ពោធិ៍សាត់៖ នៅថ្ងៃទី២៤ ខែកក្កដានេះ នៅទីស្នាក់ការគណបក្សប្រជាជនកម្ពុជាខេត្តពោធិ៍សាត់ ក្នុងសង្កាត់ព្រៃញី ក្រុងពោធិ៍សាត់ មានរៀបចំពិធីផ្សព្វផ្សាយរបាយការណ៍សន្និបាត​គណៈកម្មាធិការ​កណ្តាល​វិសាមញ្ញ របស់គណបក្សប្រជាជនកម្ពុជា កាលពីថ្ងៃទី១៦-១៧ ខែកក្កដានេះ។

ឯកឧត្តម ស៊ុយ សែម សមាជិកគណៈកម្មាធិការកណ្តាល និងជាប្រធានក្រុមការងារគណបក្ស ប្រជាជនកម្ពុជា​ចុះជួយមូលដ្ឋានខេត្តពោធិ៍សាត់ បានថ្លែងអំណរគុណដល់ក្រុមការងារគណបក្ស​ប្រជាជនកម្ពុជាខេត្តពោធិ៍សាត់ ដែលបានលះបង់ពេលវេលាកម្លាំងកាយកម្លាំងចិត្ត ចូលរួមចុះជួយ​ប្រជាពលរដ្ឋ នៅតាមមូលដ្ឋាននានាទូទាំងខេត្តពោធិ៍សាត់ រហូតគណបក្សប្រជាជនកម្ពុជា ទទួល​បាន​សំឡេងគ្រាំទ្រ រហូតដល់ទៅ៨៥,២៦ភាគរយ ដែលជាភាគរយខ្ពស់ជាងគេក្នុងក្របខ័ណ្ឌទូទាំង​ប្រទេស ក្នុងការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៥ ដោយទទួលបាន​អាសនៈចំនួន​៣១១ ក្នុងចំណោម អាសនៈ សរុបចំនួន៣៤១ ក្នុងខេត្តពោធិ៍សាត់ ដែលស្មើ​នឹង៩១,២០ភាគរយ។

ឯកឧត្តម ក៏បានផ្តល់ជាមតិចំនួន៣០ចំណុចបន្ថែមទៀត ដែលបានដកស្រង់ចេញពីអនុសាសន៍ដ៏ ថ្លៃថ្លា របស់សម្តេចតេជោ ហ៊ុន សែន ដើម្បីជំរុញការងារបម្រើប្រជាពលរដ្ឋតាមមូលដ្ឋានឱ្យកាន់​តែមានប្រសិទ្ធភាពខ្ពស់។

ក្នុងចំណោមមតិទាំង៣០ចំណុចនេះឯកឧត្តម ស៊ុយ សែម បានសង្កត់ធ្ងន់លើការងារ ដោះស្រាយ​បញ្ហា និងសំណូមពររបស់ប្រជាពលរដ្ឋនៅតាមមូលដ្ឋានដោយឯកឧត្តម ​បានណែនាំឱ្យក្រុម ការងារ​ចុះជួយតាមមូលដ្ឋាន​ សហការជាមួយអាជ្ញាធរមូលដ្ឋាន ​ត្រូវរៀបចំជាវេទិការសាធារណៈតាមភូមិ-ឃុំ ដោយបើកឱកាសឱ្យប្រជាពលរដ្ឋគ្រប់រូប អាចចូលរួមបានដោយមិនប្រកាន់បក្សពួក មិនប្រកាន់​បក្សនយោបាយ ដើម្បីអាចចូលរួមបញ្ចេញមតិ សំណូមពរ ក្តីកង្វល់នានាលើការអភិវឌ្ឍក្នុង​មូលដ្ឋាន​ភូមិ-ឃុំ និងក្នុងជីវភាពរស់នៅប្រចាំថ្ងៃរបស់ពួកគេ​ ហើយក្រុមការងារ ​និងអាជ្ញាធរ ត្រូវតែធ្វើការ​ដោះស្រាយជូនពួក គេឱ្យបានឆាប់រហ័ស ។

ឯកឧត្តម ស៊ុយ សែម បានណែនាំឱ្យមេឃុំ-ចៅសង្កាត់ របស់គណបក្សប្រជាជន ​ដែលទើបទទួល តំណែងត្រូវខិតខំយកចិត្តទុកដាក់ក្នុងការបម្រើប្រជាពលរដ្ឋ ​ដោយភាព​ទន់ភ្លន់​តែម៉ឺងម៉ាត់​ មិនគួរធ្វើ សកម្មភាព​ទាំងឡាយណា​ ដែលអាចធ្វើឱ្យប៉ះពាល់​ដល់​សតិអារម្មណ៍​របស់ប្រជាពលរដ្ឋជាដាច់ខាត ជាពិសេស លើការងារផ្តល់សេវាសាធារណៈជូនប្រជាពលរដ្ឋ ៕ អត្ថបទ៖ ពៅ ភិរុណ