​រុស្ស៊ី៖ ទីភ្នាក់ងារសារព័ត៌មាន​រុស្ស៊ី Ria Novosti បាន​ចេញ​ផ្សាយ​វីដេអូ​កាលពី​ថ្ងៃ​អង្គារ ដែល​បង្ហាញ​ពី​អគ្គិភ័យ​នៅ​ឃ្លាំង​ស្តុក​ប្រេង​មួយ​កន្លែង​ក្នុង​ទីក្រុង Donetsk។ ទីភ្នាក់ងារ​និយាយ​ថា អគ្គិភ័យ​នេះ​បណ្ដាល​មកពី​ការ​បាញ់​ផ្លោង​កាលពី​ពេលយប់ ​ដោយ​កងកម្លាំង​អ៊ុយ​ក្រែ​នប្រើប្រាស់​កាំភ្លើង​ធំ​ផ្លោង M777 ផលិត​នៅ​សហរដ្ឋអាមេរិក​។

យោងតាម​ទិន្ន័យបឋម​បាន​ឲ្យ​ដឹងថា ​គ្មាន​អ្នករងរបួស​នោះទេ​ក្នុង​ហេតុការណ៍​នេះ ហើយ​សារព័ត៌មាន​ AP មិនអាច​ផ្ទៀងផ្ទាត់​ព័ត៌មាន​នេះ​ដោយ​ឯករាជ្យ​នោះដែរ​។ ​ទូរទស្សន៍​រដ្ឋ​រុស្ស៊ី​បាន​បង្ហាញ​ពី​ការបំផ្លាញ​ដោយ​ការបាញ់​ផ្លោង​នៅ​ទីតាំង​ឃ្លាំង​ស្តុក​ប្រេង និង​ការ​បាញ់​ផ្លោង​ទៅលើ​អគារ​លំនៅឋាន​នៅ​ក្នុង​ទីក្រុង Donetsk។​ ​ទន្ទឹម​នឹង​នេះ ក្រសួងការពារជាតិ​រុស្ស៊ី​បាន​អះអាង​កាលពី​ថ្ងៃ​អង្គា​រថា ទាហាន​ស៊ីឈ្នួល​បរទេស​ជាង ៤០​នាក់​ត្រូវ​បាន​សម្លាប់​ដោយ​ការវាយប្រហារ​ដោយ​មី​ស៊ី​ល​ស៊ី​ប​គោលដៅ​សមត្ថភាព​ខ្ពស់ និង​ការ​វាយ​ប្រហារ​តាម​អាកាស​របស់​រុស្ស៊ី​នៅ​ជិត​ភូមិ Kostiantynivka ក្នុង​ក្រុង Donetsk។

​អ្នកនាំពាក្យ​ក្រសួង​ការពារជាតិ​លោក Igor Konashenkov បាន​និយាយ​នៅ​ក្នុង​សន្និសីទ​សារព័ត៌មាន​ថា ការ​វាយ​ប្រហារ​ត្រូវបាន​ចាប់ផ្តើម​ពី​ចំណុច​ ដាក់ពង្រាយ​បណ្តោះអាសន្ននៃ​អង្គភាព​ទាហាន​ស្ម័គ្រចិត្ត​បរទេស​។ ​លោក​មិនបាន​ប្រាប់​ពី​ទីតាំង​ច្បាស់លាស់​នោះ​ទេ ប៉ុន្តែ​បាន​និយាយ​ថា ការវាយប្រហារ​បាន​ធ្វើ​ឱ្យ​កង​អង្គភាព​កាំភ្លើង​ធំ​ នៃ​កងកម្លាំងប្រដាប់អាវុធ​ប្រទេស​អ៊ុយ​ក្រែ​ន​ត្រូវ​បាន​បំផ្លាញ​។ លោក Konashenkov និយាយ​ថា កងពល​នេះ​បាន​បាត់បង់​ជីវិត​ទាហាន​ជាង ៧០% និង​អាវុធ​របស់​ខ្លួន​៕

អត្ថបទ៖ ប៊ុនថន