បាត់ដំបង៖ ព្រះវិហារវត្តសំរោងក្នុងអាយុកាលជាង១០០ឆ្នាំ ក្នុងខេត្តបាត់ដំបង ដែលមានសភាព​ទ្រុឌទ្រោមខ្លាំង ត្រូវបានក្រសួងវប្បធម៌ និងវិចិត្រសិល្បៈ កំពុងធ្វើការ​ជួសជុលឡើងវិញ ដើម្បី​អភិរក្សន៍​ទុកជាសម្បត្តិបេតិកភណ្ឌជាតិ។

លោក គឹម សោភ័ណ ប្រធានមន្ទីរវប្បធម៌ និងវិចិត្រសិល្បៈ ខេត្តបាត់ដំបង បានឱ្យដឹងថា ព្រះវិហារ​ វ័យ​ចំណាស់មួយនេះ​ បានចាប់ផ្ដើមដំណើរការជួសជុលចាប់ពីចុងខែមេសា ហើយគ្រោង​នឹង​បញ្ចប់​នៅអំឡុងខែតុលា ឆ្នាំនេះ ដែលមកដល់ពេលនេះ ដំណើរការ​ជួសជុល​សម្រេច​បាន​ប្រមាណ ៣៥ភាគរយ។

លោក គឹម សោភ័ណ បានឱ្យដឹងបន្ថែមថា វត្តសំរោងក្នុង ​ជាអតីតគុកសម្រាប់ដាក់អ្នកទោស​ក្នុង​របប​កម្ពុជា​ប្រជាធិបតេយ្យ។ ពួកខ្មែរក្រហម ​បានយកព្រះវិហារបុរាណនេះ ធ្វើជាកន្លែងឃុំឃាំង ធ្វើទារុណកម្ម និងជាកន្លែងសម្លាប់មនុស្ស​យ៉ាង​សាហាវ​ព្រៃផ្សៃបំផុត។ ​ហេតុដូច្នេះហើយ វត្ដសំរោងក្នុងបានក្លាយជាទីកន្លែង​ ដែលមាន​សក្ដានុពលទេសចរណ៍។

វត្តសំរោងក្នុង គឺជាវត្តមួយ​ដែលមានអាយុកាលចាស់ជាងគេក្នុងខេត្តបាត់ដំបង មានទីតាំង​ស្ថិត​នៅភូមិសំរោងក្នុង ឃុំសំរោងក្នុង ស្រុកឯកភ្នំ ស្របតាមមដងស្ទឹងសង្កែត្រើយខាងកើត តាមដងផ្លូវក្រាលកៅស៊ូ១ខ្សែ ​មានចម្ងាយជាង៥គីឡូម៉ែត្រពីទីរួមខេត្ត។

ក្រសួងវប្បធម៌​ និងវិចិត្រសិល្បៈ បានចុះបញ្ជីព្រះវិហារវត្តសំរោងក្នុង ​ជាសម្បត្តិបេតិកភណ្ឌជាតិ ដែល​ត្រូវថែរក្សា និងការពារ ដូច្នេះរាល់ការជួសជុល​ និងកែលម្អគ្រប់ទម្រង់ ត្រូវសុំច្បាប់​អនុញ្ញាត​ពីក្រសួងវប្បធម៌​ និងវិចិត្រសិល្បៈ ​បើមិនដូច្នេះទេ​ នឹងត្រូវប្រឈមមុខចំពោះច្បាប់ជាធរមាន៕ អត្ថបទ៖ នឿត សុភក្ត្រ