មណ្ឌលគិរី៖ ខេត្តមណ្ឌលគិរីត្រូវបានគេស្គាល់ថាជាតំបន់ជាការពារធម្មជាតិដ៏ធំមួយរបស់ប្រទេសកម្ពុជា ដែលសំបូរទៅដោយសត្វព្រៃយ៉ាងសំបូរបែបកំពុងរស់នៅក្នុងព្រៃដែលលាតសន្ធឹងរាប់សិបម៉ឺនហិកតា​ជារឿយៗនៅពេលល្បាតព្រៃពីសំណាក់មន្ត្រីឧទ្យានុរក្សក៏តែងប្រទះឃើញហ្វូងសត្វព្រៃជាហូរហែរ ហើយនៅចុងខែមីនានេះមន្ត្រីជំនាញបានឃើញវត្តមានសត្វស្វាក្រវ៉ាត់ ឬហៅថាស្វាកន្ទុយសជាង១០ក្បាល ដែលស្វាកន្ទុយសនេះជាសត្វកម្រមួយប្រភេទនៅប្រទេសកម្ពុជា។

យោងលើការបង្ហោះតាមបណ្ដាញសង្គមហ្វេសបុកផ្លូវការរបស់មន្ទីរបរិស្ថានខេត្តមណ្ឌលគិរី បានបង្ហាញឲ្យឃើញពីសកម្មភាពសត្វស្វាកន្ទុយសចំនួន១៥ក្បាល ដែលកំពុងលោតបំលាស់ទីពីដើមឈើមួយទៅដើមឈើមួយទៀតគួរឲ្យចាប់អារម្មណ៍ជាខ្លាំង និងជាខ្សែវីដេអូដ៏កម្រដែលថតបានដោយក្រុមមន្ត្រីឧទ្យានុរក្សត្រង់ចំណុចព្រៃពាក់កណ្ដាលស្រោងមួយកន្លែង ស្ថិតក្នុងតំបន់ស្នូលនៃដែនជម្រកសត្វព្រៃភ្នំព្រេច ។

ប្រធានមន្ទីរបរិស្ថានខេត្តមណ្ឌលគិរី លោក កែវ សុភក៌ បានថ្លែងប្រាប់តាមទូរសព្ទនៅថ្ងៃទី៣១មីនានេះថា ស្វាកន្ទុយសកំពុងត្រូវបានខិតខំស្ដារឡើងវិញពីសំណាក់មន្ត្រីជំនាញ​ និងមានចំនួនកើនឡើងវិញតិចតួចផងដែរនៅក្នុងព្រៃអភិរក្ស ហើយអំបូរស្វាកន្ទុយសនេះកំពុងមានវត្តមានច្រើនក្នុងដែនជម្រកសត្វព្រៃកែវសីមានៃខេត្តមណ្ឌលគិរី ។

ជាមួយគ្នានេះដែរលោកប្រធានមន្ទីរក៏បានបញ្ជាក់ឲ្យដឹងដែរថានៅក្នុងសប្ដាហ៍​ទី៤នៃ​​ខែមីនាមន្ត្រីជំនាញក៏បានល្បាតប្រទះឃើញនូវបទល្មើសសត្វព្រៃមួយចំនួននិងធ្វើការបង្ក្រាបរឹបអូសនៅក្នុងដែនជម្រកសត្វព្រៃភ្នំព្រេចក្នុងនោះមានការដោះ​អន្ទាក់សត្វព្រៃ២១ខ្សែនិងមានការរឹបអូសបានសាច់សត្វស្វា១គីឡូក្រាមម៉ូតូកែច្នៃដឹកឈើ៣គ្រឿងនិងរណាយន្តមួយចំនួន ព្រមទាំងមានការអប់ណែនាំដល់ប្រជាពលរដ្ឋចំនួន១២នាក់ឲ្យធ្វើកិច្ចសន្យាបញ្ឈប់ការដាក់អន្ទាក់សត្វទទានិងរុះរើការប្រក់តង់រស់នៅក្នុងដែនអភិរក្សព្រៃឈើ ។

សូមបញ្ជាក់ថា នៅដែនអភិរក្សព្រៃឈើនៅក្នុងខេត្តមណ្ឌលគិរី ទោះបីជាមន្ត្រីជំនាញខិតខំដោះអន្ទាក់សត្វព្រៃនិងព្យាយាមអប់រំប្រជាពលរដ្ឋនៅជុំវិញតំបន់ការពារធម្មជាតិជារឿយៗក៏ដោយ គឺនៅតែមានការលបលួចបរបាញ់សត្វ និងដាក់អន្ទាក់សត្វព្រៃ ដែលធ្វើឲ្យសត្វព្រៃដ៏កម្រមួយចំនួន មិនត្រូវបានប្រទះឃើញទៀតនោះទេ តួយ៉ាងដូចជាសត្វគោព្រៃ សត្វក្របីព្រៃ និងសត្វខ្លាធំជាដើម គឺមន្ត្រីជំនាញមិនដែលបានឃើញដាន ឬចាប់រូបភាពបានដោយកាមេរ៉ាបង្កប់ទៀតនោះទេ ៕អត្ថបទ ៖ អ៊ិត ភីរុណ