ត្បូងឃ្មុំ៖ ព្រះវិហារចាស់ទ្រុឌទ្រោមនៅក្នុងវត្តបុទុមព្រឹក្ស ហៅវត្តពពេល ស្ថិតក្នុងភូមិពពេល ឃុំពពេល ស្រុកពញាក្រែក ខេត្តត្បូងឃ្មុំ ត្រូវបានវាយចោល និងជំនួសមកវិញជាព្រះវិហារថ្មី ក្រោមការផ្តួចផ្តើមសាងសង់ដោយសម្តេចអគ្គមហាពញាចក្រី ហេង សំរិន ប្រធានរដ្ឋសភា និង​សម្តេចធម្មវិសុទ្ធវង្សា សៅទី ហេង សំរិន ដោយមានការចូលរួម ពីឯកឧត្តម លោកជំទាវ លោក លោកស្រី និងពុទ្ធបរិស័ទជិតឆ្ងាយផងដែរ។

ការដ្ឋានសាងសង់ព្រះវិហារថ្មីវត្តបុទុមព្រឹក្ស ហៅវត្តពពេលនេះ ត្រូវបានធ្វើពិធីក្រុងពិលីបញ្ចុះ បឋមសីលាបើកការសាងសង់ជាផ្លូវការ នាព្រឹកថ្ងៃទី២៤ ខែកក្កដា ឆ្នាំ២០២២ ទៅតាម​ទំនៀមទម្លាប់ ក្រោមការ​អញ្ជើញចូលរួមពីឯកឧត្តម វង សូត និងលោកជំទាវ ​និងឯកឧត្តម កែវ ពិសិដ្ឋ និង​លោកជំទាវ ជាតំណាងដ៏ខ្ពង់ខ្ពស់សម្តេចអគ្គមហាពញាចក្រី ហេង សំរិន ប្រធានរដ្ឋសភា និងសម្តេចធម្មវិសុទ្ធវង្សា សៅទី ហេង សំរិន។

ព្រះវិហារថ្មីនេះគ្រោង នឹងបញ្ចប់ការសាងសង់ក្នុងរយៈពេលមិនដល់មួយឆ្នាំផង ពោលគឺឱ្យរួចរាល់​នៅ​មុនថ្ងៃបោះឆ្នោតជ្រើសតាំងតំណាងរាស្ត្រនីតិកាលទី៧ ថ្ងៃទី២៣ ​ខែកក្កដា ​ឆ្នាំ២០២៣ ដោយ​នឹង​ចំណាយ​បច្ច័យប្រមាណ ​១ពាន់លានរៀល។

ឯកឧត្តមរដ្ឋមន្ត្រី វង សូត បាន​គូសបញ្ជាក់ថា​ ព្រះវិហារចាស់មានភាពទ្រុឌទ្រោមណាស់ទៅហើយ អាចបាក់ធ្លាក់ត្រង់កន្លែងណាមួយបង្កការគ្រោះថ្នាក់​ដល់មនុស្ស ម្យ៉ាងវិញទៀតតាមការពិនិត្យ​ជាក់​ស្តែង គឺ មិនអាច​ប្រើប្រាស់​បាន​ទៀតទេ ​ទើបសម្រេចវាយចោលធ្វើថ្មី​ ថ្វីបើមានអ្នកខ្លះរិះគន់ថា​យើង​មិនរក្សាវិហារ ​ចាស់ទុកជាវត្ថុបុរាណក៏ដោយចុះ ​គឺត្រូវតែវាយចាស់ចោល ​ធ្វើថ្មីជំនួសតាមការចាំបាច់​ជាក់ស្តែង យើងមិនអាចធ្វើទៅតាមអ្នករិះគន់បានឡើយ។

ឯកឧត្តម បានបន្តថា ព្រះវិហារគឺជាសមិទ្ធផលធំណាស់សម្រាប់ វិស័យព្រះពុទ្ធសាសនា វត្តមិន​អាចអត់​ព្រះវិហារបានទេ​ អញ្ចឹង​ហើយទើប​បានជាពុទ្ធបរិស័ទ​គ្រប់​ជំនាន់ ​ខ្នះខ្នែង​រួបរួម​កម្លាំង​សាមគ្គីគ្នា ក្នុងការប្រមូលបច្ច័យកសាងព្រះវិហារ​នៅតាមទីអារាមវត្តនៅទូទាំងប្រទេស ដោយ​ការ​កសាងព្រះវិហារពីជំនាន់មុនត្រូវចំណាយពេលជាច្រើនឆ្នាំ​ វត្តខ្លះអស់ចៅអធិការបីបួន ​អង្គក៏មាន តែ​សម័យឥឡូវមិនដូច្នោះទៀតទេ ​គឺយើងអាចមានលទ្ធភាពកសាងបានលឿន​ អាស្រ័យដោយ ប្រទេស​ជាតិរបស់យើងមានសុខសន្តិភាព មានការអភិវឌ្ឍ ស្ថានភាពជីវភាពគ្រួសារពលរដ្ឋមួយ​ចំនួនធំ ធូរធា ​ដែលអាចឱ្យការប្រមូលបច្ច័យសម្រាប់ការកសាងព្រះវិហារ និងសមិទ្ធផលនានា​ក្នុងវត្តប្រព្រឹត្តទៅ ​បានលឿន និងឆាប់រហ័ស​៕ អត្ថបទ៖ បាន សុខ​រិទ្ធ