សហរដ្ឋអាមេរិក៖ ដោយសំអាងប្រភពពីក្រុមមន្ត្រីអាមេរិកដែលមិនបញ្ចេញឈ្មោះ សារព័ត៌មាន AP បានរាយការណ៍កាលពីថ្ងៃពុធថា មន្ទីរបញ្ចកោណអាចបញ្ជូននាវា យន្តហោះ និងប្រព័ន្ធឈ្លបយកការណ៍បន្ថែមទៀត ដើម្បីការពារប្រធានសភាអាមេរិកលោកស្រី Nancy Pelosi ប្រសិនបើលោកស្រីនឹងធ្វើដំណើរទស្សនកិច្ចទៅកាន់កោះតៃវ៉ាន់ តាមការគ្រោងទុកមែននោះ។
ទីភ្នាក់ងារសារព័ត៌មាននេះបាននិយាយថា ផែនការបង្ការជាមុន ដែលត្រូវបានកំពុងបង្កើតឡើងដោយយោធាអាមេរិក រួមមានការបង្កើតតំបន់ការពារទ្វេដងសម្រាប់ប្រធានសភារូបនេះ អំឡុងការធ្វើដំណើររបស់លោកស្រីទៅកាន់កោះនេះ និងការស្នាក់នៅទីនោះ។ សារព័ត៌មាន AP ដដែលបានរាយការណ៍ថា ក្រុមមន្ត្រីក៏បានលើកឡើងផងដែរ ពីភាពចាំបាច់ក្នុងការបង្កើតឲ្យមានតំបន់ទ្រនាប់ជុំវិញវត្តមាន និងយន្តហោះរបស់លោកស្រី Pelosi អំឡុងដំណើរទស្សនកិច្ចរបស់លោកស្រី ដែលជាការត្រៀមការពារសម្រាប់ឧបទ្ទវហេតុធំៗនានាពាក់ព័ន្ធនឹងប្រទេសចិន។
ទីក្រុងប៉េកាំងដែលចាត់ទុកកោះស្វ័យគ្រប់គ្រងមួយនេះ ជាផ្នែកមួយនៃដែនដីរបស់ខ្លួនបានព្រមានដដែលៗថា ដំណើរទស្សនកិច្ចរបស់លោកស្រីទៅកាន់កោះតៃវ៉ាន់ អាចបង្កើតឲ្យមានប្រតិកម្មខ្លាំង និងមានផលវិបាកដែលមិនអាចស្ដារឡើងវិញបានសម្រាប់ទំនាក់ទំនងរវាងចិន និងសហរដ្ឋអាមេរិក។ លោក Zhao Lijian អ្នកនាំពាក្យក្រសួងការបរទេសចិនបានប្រាប់ក្រុមអ្នកសារព័ត៌មានកាលពីថ្ងៃពុធថា ប្រសិនបើសហរដ្ឋអាមេរិកនៅតែធ្វើអ្វីតាមតែចិត្តខ្លួនឯង និងប្រជែងខ្សែបន្ទាត់ក្រោមរបស់ចិននោះ ពិតជានឹងជួបការឆ្លើយតបដោយកម្លាំងមិនខាន៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
