ភ្នំពេញ៖ គម្រោងបោសសម្អាតមីនដើម្បីមនុស្សធម៌ និងការស្រាវជ្រាវការអភិវឌ្ឍន៍​បច្ចេកទេសបោស​សម្អាតមីន (HDR&D) របស់សហរដ្ឋអាមេរិក បានសន្យាបន្តកិច្ច​សហប្រតិបត្តិការ​ជាមួយមជ្ឈមណ្ឌលសកម្មភាពកំចាត់មីនកម្ពុជា (CMAC) រៀបចំប្រព័ន្ធបច្ចេកវិទ្យាកាន់​តែទំនើប ក្នុងការប្រមូលទិន្នន័យ និងពន្លឿនប្រតិបត្តិការបោសសំអាតមីននៅកម្ពុជា ។

ក្នុងជំនួបជាមួយឯកឧត្តម ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយក នៃ​មជ្ឈមណ្ឌលសកម្មភាពកំចាត់មីនកម្ពុជា នៅថ្ងៃទី២៦​ ខែកក្កដា ឆ្នាំ២០២២ លោក Sean Burke នាយកកម្មវិធី HDR&D ​បានបង្ហាញអារម្មណ៍សប្បាយចិត្ត ​និងបានថ្លែងអំណរគុណយ៉ាងជ្រាលជ្រៅ ចំពោះកិច្ចសហការក្នុងការប្រើប្រាស់បច្ចេកវិទ្យា ​ដែលគំាទ្រដោយសហរដ្ឋអាម៉េរិក និងនៅតែ​បន្តការ​គាំទ្រ​បន្ថែមទៀត នាពេលអនាគតខាងមុខទៀត ។

ជាមួយនេះប្រធានកម្មវិធី HDR&D បានជំរុញទៅស៊ីម៉ាក់ អាចដាក់សំណើបន្ថែម ក្នុងកិច្ច​សហប្រតិបត្តិការបោស​សំអាតមីននេះ ​ហើយគម្រោងនេះ នឹងសិក្សាដើម្បីជួយបន្ថែមទៀត ដែល​ក្នុងនោះ ការងារធ្វើឲ្យប្រសើរឡើង នៃការរករុកគ្រាប់មីន ​តាមរយៈប្រព័ន្ធបច្ចេកវិទ្យាទំនើប ។

ក្នុងឱកាសនោះ ​ឯកឧត្តម ហេង រតនា ​មានប្រសាសន៍ថា កាលពីអំឡុងកម្ពុជា មានការឆ្លង​រាលដាល​ខ្លាំង នៃជំងឺកូវីដ-១៩ មានការលំបាកមួយចំនួនក្នុងការងារបោសសំអាតមីន ប៉ុន្តែកង​កម្លាំងស៊ីម៉ាក់ នៅតែបន្តធ្វើការងាររបស់ខ្លួន ដោយមិនមានការផ្អាកនោះទេ ។

ឯកឧត្តម បានថ្លែងអំណរគុណដល់លោក Sean Burke ដែលបានសហការជួយជាកុំព្យូទ័រ និង​ថេបប្លែត រួមជាមួយនឹងប្រព័ន្ធបច្ចេកវិទ្យាទំនើប ដើម្បីអភិវឌ្ឍសមត្ថភាពមន្រ្តីជំនាញក្នុងការប្រមូល​ទិន្នន័យក្នុងពន្លឿនប្រតិបត្តិការបោសសំអាតមីន ពិសេសការបោសសំអាតកាកសំណល់យុទ្ធភណ្ឌ​សង្រ្គាមនៅបាតទន្លេរ ដែលទាមទារឱ្យមានការប្រើប្រាស់បច្ចេកវិទ្យាទំនើប ៕

អត្ថបទ៖ បាន សុខរិទ្ធិ