ស្វាយរៀង៖ មន្ត្រីជួរមុខ ពលរដ្ឋ និងកម្មករនៅក្រុងបាវិត ខេត្តស្វាយរៀងជាង ៧០ភាគរយ បានចាក់វ៉ាក់សាំង ចាប់ពីដូសទី៣ឡើងទៅ ខណៈជាង ៩០ភាគរយហើយ បានចាក់វ៉ាក់សាំងដូសមូលដ្ឋាន។

លោកវេជ្ជបណ្ឌិត សូ សុខណារី ប្រធានការិយាល័យសុខាភិបាលស្រុកប្រតិបត្តិជីភូ ក្រុងបាវិត ខេត្តស្វាយរៀង បានប្រាប់ថា ​បើទោះជាភាគរយនៃប្រជាពលរដ្ឋ ​បានចាក់វ៉ាក់សាំងមានកំណើនក្ដី តែ ក្រុមគ្រូពេទ្យ ​និងរដ្ឋបាលមូលដ្ឋាន ​នៅតែចុះធ្វើចលនាពលរដ្ឋ ដែលមិនទាន់បានចាក់វ៉ាក់សាំង​គ្រប់ដូសឱ្យទៅចាក់ ខណៈបច្ចុប្បន្ននេះ ក្រុមគ្រូពេទ្យ​ក៏បាននិងកំពុងបន្តចុះចាក់នៅតាមខ្នងផ្ទះ និងសាលារៀនផងដែរ ។

ទាក់ទងទៅនឹងស្ថានភាពសុខភាព ​លោកប្រធានស្រុកប្រតិបត្តិ ​បានបញ្ជាក់បន្ថែមថា ​រហូតមក ដល់​បច្ចុប្បន្ននេះ ពលរដ្ឋដែលរស់នៅតាមមូលដ្ឋាន ពិសេសកម្មករ ​កម្មការិនី​ ដែលបម្រើការងារនៅតាម រោងចក្រសហគ្រាសនានា ​ពុំទាន់មានឆ្លងជំងឺកូវីដ១៩បំប្លែងថ្មីនោះទេ​ ខណៈដែលស្រុកប្រតិបត្តិ បាន ពង្រាយក្រុមគ្រូពេទ្យ និងថ្នាំពេទ្យ​ដើម្បីចាក់ និងទទួលការព្យាបាលជំងឺ​នៅតាមមណ្ឌល​សុខភាព ​នៅក្នុងក្រុងផងដែរ ៕ អត្ថបទ៖ ភា សារិត