ត្បូងឃ្មុំ៖ ឯកឧត្ដមឧបនាយករដ្ឋមន្រ្តី ជា សុផារ៉ា រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ បានអញ្ជើញសំណេះសំណាលជាមួយក្រុមគ្រូពេទ្យរំចង់ ដែលបានពិនិត្យ ពិគ្រោះ និងព្យាបាលជំងឺ មាត់ធ្មេញជូនដល់ប្រជាពលរដ្ឋដោយឥតគិតថ្លៃ និងបានចុះពិនិត្យវឌ្ឍនភាព នៃការសាងសង់មន្ទីរពេទ្យ បង្អែកស្រុកក្រូចឆ្មារទី២ នៅក្នុងស្រុកក្រូចឆ្មារ ខេត្តត្បូងឃ្មុំ។

ក្នុងឱកាសជួបសំណេះសំណាលជាមួយក្រុមគ្រូពេទ្យរំចង់ ឯកឧត្ដមឧបនាយករដ្ឋមន្រ្តី ជា សុផារ៉ា បាននាំ​មកនូវការផ្តាំផ្ញើសាកសួរសុខទុក្ខ​គោរព​ស្រលាញ់ និងដឹងគុណយ៉ាងជ្រាលជ្រៅ​ពី​សំណាក់​សម្តេចតេជោ ហ៊ុន សែន នាយករដ្ឋមន្ត្រី និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ជូនចំពោះ​ក្រុម​គ្រូពេទ្យរំចង់ ​និងប្រជាពលរដ្ឋទាំងអស់​ដែលបានផ្តល់ការគាំទ្រដល់សម្តេចតេជោ​ឱ្យបន្តដឹកនាំ​នាវា​កម្ពុជាឆ្ពោះទៅកាន់វឌ្ឍនភាព ​ដែលជាការបានមើលឃើញអំពើល្អ ​និងគាំទ្រគោលនយោ បាយ​ដឹកនាំ​របស់សម្តេចតេជោ ​ដែលនាំមកនូវសន្តិភាព​ និងការអភិវឌ្ឍលើគ្រប់វិស័យ ហើយជានិច្ចកាល សម្តេចទាំងទ្វេរ ​តែងតែបានខិតខំបំពេញតាមបំណងប្រាថ្នា​ និងដោះស្រាយរាល់បញ្ហាប្រឈមនានា របស់ប្រជាពលរដ្ឋ ​សំដៅធ្វើយ៉ាងណាឱ្យពួកគេមានសេចក្តីសុខ ​សុភមង្គល​ រីកចម្រើនទៅមុខទៀត ដល់កូនចៅជំនាន់ក្រោយ ​និងបានជួយលើកស្ទួយជីវភាព​របស់ប្រជាពលរដ្ឋឱ្យប្រសើរឡើង​ផងដែរ។

ឯកឧត្ដម បានបញ្ជាក់ថា ក្នុងដំណាក់កាល ដែលប្រទេសកម្ពុជាប្រឈមនឹងវិបត្តិជំងឺកូវីដ-១៩នោះ សម្តេចតេជោ ​បានពុះពារខិតខំគ្រប់បែបយ៉ាង​ ដើម្បីស្វែងរកវ៉ាក់សាំងមកចាក់ជូនប្រជាពលរដ្ឋ​ដោយ​ឥតគិតថ្លៃ ក្នុងពេលដែលប្រជាពលរដ្ឋ​មាន​ការ​ភិតភ័យ​តក់ស្លុត​ជាទីបំផុត រហូតមកដល់​ពេលនេះ ក្រោមយុទ្ធសាស្រ្តរបស់សម្តេចតេជោ ធ្វើឱ្យប្រជាពលរដ្ឋលែងមានការភិតភ័យ ហើយ​ជំងឺកូវីដ-១៩ ត្រូវបានគ្រប់គ្រង​ ហើយសេដ្ឋកិច្ចជាតិ​ ក៏បានបើកដំណើរការជាប្រក្រតីឡើងវិញ។

ឯកឧត្ដម បានកោតសរសើរ​ និងថ្លែងអំណរគុណដល់ក្រុមគ្រូពេទ្យរំចង់ ​ដែលបានលះបង់ពេលវេ លា និងកម្លាំងកាយចិត្តជួយពិនិត្យពិគ្រោះ និងព្យាបាលជំងឺមាត់ធ្មេញជូនប្រជាពលរដ្ឋដោយ​ឥតគិតថ្លៃ ​ដែលជាសកម្មភាពមនុស្សធម៌ ។

ក្នុងពេលចុះពិនិត្យវឌ្ឍនភាព នៃការសាងសង់មន្ទីរពេទ្យបង្អែកស្រុកក្រូចឆ្មារទី២ ឯកឧត្ដមឧបនា យករដ្ឋមន្ត្រី បានបញ្ជាក់ថា អគារថ្មីទី១ នៃមន្ទីរពេទ្យបង្អែកស្រុកក្រូចឆ្មារ ដែលមាន​លក្ខណៈ​ទំនើបថ្មី និងធំទូលាយ ជាអំណោយរបស់សម្ដេចតេជោ ហ៊ុន សែន និងសម្ដេចកិត្តិព្រឹទ្ធ​បណ្ឌិត ប៊ុន រ៉ានី ហ៊ុនសែន ផ្តល់ជូនតាមរយៈឯកឧត្ដម ហើយពេលនេះ អគារថ្មីមួយទៀត កំពុងដំណើរការ​សាងសង់​បន្ថែមទៀត ដើម្បីបំពេញតម្រូវការក្នុងការផ្តល់សេវាសុខាភិបាលជូនដល់ប្រជាពលរដ្ឋ៕ អត្ថបទ៖ យន់ វ៉ាន់