ភ្នំពេញ៖ ឯកឧត្តមវេជ្ជបណ្ឌិត ងី មានហេង ប្រធានមនី្ទរសុខាភិបាលរាជធានីភ្នំពេញ តាមរយៈ BTV ព័ត៌មាន នាព្រឹកថ្ងៃទី២៦ ខែកក្កដា ឆ្នាំ២០២២នេះថា គិតមកត្រឹមថ្ងៃនេះ ប្រជាពលរដ្ឋរាជធានី​ភ្នំពេញ អាយុចាប់ពី១៨ឆ្នាំឡើង ​បានសម្រុកមកចាក់វ៉ាក់សាំងបង្ការជំងឺកូវីដ-១៩ ដូសជំរុញទី៣ បានចំនួន១,៤៩១,៥៩៨នាក់(១០៥.៥៨%) ។

ឯកឧត្តមវេជ្ជបណ្ឌិត ងី មានហេង បានបញ្ជាក់ទៀតថា សព្វថ្ងៃក្រុមការងារគ្រូពេទ្យមកពីស្ថាប័ន​អង្គភាព​ផ្សេងៗ រួមមានមនី្ទរសុខាភិបាល នៃរដ្ឋបាលរាជធានីភ្នំពេញ, ​កងយោធពលខេមរភូមិន្ទ នៃ​ក្រសួងការពារជាតិ, មនី្ទរពេទ្យថ្នាក់ជាតិ ​និងក្រុមគ្រូពេទ្យTYDA និងក្រុមការងារគ្រូពេទ្យ​ស្ម័គ្រ​ចិត្ត​នានា បានចូលរួមយ៉ាងសកម្ម ​ក្នុងការចាក់វ៉ាក់សាំងបង្ការជំងឺកូវីដ-១៩ ​ចាប់ពីដូសមូលដ្ឋាន រហូត​ដល់ដូសជំរុញ ​ជូនប្រជាពលរដ្ឋ ក្នុងនោះអ្វីដែលក្រុមការងារគ្រូពេទ្យចង់បាន គឺសូមប្រជាពលរដ្ឋ​ដែលទទួល​បានការចាក់វ៉ាក់សាំងដូសទី២រួច ​និងដល់វេណត្រូវចាក់វ៉ាក់សាំងដូសជំរុញទី៣ សូម​ប្រញាប់ប្រញាល់​មកចាក់វ៉ាក់សាំងការពារជំងឺកូវីដ១៩ ដូសជំរុញទី៣នេះ ​ឲ្យបានគ្រប់ៗគ្នា ព្រោះសំខាន់​ណាស់សម្រាប់បងប្អូនប្រជាពលរដ្ឋ ​ដើម្បីចូលរួមទប់ស្កាត់ការចម្លងមេរោគកូវីដ-១៩ បំប្លែងថ្មី ​និងដើម្បីជាការឆ្លើយតបតាមអនុសាសន៍របស់ម្តេចអគ្គមហាសេនាបតីតេជោ ហ៊ុន សែន​ នាយករដ្ឋមន្រី្ត ក៏ដូចជាក្រសួងសុខាភិបាល​ រដ្ឋបាលរាជធានីភ្នំពេញ ដែលបានធ្វើការអំពាវនាវ​ដល់​ប្រជាពលរដ្ឋទាំងអស់ ដែលមិនទាន់មកទទួលវ៉ាក់សាំងដូសជំរុញទី៣ ទៅចាក់វ៉ាក់សាំងឲ្យបានគ្រប់​ចំនួនប្រជាពលរដ្ឋទាំងអស់។

ទន្ទឹមនឹងនោះ លោកតា លោកយាយ កុមារ យុវវ័យ និងប្រជាពលរដ្ឋ រស់នៅក្នុងមូលដ្ឋានរាជធានី​ភ្នំពេញ ​មកចាក់វ៉ាក់សាំងបង្ការជំងឺកូវីដ-១៩​ ដូសមូលដ្ឋាន​ និងដូសជំរុញ ពីក្រុមការងារគ្រូពេទ្យ​នៃមនី្ទរពេទ្យ​បង្អែកពោធិ៍ចិនតុង បានលើកឡើងពីសារប្រយោជន៍​ដែលទទួលការចាក់វ៉ាក់សាំង​បង្ការ​ជំងឺកូវីដ-១៩ បានជួយបង្ការ ​ជួយការពារសម្រាប់ប្រជាពលរដ្ឋទូទាំងប្រទេសតែម្តង។ អ្វីដែលគួរឲ្យកត់សម្គាល់នោះគឺ នៅពេលប្រជាពលរដ្ឋតូចកី្ត ធំកី្ត មេគ្រួសារ ឬក៏សមាជិកគ្រួសារ នៃ​សង្គមណាមួយនោះ បានចូលរួមបង្ការជំងឺកូវីដ-១៩នេះរួចហើយ​ និងជាសៈស្បើយនោះ គឺប្រសើរក្រៃលែងណាស់ ព្រោះថាមិនមានលាបអ្វី ស្មើនឹងលាបមិនឆ្លងមេរោគកូវីដ-១៩ និង​ឈឺនោះទេ និងសូមគោរពដឹងគុណគ្រប់យ៉ាង​ ដែលសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រី្ត នៃព្រះរាជាណាចក្រកម្ពុជា បានផ្តល់វ៉ាក់សាំងបង្ការជំងឺកូវីដ-១៩ ជូនដល់ប្រជាជនទូទាំងប្រទេស។

ជាចុងក្រោយឯកឧត្តមវេជ្ជបណ្ឌិត ងី មានហេង ប្រធានមនី្ទរសុខាភិបាលរាជធានីភ្នំពេញ បាន​បញ្ជាក់ទៀតថា ​ជាលទ្ធផលក្នុងដំណើរការចាក់វ៉ាក់សាំងបង្ការជំងឺកូវីដ-១៩ ​ជូនប្រជាពលរដ្ឋ អាយុ១៨ឆ្នាំឡើងនៅរាជធានីភ្នំពេញ ​គិតត្រឹមថ្ងៃទី២៥ ខែកក្កដា ម្សិលមិញ​នេះ​ ចាក់ដូសទី៣ បាន​ចំនួន១០៥.៥៨%, ចាក់ដូសទី៤ បានចំនួន៧៩.២៤% ​និងចាក់ដូសទី៥ បានចំនួន៧.៥១%៕

អត្ថបទ រដ្ឋា