ភ្នំពេញ៖ ករណីឆ្លងកូវីដ-១៩ ត្រូវបានរកឃើញជារៀងរាល់ថ្ងៃ ចាប់តាំងពីថ្ងៃទី ២៨ ខែមិថុនា​មកម្លេះ។ ​ទោះរកឃើញករណីឆ្លងរៀងរាល់ថ្ងៃក្ដី តែមិនមានករណីបាត់បង់ជីវិតដោយសារ​កូវីដ-១៩ ទៀតនោះទេ។ ​សម្រាប់ក្របខណ្ឌរាជធានីភ្នំពេញ​ គិតត្រឹមថ្ងៃនេះ ​គឺមានអ្នកជំងឺចំនួន ៤នាក់​ប៉ុណ្ណោះ ដែលកំពុងសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត។ នេះជាជាការបញ្ជាក់ប្រធានមន្ទីរសុខាភិបាលរាជធានីភ្នំពេញ។

គិតត្រឹមពេលនេះ គឺមានរយ:ពេលប្រមាណ ១ខែហើយ ដែលកម្ពុជា មានការរកឃើញករណី​ឆ្លង​កូវីដ-១៩ ជាថ្មី ដោយការរកឃើញករណីឆ្លងជាថ្មីនោះចាប់ផ្ដើមតាំង​ពីថ្ងៃទី ២៨​ ខែកក្កដា​មក​ម្ល៉េះ។ ការរកឃើញជាថ្មីនេះ​ គឺស្ថិតក្នុងរង្វង់ជាង១០ករណីឆ្លងរៀងរាល់ថ្ងៃ បើផ្អែកលើសេចក្ដីជូន​ដំណឹង​ប្រចាំថ្ងៃ​ របស់ក្រសួងសុខាភិបាល ​ដែលលទ្ធផលបញ្ជាក់ពី ម៉ាស៊ីន PCR។

សម្រាប់ក្របខណ្ឌរាជធានីភ្នំពេញ​ គិតត្រឹមពេលបច្ចុប្បន្ន ​ពុំមានការបញ្ជាក់ច្បាស់ថា មានអ្នក​ជំងឺ​ចំនួន​ប៉ុន្មានបានឆ្លងនោះទេ។ ​យ៉ាងណាម៉ិញ​លោកវេជ្ជបណ្ឌិត ងី ​មានហេង ប្រធានមន្ទីរសុខា​ភិបាល​រាជធានីភ្នំពេញ​ អះអាងថា គិតត្រឹមថ្ងៃនេះ ​គឺ​មានអ្នកជំងឺកូវីដ-១៩ ​ចំនួន ៤នាក់ប៉ុណ្ណោះ កំពុង​សម្រាកព្យាបាល​នៅមន្ទីរពេទ្យមិត្តភាពខ្មែរ-សូវៀត​។

ចំពោះស្ថានភាពអ្នកជំងឺកូវីដ-១៩ ទាំង៤នាក់ ​ដែលសម្រាកព្យាបាលនៅមន្ទីរពេទ្យនេះ គឺមាន​ស្ថានភាពមធ្យម​ ដោយបំពាក់ឧបករណ៍អុកស៊ីសែន​ តិចតួច។ ​តែពុំមែនជាស្ថានភាពធ្ងន់ធ្ងរនោះទេ។ នេះជាការបញ្ជាក់ថែម ​របស់លោកវេជ្ជបណ្ឌិត ​ប្រធានមន្ទីរសុខាភិបាល។

ពាក់ព័ន្ធនឹងអ្នកជំងឺដែលមានស្ថានភាពកម្រិតស្រាល ​រឺគ្មានរោគសញ្ញា គឺអាចធ្វើការព្យាបាល​នៅ​ផ្ទះដោយខ្លួនឯងបាន​ នេះបើតាមសេចក្ដីណែនាំកន្លងទៅរបស់ក្រសួងសុខាភិបាល។ ការព្យាបាលនេះ ​គឺត្រូវធ្វើតេស្តរហ័សនៅថ្ងៃទី៧ ​ក្រោយ​គ្មាន​រោគសញ្ញារយៈពេល ៣ថ្ងៃជាប់គ្នា គឺថ្ងៃទី៥ ថ្ងៃទី៦ និងថ្ងៃទី៧។

ករណីបង្ហាញថា អវិជ្ជមាន គឺអាចបញ្ចប់ការព្យាបាល។ ករណីរកឃើញថាវិជ្ជមាន គឺត្រូវធ្វើ​តេស្ត​រហ័ស​​ម្ដងទៀត ក្នុង​គម្លាត ៤៨ម៉ោងពីគ្នា ​រហូតទទួលបានលទ្ធផលអវិជ្ជមាន។ ចំពោះបុគ្គលដែលបានចាក់វ៉ាក់សាំងពេញលេញ​ ពុំ​តម្រូវ​អោយធ្វើ​ចត្តា​ឡីស័ក​ ក្រោយ​បញ្ចប់​ការ​ព្យាបាលនោះទេ ​រីឯបុគ្គលដែលពុំ​បានចាក់​វ៉ាក់សាំង​ពេញលេញ​ ត្រូវបន្តធ្វើចត្តាឡីស័ក ​រយៈពេល ៧ថ្ងៃ ​ក្រោយបញ្ចប់ការព្យាបាលនៅផ្ទះ៕ អត្ថបទ៖ គឹមហុក