ភ្នំពេញ៖ រដ្ឋមន្ត្រីក្រសួងយុត្តិធម៌ ឯកឧត្តម កើត រិទ្ធ បានថ្លែងអះអាងថា ការធ្វើវិសោធនកម្មច្បាប់​លើកទី១០ គឺមិនបានធ្វើឲ្យប៉ះពាល់​សិទ្ធអំណាច​របស់តំណាងរាស្រ្តក្នុង​របប​សម្ព័ន្ធ​និយម​របស់​រដ្ឋសភា​ប៉ះពាល់​ដល់​របបរាជានិយម​អាស្រ័យ​រដ្ឋធម្មនុញ្ញ ​និងរបប​លទ្ធិប្រជាធិបតេយ្យសេរី​ពហុបក្សនោះឡើយ ​ខណៈការធ្វើនេះ គឺដើម្បីផលប្រយោជន៍រួមរបស់ប្រជាជន និងប្រទេសជាតិទាំងមូល។

ការថ្លែងរបស់រដ្ឋមន្ត្រីក្រសួងយុត្តិធម៌រូបនេះ គឺបានធ្វើឡើងនៅក្នុងកិច្ចប្រជុំរបស់រដ្ឋសភា ​លើកទី៧ នីតិកាលទី៦ដើម្បីពិភាក្សា និងអនុម័ត​សេចក្តីព្រាងច្បាប់ធម្មនុញ្ញ ស្តីពីវិសោធនកម្មមាត្រា១៩ ថ្មី (មួយ) មាត្រា៨៩ មាត្រា៩៨ ថ្មី មាត្រា១០២ ថ្មី មាត្រា១១៩ ថ្មី (មួយ) និងមាត្រា១២៥ ថ្មី នៃរដ្ឋធម្មនុញ្ញ នៃព្រះរាជាណាចក្រកម្ពុជា និងមាត្រា៣ ថ្មី និងមាត្រា៤ ថ្មី នៃច្បាប់ធម្មនុញ្ញបន្ថែម​នាថ្ងៃទី២៨ ខែកក្កដា ឆ្នាំ២០២២នេះ នោវិមានរដ្ឋភា។

ឯកឧត្តម កើត រិទ្ធ បានលើកឡើងថា ​ការធ្វើវិសោធនកម្មច្បាប់ គឺបានអនុវត្តយ៉ាងត្រឹមត្រូវ គោរព​បាន​នូវ​គោលការណ៍គ្រឹះនៃរបបរដ្ឋធម្មនុញ្ញ ​ហើយការធ្វើវិសោធនកម្មមួយចំនួនលើកទី១០នេះ គឺដើម្បីផល​ប្រយោជន៍​ប្រទេស ​និងប្រជាជនទាំងមួល ​ខណៈការមិនយល់ព្រម និងមានការរិះគន់​របស់​គណបក្សនយោបាយមួយក្តាប់តូចគឺដើម្បីតែផលប្រយោជន៍របស់គណបក្សខ្លួន និងមិនមែន​ជាមនុស្សសភានិយម។

ឯកឧត្តម បានរដ្ឋមន្រ្តីក្រសួងយុត្តិធម៌ បានបញ្ជាក់បន្ថែមទៀតថា ការលើកឡើងរបស់​គណបក្ស​មួយចំនួន​ដែលគ្មាន​សំឡេងក្នុងរដ្ឋភាទាក់ទងនឹងការធ្វើវិសោធនកម្មច្បាប់លើកទី១០នេះ ជា​ការ​លើកឡើងដោយមិនត្រឹមត្រូវ ​ជាការលើកឡើងដោយមិនយល់ដឹងច្បាស់លាស់ ទាំងមិនយល់​លើ​ខ្លឹមសារពិតប្រាកដ​ នៃដំណើរវិសោធនកម្មរដ្ឋធម្មនុញ្ញលើកនេះ និងទាំងលើប្រព័ន្ធដឹកនាំប្រទេស​តាម​របបសភានិយមជាដើមនោះ៕ អត្ថបទ៖ បាន ចក់