​រុស្ស៊ី៖ ក្រោយ​ការ​បញ្ជាក់​ថា ​ខ្លួន​មាន​គម្រោង​ចាក​ចេញពី​ភាពជា​ដៃគូ​នៅ​ស្ថានីយ​អវកាស​អន្តរជាតិក្រោយ​ឆ្នាំ២០២៤ ប្រធាន​សាជីវកម្ម​អវកាស​រដ្ឋ​រុស្ស៊ី Roscosmos បាន​ប្រាប់​អង្គការ NASA ថា ខ្លួនមាន​បំណង​បន្ត​នៅ​ក្នុង​កម្មវិធី​នេះ​រហូតដល់​យ៉ាងហោចណាស់​ឆ្នាំ២០២៨ នេះ​បើ​យោង​តាម​សារ​ព័ត៌មាន Reuters​។

​កម្មវិធី​អវកាស Roscosmos គ្រោង​នឹង​បន្ត​រួម​ការងារ​ជាមួយ​ស្ថានីយ​អវកាស​អន្តជាតិ រហូតដល់​ស្ថានីយ​អវកាស​ថ្មី​របស់​រុស្ស៊ី​សាង​សង់​រួច និង​ដំណើរការ​នៅ​ឆ្នាំ២០២៨ តាម​កាលកំណត់​។ ​កម្មវិធី​អវកាស Roscosmos បាន​បង្ក​ឲ្យ​មាន​ភាព​ច្របូកច្របល់​កាលពី​ម្សិលមិញ នៅ​ពេល​ប្រធាន​ទើប​តែង​តាំង​ថ្មី​របស់​ខ្លួន​លោក Yuri Borisov បាន​ប្រាប់​ប្រធានាធិបតី​រុស្ស៊ី​លោក Vladimir Putin ថា​ ការ​សម្រេចចិត្ត​មួយ​បាន​ធ្វើឡើង​ក្នុង​ការ​ចាកចេញ​ ពី​ភាពជា​ដៃគូ​ស្ថានីយ​អវកាស​អន្តរជាតិក្រោយ​ឆ្នាំ២០២៤​។

​ទោះយ៉ាងណា​ក៏ដោយសេចក្ដីថ្លែងការណ៍​នេះ​មិន​ច្បាស់លាស់ និង​ពុំបាន​បញ្ជាក់​ថា ​នៅ​ពេល​ណា​កម្មវិធី​អវកាស ​Roscosmos គ្រោង​នឹង​ចាកចេញ​នៅ​ឆ្នាំ២០២៤ គ្រាន់តែ​និយាយ​ថា ​រុស្ស៊ី​សង្ឃឹមថា​នឹង​ផ្ដោត​ទៅ​លើ​ស្ថានីយ​អវកាស​ថ្មី ដែល​ខ្លួន​កំពុង​សាងសង់​ហៅថា ជា​ស្ថានីយ​ផ្ដល់​សេវា​គន្លង​តារាវិថី​របស់​រុស្ស៊ី​ (ROSS)។ ​មន្ត្រី​អង្គការ NASA ម្នាក់​បាន​អះអាង​ថា ទីភ្នាក់ងារ​នេះ​ពុំ​ទទួល​បាន​ការ​បញ្ជាក់​ជា​ផ្លូវការ​ណាមួយ​ពី​កម្មវិធី​អវកាស Roscosmos ខណៈ​ដែល​ប្រធាន​រដ្ឋបាល NASA លោក Bill Nelson បាន​និយាយ​នៅ​ក្នុង​សេចក្ដីថ្លែងការណ៍​ថា ទីភ្នាក់ងារ​នេះ​ពុំបាន​ដឹង​ពី​ការ​សម្រេច​ចិត្ត​ណា​មួយ​ពី​បណ្ដា​ដៃគូ​ នៅ​លើ​ស្ថានីយ​អវកាស​អន្តរជាតិ​នោះ​ទេ​៕

អត្ថបទ៖ សុខមាន