ភ្នំពេញ៖ លោកជំទាវ នេត្រ ភូម៉ារី បានបញ្ជាក់ថា បញ្ហាមេរោគអេដស៍ និងជំងឺអេដស៍ នៅក្នុង​ប្រទេស​កម្ពុជា​យើងនេះ បានជម្រុញឲ្យភាគីពាក់ព័ន្ធ ត្រូវយកចិត្តទុកដាក់ប្រឹងប្រែងចូលរួម​ប្រយុទ្ធ​ប្រឆាំងតាមសមត្ថកិច្ច និងលទ្ធភាពរៀងៗខ្លួន។

ការថ្លែងរបស់លោកជំទាវ នេត្រ ភូម៉ារី រដ្ឋលេខាធិការក្រសួងវប្បធម៌ និងវិចិត្រសិល្បៈ យ៉ាងដូច្នេះ ក្នុងពិធីបើកសិក្ខាសាលាស្តីពី «ចូលរួមទាំងអស់គ្នាលុបបំបាត់មេរោគអេដស៍ និងជំងឺអេដស៍» រៀបចំដោយគណៈកម្មការប្រយុទ្ធនឹងជំងឺអេដស៍ ប្រចាំក្រសួងវប្បធម៌ និងវិចិត្រសិល្បៈ នាព្រឹកថ្ងៃទី២៩ ខែកក្កដា ឆ្នាំ២០២២នេះ។

លោកជំទាវ បានលើកឡើងទៀតថា រាជរដ្ឋាភិបាល ដែលមានអាជ្ញាធរជាតិប្រយុទ្ធនឹងជំងឺអេដស៍ ជា​អ្នក​ទទួលបន្ទុកផ្ទាល់លើសកម្មភាព​ប្រយុទ្ធ​នឹងជំងឺអេដស៍ ប៉ុន្តែតើយើងត្រូវរងចាំមើលបំណាំ​ឲ្យស្ថាប័ន​មួយនេះធ្វើតែឯកឯង​ ឬយ៉ាងណា? អត់ទេ ​យើងត្រូវរួមគ្នា ធ្វើឲ្យស្រុះគ្នាក្នុងសកម្មភាព​ប្រយុទ្ធ​នឹងជំងឺអេដស៍នេះ។

ជាមួយគ្នានោះដែរឯកឧត្តម ធៀង វណ្ណដារ៉ុង អនុរដ្ឋលេខាធិការ និងជាប្រធាន​គណៈកម្មាធិការ​ប្រយុទ្ធ​នឹងជំងឺអេដស៍​ ក្រសួងវប្បធម៌ ​និងវិចិត្រសិល្បៈ ​បានមាន​ប្រសាសន៍ថា ឆ្នាំនេះជាលើកទី​៤ហើយ ​ដែលគណៈកម្មាធិការបានរៀបចំសិក្ខាសាលានេះឡើង ដើម្បីធ្វើការផ្សព្វផ្សាយ​សកម្មភាព​ទូលំទូលាយ​ និងពហុវិស័យឆ្លើយតប​ចំពោះការឆ្លង​មេរោគអេដស៍ ​និងជំងឺអេដស៍ ដែលយើងលើក​យកប្រធានបទមួយមានខ្លឹមសារ​ «ចូលរួមទាំងអស់គ្នាលុបបំបាត់មេរោគអេដស៍ នឹងជំងឺអេដស៍»។ អាជ្ញាធរជាតិប្រយុទ្ធនឹងជំងឺអេដស៍ ក្រោមការដឹកនាំ​ណែនាំ​ដ៏ខ្ពង់ខ្ពស់ពីសម្តេចអគ្គមហា​សេនា​បតី​តេជោ ហ៊ុន សែន​ នាយករដ្ឋមន្រ្តី ​នៃព្រះរាជាណាចក្រកម្ពុជា បានប្តេជ្ញាចិត្តក្នុងការបញ្ចប់ជំងឺអេដស៍​ត្រឹមឆ្នាំ២០២៥ ដែលមានអត្ថន័យថា ជំងឺអេដស៍​លែងក្លាយ​ជាគ្រោះគំរាមកំហែងសម្រាប់​ប្រជាជនកម្ពុជា​តទៅទៀតហើយ។

អាស្រ័យហេតុនេះអាជ្ញាធរជាតិប្រយុទ្ធនឹងជំងឺអេដស៍ រួមជាមួយនិងក្រសួង ស្ថាប័ន រាជធានី-ខេត្តទាំងអស់ រួមទាំងក្រសួងវប្បធម៌ និងវិចិត្រសិល្បៈ ​ត្រូវរួមគ្នាជាធ្លុងមួយក្រោម​គោលការណ៍​បី«១» និងយុទ្ធសាស្រ្តទ្វេគុណ ​ដើម្បីពន្លឿននូវការបង្ការ ​ព្យាបាល ​និងគាំទ្រ​ទៅដល់ភូមិសាស្រ្ត និង​ក្រុមគោលដៅបានទាំងស្រុង ​និងគ្រប់ជ្រុងជ្រោយ​ដោយមិនទុកនរណាម្នាក់ឲ្យនៅឯការឡើយ៕

អត្ថបទ រដ្ឋា