ថ្នាក់ដឹកនាំ​កីឡាហែលទឹកមានការ​ប្ដេជ្ញា​ចិត្ត​ខ្ពស់​ក្នុង​អាណត្តិ​ថ្មី ពិសេស​ការ​សម្រួច​ទិសដៅ​ស៊ី​ហ្គេម ២០២៣

ថ្នាក់ដឹកនាំកីឡាហែលទឹកមានការប្ដេជ្ញាចិត្តខ្ពស់ក្នុងអាណត្តិថ្មី ពិសេសការសម្រួចទិសដៅស៊ីហ្គេម ២០២៣

ហែលទឹក៖ ថ្នាក់ដឹកនាំសហព័ន្ធខ្មែរកីឡាហែលទឹកបានធ្វើការប្ដេជ្ញាចិត្តខ្ពស់ ក្នុងការរួមគ្នាជំរុញការអភិវឌ្ឍវិស័យកីឡាមួយនេះឲ្យកាន់តែរីកចម្រើននៅក្នុងអាណត្តិថ្មី ពិសេសការសម្រួចទិសដៅស៊ីហ្គេមឆ្នាំ២០២៣ ដើម្បីទទួលបានលទ្ធផលដ៏ល្អប្រសើរមួយក្នុងនាមម្ចាស់ផ្ទះព្រឹត្តិការណ៍ជាប្រវត្ដិសាស្ដ្រនេះ។

នេះបើតាមការលើកឡើងរបស់លោក ហែម គិរី អគ្គលេខាធិការសហព័ន្ធ ក្រោយទទួលបានអនុសាសន៍ណែនាំបន្ថែមពីឯកឧត្តម ស៊ុន ចាន់ថុល ទេសរដ្ឋមន្ដ្រី រដ្ឋមន្ដ្រីក្រសួងសាធារណការ និងដឹកជញ្ជូន និងជាប្រធានសហព័ន្ធ បន្ទាប់ពីសហព័ន្ធបានរៀបចំអង្គមហាសន្និបាតបញ្ចប់អាណត្តិទី៦ ដើម្បីបោះឆ្នោតជ្រើសរើសសមាសភាពសមាជិកគណៈកម្មាធិការប្រតិបត្តិសហព័ន្ធអាណត្តិទី៧ ឆ្នាំ២០២១-២០២៥ នៅទីស្ដីការក្រសួងសាធារណការ និងដឹកជញ្ជូនកាលពីចុងសប្ដាហ៍កន្លងទៅ។ លោក ហែម គិរី បានលើកឡើងថា ឆ្លងកាត់អាណត្តិចាស់កន្លងមកសហព័ន្ធបានសម្រេចលទ្ធផលជាច្រើន ទោះបីក្នុងបរិបទកូវីដ-១៩ ក្ដី តែជោគជ័យធំៗមួយចំនួនលេចរូបរាងជាបន្ដបន្ទាប់។ ដូច្នេះក្នុងអាណត្ដិថ្មីនេះ ក្នុងនាមមន្ដ្រីបច្ចេកទេសលោកប្ដេជ្ញាចិត្តនឹងអនុវត្តតាមអនុសាសន៍ ណែនាំរបស់ថ្នាក់ដឹកនាំសហព័ន្ធដើម្បីសម្រេចបាននូវយុទ្ធសាស្ដ្រក្នុងដំណើរឆ្ពោះទៅស៊ីហ្គេមឆ្នាំ២០២៣ តាមរយៈការយកចិត្តទុកដាក់ និងពង្រឹងការហ្វឹកហាត់ ក៏ដូចជាការប្រកួតឲ្យបានខ្លាំងដល់ក្រុមកីឡាករ-កីឡាការិនី។

សម្រាប់លទ្ធផលនៃការបោះឆ្នោតក្នុងអង្គមហាសន្និបាតបន្ដអាណត្តិទី៧ វិញ គេឃើញសហព័ន្ធបានបន្ថែមនូវថ្នាក់ដឹកនាំថ្មីមួយចំនួនក្នុងនោះឯកឧត្តមទេសរដ្ឋមន្ដ្រី ស៊ុន ចាន់ថុល បន្ដធ្វើជាប្រធានសហព័ន្ធ, អ្នកឧកញ៉ា លាង ឃុន បន្ដធ្វើជាអនុប្រធានទី១ ខណៈអ្នកឧកញ៉ា ទ្រី ភាព បានសម្រេចចិត្តចូលរួមដឹកនាំសហព័ន្ធក្នុងតំណែងអនុប្រធានសហព័ន្ធ ជាមួយឯកឧត្តម សួង ហេង, ឯកឧត្តម បុង ប៊ុនហួន, ឯកឧត្តម ហឿន សំនៀង និងលោក ហែម ចាន់លី។ រីឯលោក ហែម គិរី បន្ដធ្វើជាអគ្គលេខាធិការ និងអគ្គលេខាធិការរងលោក នាង សូរិទ្ធិយ៉ា។ ចំណែកកញ្ញា ហែម ថុនវិទិនី បានទទួលតួនាទីជាអគ្គហេរញ្ញិក និងអគ្គហេរញ្ញិករងកញ្ញា ជា ពូលី និងសមាជិកម្នាក់គឺកញ្ញា ម៉ក់ គន្ធ៕

អត្ថបទ៖ លី ឈុនឡា