ភ្នំពេញ៖ បន្ទាប់ពីក្រសួងសុខាភិបាល ប្រកាសកើតមានករណីឆ្លងជំងឺអុតស្វា ជាពិសេស​បន្ទាប់​ពីទទួលដំណឹងថា មានបុរសជនជាតិនីហ្សេរីយ៉ាម្នាក់កើតជំងឺអុតស្វានៅប្រទេសថៃ រត់ឆ្លងចូលដីកម្ពុជាមក រហូតមកដល់ពេល បណ្តាអាជីវករលក់ដូរនៅផ្សា​រ និងពលរដ្ឋនានាទៀត ចាប់ផ្តើមបង្កើនការប្រុងប្រយ័ត្នការពារខ្លួនពីជំងឺអុតស្វា តាមការណែនាំរបស់ក្រសួងសុខាភិបាល។

បណ្តាអាជីវករ និងពលរដ្ឋនៅរាជធានីភ្នំពេញ បានថ្លែងប្រាប់BTVនៅថ្ងៃទី២៧ ខែកក្តដានេះថា នៅពេលនេះ ពលរដ្ឋម្នាក់ៗសុទ្ធតែទទួលសារណែនាំពីក្រសួងសុខាភិបាលរួចហើយ អំពីការ​ប្រុងប្រយ័ត្ននិងការពារខ្លួនពីការឆ្លងជំងឺអុតស្វា ។ ​បន្ទាប់ពីទទួលសារអប់រំណែនាំនេះ សំគាល់​ឃើញថា បណ្តាពលរដ្ឋមានចំនួន​ មានការពង្រឹងវិធានការការពារខ្លួនជំងឺពីអុតស្វានេះផង ជំងឺកូវីដផង​ ដោយមានការចៀសវាងការប៉ះពាល់ស្បែក ប៉ះពាល់ផ្ទាល់លើអ្នកសង្ស័យ​មានរោគ​សញ្ញា​អុតស្វា ​ឧស្សាហ៍លាងដៃ ​លាងវត្ថុរបស់​ប្រើប្រាស់​ញឹកញាប់​ និង​ត្រូវពាក់ម៉ាស​ ពាក់ស្រោមដៃ ត្រឹមត្រូវ​នៅពេលចាប់របស់របរនានា ​ជាពិសេសប្រញាប់ទៅទទួលការប្រឹក្សាពីក្រុមពេទ្យ​នៅពេល​កើតរមាស់ ​ពងបែកលើដៃជាដើម។

អនុវត្តតាមការណែនាំក្រសួងសុខាភិបាល ​នៅពេលនេះ​ គ្លីនិច​ឯកជនព្យាបាលរោគសើរស្បែក​នានា​នៅរាជធានីភ្នំពេញ ​គឺមិនទទួលព្យាបាលអ្នកជំងឺអុតស្វា ​ដែលមានរោគសើរស្បែកដំបៅពងបែកទឹក​នៅលើខ្លួនប្រាណនោះទេ ។

លោកស្រីវេជ្ជបណ្ឌិត យូ ម៉ូលីនតំណាង គ្លីនិចឯកជនព្យាបាលរោគសើរស្បែក ​បានថ្លែងថា ជារួម នៅពេលក្រសួងសុខាភិបាលប្រកាសកើតមានឆ្លងជំងឺអុតស្វានេះ ​សំគាល់ឃើញថា គ្លីនិច​ព្យាបាល​រោគ​សើរស្បែកលោកស្រី ​មានពលរដ្ឋដែលមានអាការៈរមាស់រោគសើរស្បែក បាន​មកសាក​សួររ​កការព្យាបាលច្រើន ​ប៉ុន្តែ​សម្រាប់អ្នកមានអាការៈគ្រុនក្តៅ ​និង​ពងបែកលើដៃជាដើម គឺយើង​បាន​ណែនាំ​គេស្វែងរកការប្រឹក្សាជាមួយលេខទូរស័ព្ទ ១១៥ និងអញ្ជើញទៅរកការព្យាបាលនៅមន្ទីរពេទ្យ​មិត្តខ្មែរសូវៀតជាដើម។

លោកជំទាវ ឱ វណ្ណឌីន រដ្ឋលេខាធិការ ​និងជាអ្នកពាក្យក្រសួងសុខាភិបាលថ្លែងថា សម្រាប់​ពលរដ្ឋ​បើមានករណីសង្ស័យដូចជា​ កើតរោគរមាស់ចេញដំបៅពងទឹកនៅលើដៃ ​ខ្លួនប្រាណ​ ជើង និងមាន​កំដៅលើពី ​៣៨.៥អង្សាឡើងទៅ​ ហើយមានឈឺសាច់ដុំ ​ហើមកូនកណ្តុរ​ អស់កម្លាំងខ្លាំងជាដើម គឺសូមស្វែងរក​ពិនិត្យពិគ្រោះជំងឺ​ ជាមួយក្រុមគ្រូពេទ្យ​ ឬទូរស័ព្ទលើ១១៥ ដើម្បីស្វែងរកជួយគាំទ្រ​ព្យាបាល​ឲ្យទាន់ពេលវេលា​ ហើយសំខាន់នៅពេលសង្ស័យកើត​ ឬកើតជំងឺអុតស្វានេះ គឺត្រូវបាននៅដាច់ដោយឡែកពីគេ ​ ខណៈការឆ្លងជំងឺអុតស្វានេះ អាត្រា១០%គឺអាចបង្កអ្នក​ជំងឺស្លាប់បាន៕ អត្ថបទ៖ ស៊ុម សុខជា