បាល់ទាត់៖ ក្រុម ស.ស.យ.ក ខេត្តបាត់ដំបង និងក្រុមសូហ្វីយ៉ាប៉ៃលិនបានត្រឹមចែកគ្នា ១ពិន្ទុម្នាក់ប៉ុណ្ណោះ បន្ទាប់ពីបញ្ចប់ការប្រកួត ៩០នាទីដោយលទ្ធផលស្មើគ្នា ១-១ ក្នុងជំនួបជើងទី២ នៃពានរង្វាន់សម្ដេចតេជោ ហ៊ុន សែន លើកទី១៥ (ថ្នាក់ខេត្ត) ឆ្នាំ២០២១ នៅទីលានវិទ្យាល័យនេតយ៉ង់ កាលពីល្ងាចថ្ងៃទី៣១ ខែមីនាម្សិលមិញ។
ជំនួបដ៏សំខាន់ក្នុងពូល B នេះ វគ្គទី១ ក្រុមទាំងពីរមិនអាចបំប៉ោងសំណាញ់ទីគ្នាបានឡើយ រហូតដល់នាទី៦១ ទើបខេត្តបាត់ដំបងរកបានគ្រាប់នាំមុខ ១គ្រាប់មុន ដែលធ្វើសម្រេចដោយកីឡាករ ថា គ្រីយ៉ា។ ប៉ុន្ដែ ៦នាទីក្រោយមក ក្រុមសូហ្វីយ៉ាប៉ៃលិនតាមស្មើវិញ ១-១ បន្ទាប់ពីកីឡាករ ញឹក សុភារ៉ា តែតបាល់លើពីជ្រុងដោយមិត្តរួមក្រុម ហើយខ្សែការពារបាត់ដំបងកីឡាករ ឈៀង មករា ព្យាយាមតែងរារាំង តែបាល់នោះផ្លាតចូលទីខ្លួនឯងនៅនាទី៦៧។ បន្ទាប់ពីមានគ្រាប់តាមស្មើគ្នាហើយ ក្រុមទាំងពីរបានបង្កើនការវាយសម្រុកគ្នាកាន់តែខ្លាំង តែមិនមានក្រុមណាអាចបន្ថែមគ្រាប់បាល់ទៀតឡើយ មុនអាជ្ញាកណ្ដាលផ្លុំកញ្ចែបញ្ចប់ការប្រកួត ដែលនាំឲ្យក្រុមទាំងពីរបានត្រឹមចែកគ្នា ១ពិន្ទុម្នាក់ ផ្ទុយកាលពីជួបគ្នាជើងទី១ ដែលក្រុម ស.ស.យ.ក ខេត្តបាត់ដំបង បានយកឈ្នះក្រុមសូហ្វីយ៉ាប៉ៃលិនរហូតដល់ទៅ ៤-១ ឯណោះ។
តាមរយៈលទ្ធផលនេះដែរ បានធ្វើឲ្យក្រុមសូហ្វីប៉ៃលិនបន្ដឈរលេខរៀងទី២ បណ្ដោះអាសន្ន និងមាន ៨ពិន្ទុបន្ទាប់ពីឆ្លងកាត់ ៥ប្រកួតឈ្ន ២ ស្មើ២ និងចាញ់១ ខណៈក្រុម ស.ស.យ.ក ខេត្តបាត់ដំបងឈរលេខរៀងទី៣ និងមាន ៧ពិន្ទុជាមួយលទ្ធផល ៥ប្រកួតដូចគ្នា ឈ្នះ២ ស្មើ១ និងចាញ់២ តាមពីក្រោយក្រុមកំពូលតារាងខេត្តបន្ទាយមានជ័យ ដែលមាន ១០ពិន្ទុ និងមានសង្ឃឹមខ្ពស់ក្នុងការបន្ដដំណើរទៅវគ្គ ១៦ក្រុមចុងក្រោយ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
