបំរើ Manchester United, Daniel James​។

​​ចំណែក​ក្រុម​ជើងឯក​រង World Cup ២០១០ ទឹកក្រូច​ហូ​ឡង់​យប់មិញ​ក៏​រកបាន​ជ័យជំនះ​ធំធេង​ផងដែរ​ ដោយ​យកឈ្នះ​នៅ​ទឹកដី​ហ្ស៊ី​ប្រា​ល់តា ៧-០​។​ Steven Berghuis, Luuk de Jong, Georginio Wijnaldum, Memphis Depay, Donyell Malen ​និង Donny van de Beek​ សុទ្ធតែ​ស្ថិតក្នុង​បញ្ជី​អ្នក​ទាត់​ចូល​យប់មិញ​។ ជ័យជំនះ​នេះ​ធ្វើឲ្យ​ក្រុម​របស់លោក Frank de Boer បន្ត​ឈរ​លេខ២ ក្នុង​ពូ​ល G នេះ​មាន ៦ពិន្ទុ​ក្រោយ​លេង ៣ប្រកួត​ឈ្នះ២ ចាញ់១ ខណៈ ទួរគី​បន្ត​ឈរលើ​គេ​មាន ៧ពិន្ទុ​ក្រោយ​ភ្លាត់​ស្មើ​ឡេ​តូ​នី ៣-៣ ក្នុង​ទឹកដី​ខ្លួនឯង​៕

​អត្ថបទ​៖​នាង សុភា​វុ​ធ