ប៉េតង់៖ ការអូសបន្លាយនៃព្រឹត្តិការណ៍សហគមន៍ ២០កុម្ភៈ បានធ្វើឲ្យប៉ះពាល់ខ្លាំងស្ទើរគ្រប់វិស័យសូម្បីវិស័យកីឡា ជាក់ស្ដែងកីឡាប៉េតង់ដែលត្រូវបានចាត់ទុកជាខ្លាពិភពលោក ក៏សម្ដែងនូវក្ដីបារម្ភចំពោះការត្រៀមប្រជែងមេដាយ ក្នុងការប្រកួតកីឡាស៊ីហ្គេមលើកទី៣១ នៅប្រទេសវៀតណាមនាចុងឆ្នាំ២០២១ នេះដែរ។
លោក សូម៉ៃ សុខគា អគ្គលេខាធិការរងសហព័ន្ធកីឡាប៉ូល និងប៉េតង់កម្ពុជាបានឲ្យដឹងថា អំឡុងពេលរីករាលដាលខ្លាំងនៃជំងឺកូវីដ-១៩ សហព័ន្ធក៏បានរៀបចំផែនការរួចរាល់ ក្នុងការពង្រឹងសមត្ថភាពក្រុមជម្រើសជាតិ ត្រៀមការប្រកួតកីឡាស៊ីហ្គេមនៅវៀតណាមចុងឆ្នាំនេះដែរ តែក្រោយព្រឹត្តិការណ៍សហគមន៍ ២០កុម្ភៈ បានបង្ខំឲ្យសហព័ន្ធសម្រេចផ្អាកការប្រមូលផ្ដុំសិន។ លោកថា ដំបូងឡើយក្រុមជម្រើសជាតិកីឡាប៉េតង់ បានប្រមូលផ្ដុំកីឡាករ-កីឡាការិនី ដែលមានឈ្មោះត្រៀមប្រកួតស៊ីហ្គេមនៅវៀតណាម មកហ្វឹកហាត់តាំងពីខែមករា ដោយហាត់មួយថ្ងៃ ១ពេលពីថ្ងៃច័ន្ទដល់ថ្ងៃសុក្រ តែបានអាក់ខានខ្លះៗដោយសារការរីករាលដាលជំងឺកូវីដ-១៩ ពិសេសព្រឹត្តិការណ៍សហគមន៍ ២០កុម្ភៈ សហព័ន្ធក៏សម្រេចផ្អាកបណ្ដោះអាសន្នសិន ដោយរង់ចាំមើលសភាពការធូរស្បើយសិន។ ប៉ុន្តែសហព័ន្ធបានជំរុញកីឡាករ-កីឡាការិនីឲ្យពង្រឹងការហ្វឹកហាត់តាមផ្ទះ និងទីកន្លែងសុវត្ថិភាព ដែលមិនប្រឈមហានិភ័យឆ្លងជំងឺដ៏កាចសាហាវនេះ។
អគ្គលេខាធិការសហព័ន្ធដដែលបន្ថែមថា យ៉ាងណាមិញការអូសបន្លាយនៃព្រឹត្តិការណ៍សហគមន៍ ២០កុម្ភៈ បានធ្វើឲ្យសហព័ន្ធមានការបារម្ភ ក្នុងការដណ្ដើមមេដាយខ្លះដែរ។ ហេតុនេះសហព័ន្ធបានត្រៀមកីឡាករ-កីឡាការិនី ដែលធ្លាប់ដណ្ដើមមេដាយជូនជាតិ ឲ្យមកហ្វឹកហាត់ត្រៀមជាបណ្ដោះអាសន្ន ទម្រាំមានគោលការណ៍របស់ក្រសួងអប់រំ យុវជន និងកីឡា មានការប្រមូលផ្ដុំហ្វឹកហាត់ឡើងវិញ ដែលការហ្វឹកហាត់សហព័ន្ធបានរៀបចំ កម្មវិធីតម្រូវឲ្យហាត់ក្នុងមួយទីលានហាត់តែ ២នាក់ ដើម្បីរក្សាគម្លាតតាមការណែនាំ ខណៈពីមុន ១ទីលាន ហាត់ពី ៤នាក់ទៅ ៦នាក់ឯណោះ។ ជារួមក្រោមការដឹកនាំរបស់ឯកឧត្តម ស សុខា ប្រធានសហព័ន្ធ និងថ្នាក់ដឹកនាំផ្សេងទៀត បានយកចិត្តទុកដាក់ខ្ពស់លើសុខទុក្ខរបស់កីឡាករ-កីឡាការិនី ដែលបានធ្វើឲ្យគ្រូបង្វឹក និងកីឡាករ-កីឡាការិនីទាំងអស់មានភាពកក់ក្ដៅ និងទំនុកចិត្តក្នុងការហ្វឹកហាត់ក្នុងគ្រាដ៏លំបាកនេះ ដើម្បីរក្សា និងពង្រឹងសមត្ថភាព ត្រៀមឆ្ពោះទៅប្រជែងមេដាយស៊ីហ្គេមនៅវៀតណាមផង និងត្រៀមការប្រកួតកីឡាស៊ីហ្គេមឆ្នាំ២០២៣ នៅកម្ពុជាផង។ នេះបើតាមការបញ្ជាក់បន្ថែមរបស់លោក សូម៉ៃ សុខគា អគ្គលេខាធិការរងសហព័ន្ធកីឡាប៉ូល និងប៉េតង់កម្ពុជា។ គួរបញ្ជាក់ថា កីឡាប៉េតង់គឺជាកីឡាដ៏មានសក្ដានុពលរបស់កម្ពុជា ដែលធ្លាប់ដណ្ដើមមេដាយមាស ប្រាក់ និងសំរឹទ្ធកម្រិតតំបន់ ទ្វីប និងពិភពលោកជាច្រើន ពិសេសក្នុងការប្រកួតកីឡាស៊ីហ្គេម កីឡាករ-កីឡាការិនីប៉េតង់កម្ពុជា ពុំសូវអាក់ខានក្នុងការដណ្ដើមមេដាយមាស ឬប្រាក់ជូនជាតិនោះទេ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
