ភ្នំពេញ៖ ឯកឧត្តម ម៉ម ប៊ុនហេង រដ្ឋមន្រី្តក្រសួងសុខាភិបាល បានអំពាវនាវប្រជាពលរដ្ឋគ្រប់រូប បង្កើនការប្រុងប្រយ័ត្នខ្ពស់ ចំពោះជំងឺឆ្លងប្រភេទថ្មី អុតស្វា(Monkeypox)។

ការថ្លែងរបស់ឯកឧត្តម សាស្រ្តាចារ្យ ម៉ម ប៊ុនហេង រដ្ឋមន្រី្តក្រសួងសុខាភិបាល ប្រាប់BTV ព័ត៌មាន យ៉ាងដូច្នេះនាឱកាសដឹកនាំក្រុមការងារគ្រូពេទ្យស្ម័គ្រចិត្តចុះពិនិត្យ និងព្យាបាលជំងឺជូនប្រជាពលរដ្ឋ ដោយឥតគិតថ្លៃ និងចាក់វ៉ាក់សាំងបង្ការជំងឺកូវីដ-១៩ ដូសមូលដ្ឋាន និងដូសជំរុញ ជូនប្រជាពលរដ្ឋក្នុងសង្កាត់គោកឃ្លាង ខណ្ឌសែនសុខ រាជធានីភ្នំពេញ នាព្រឹកថ្ងៃទី២៧ ខែកក្កដា ឆ្នាំ២០២២នេះ។

ឯកឧត្តម រដ្ឋមន្រ្តី បានធ្វើចំណាប់អារម្មណ៍ជូនចំពោះប្រជាពលរដ្ឋទាំងអស់អំពីជំងឺអុតស្វានេះ ពិតតែថា​វាមានតិច ហើយក្នុងប្រទេសកម្ពុជា ទើបតែរកឃើញមួយករណី ហើយអ្នកប៉ះពាល់ផ្ទាល់​ជាមួយបុរសជនជាតិនីហ្សេរីយ៉ាចំនួន០៥នាក់​ ក្រុមការងារគ្រូពេទ្យជំនាញ បានធ្វើរោគវិនិច្ឆ័យ​មក​ដល់ពេលនេះ ក៏អត់ឃើញមានចេញរោគសញ្ញាជំងឺអុតស្វា ផងដែរ។ ដូច្នេះយើងត្រូវនៅ​តាមដាន​ចំនួន ២១ថ្ងៃបន្ថែមទៀត។

ឯកឧត្តមសាស្រ្តាចារ្យ ម៉ម ប៊ុនហេង បានបញ្ជាក់ទៀតថា ​ជានិច្ចកាលថ្នាក់ដឹកនាំ មន្រ្តីរាជការ បុគ្គលិក​សុខាភិបាល ខិតខំធ្វើយ៉ាងណាថែទាំសុខភាពរបស់បងប្អូនប្រជាពលរដ្ឋ ដើម្បីឲ្យបងប្អូន​ប្រជាពលរដ្ឋ​មានសុខភាពល្អ ​បើយើងគ្មានសុខភាពល្អនោះទេ គឺមិនអាចធ្វើអ្វីៗបាននោះទេ៕ អត្ថបទ រដ្ឋា