ភ្នំពេញ៖ ជាថ្មីម្តងទៀត គ្រូពេទ្យសហភាពសហព័ន្ធយុវជនកម្ពុជា ប្រចាំមន្ទីរពេទ្យកុមារជាតិ នៅ​ថ្ងៃទី២៦ខែកក្កដានេះ ប្តេជ្ញាចុះជួយព្យាបាលជំងឺពលរដ្ឋនៅតាមសហគមន៍ បន្ទាប់ពីទំនេរ​ពីការងារ​នៅមន្ទីរពេទ្យកុមារជាតិ។

ការប្តេជ្ញានេះ ធ្វើឡើងក្នុងពិធីប្រកាសទទួលស្គាល់សមាសភាពសម្ព័ន្ធគ្រូពេទ្យស.ស.យ.ក ២៩៧នាក់ ប្រចាំមន្ទីរពេទ្យកុមារជាតិ។

សម្ព័ន្ធគ្រូពេទ្យសហភាពសហព័ន្ធយុវជនកម្ពុជា ដែលហៅកាត់ (សម្ព័ន្ធគ្រូពេទ្យស.ស.យ.ក) នៅ​ថ្ងៃទី២៦ ខែកក្កដា ឆ្នាំ ២០២២ នេះ បានរៀបចំពិធីប្រកាសទទួលស្គាល់សមាសភាព​សម្ព័ន្ធ​គ្រូពេទ្យ​ស.ស.យ.ក ចំនួន ២៩៧នាក់ ប្រចាំមន្ទីរពេទ្យកុមារជាតិ។ ពិធីនេះប្រព្រឹត្តទៅ នៅសាលប្រជុំនៃមន្ទីរពេទ្យកុមារជាតិ ក្រោមអធិបតីភាពដ៏ខ្ពង់ខ្ពស់លោកជំទាវ យឹម ឆៃលីន ហ៊ុន ម៉ានី ប្រធានកិត្តិយសសម្ព័ន្ធគ្រូពេទ្យស.ស.យ.ក ។

នៅក្នុងឱកាសខាងលើនោះ​ឯកឧត្តមវេជ្ជបណ្ឌិត ញឹប អង្គារបុស្ស ប្រធានកិត្តិយសសម្ព័ន្ធ​គ្រូពេទ្យ​ស.ស.យ.កសាខាមន្ទីរពេទ្យកុមារជាតិ​ បានបង្ហាញក្តីរំភើបរីករាយដែលបានចូលរួមការងារសង្គមជា មួយ​សម្ព័ន្ធគ្រូពេទ្យស.ស.យ.ក ក្នុងចុះជួយព្យាលបាលជំងឺជូន​ពលរដ្ឋនៅតាមសហគមន៍។

ឯកឧត្តមបណ្ឌិត ហេង សុខគង់ ប្រធានសម្ព័ន្ធគ្រូពេទ្យស.ស.យ.ក ការប្រកាស​ទទួល​ស្គាល់​សមាសភាព​សម្ព័ន្ធគ្រូពេទ្យស.ស.យ.ក ​ប្រចាំមន្ទីរពេទ្យកុមារជាតិ មានសារៈសំខាន់ណាស់​ក្នុង​ពង្រឹង​រចនាសម្ព័ន្ធ និងបង្កើនសមត្ថភាពនៃសម្ព័ន្ធគ្រូពេទ្យស.ស.យ.ក ចុះពិនិត្យព្យាបាលជំងឺជូន​ពលរដ្ឋ​ដោយឥតគិតថ្លៃនៅទូទាំងប្រទេស ​ជាពិសេសជំងឺពាក់ព័ន្ធនឹងកុមារ។​ក្រៅពីនេះ ឯកឧត្តម បានលើកឡើងពីការងាររបស់សម្ព័ន្ធគ្រូពេទ្យស.ស.យ.ក នាពេលបច្ចុប្បន្នផងដែរ។

សម្ព័ន្ធគ្រូពេទ្យស.ស.យ.ក ត្រូវបានបង្កើតឡើងនៅថ្ងៃទី២ ខែធ្នូ ឆ្នាំ២០១៤ ក្រោមគំនិត​ផ្តួចផ្តើម​ដ៏ខ្ពង់ខ្ពស់របស់ឯកឧត្តម ហ៊ុន ម៉ានី ប្រធានស.ស.យ.ក​ និងលោកជំទាវ យឹម ឆលីនហ៊ុន ម៉ានី ប្រធានកិត្តិយសសម្ព័ន្ធគ្រូពេទ្យស.ស.យ.ក។ រហូតមកដល់បច្ចុប្បន្ននេះ ​សម្ព័ន្ធគ្រូពេទ្យស.ស.យ.ក មានសមាជិក​ចំនួន៦,៨៣៦នាក់ នឹងត្រៀមបញ្ចូល​ចំនួន ​៤,៥៧៩នាក់ទៀត ដែលចំនួនសរុប​នឹងកើន​ដល់ជាង ១ម៉ឺននាក់ ក្នុងនោះមានក្រុមការងារជំនាញតាមប្រភេទជំងឺ​ ចំនួន១៨ក្រុម ក្រុមការងារ​ទ្រទ្រង់​ចំនួន ១០ក្រុម សាខាតាមមន្ទីរពេទ្យចំនួន៨ ​សាខាតាមបណ្តសាកលវិទ្យាល័យនានា​ចំនួន១២ ​និងសាខាតាមបណ្តារាជធានី-ខេត្តចំនួន២៥ ៕ អត្ថបទ៖ទូច សោភ័ណ