ភ្នំពេញ៖ កម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះ ក្នុងអំឡុងពេលប្រយុទ្ធ​នឹង​ជំងឺកូវីដ-១៩​ បានផ្តល់ផលវិជ្ជមានជាច្រើន ​ជាពិសេសបានរួមចំណែកសម្រួល​ជីវភាពរបស់​គ្រួសារ​ក្រីក្រ និងការចូលរួមដល់កំណើនសេដ្ឋកិច្ច។

ឯកឧត្តមបណ្ឌិត ផាន់ ផល្លា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ លើកឡើងក្នុង​ពិធី​សម្ពោធ និងផ្សព្វផ្សាយរបាយការណ៍វាយតម្លៃការអនុវត្ត “កម្មវិធីឧបត្ថម្ភសាច់ប្រាក់ជូនគ្រួសារក្រីក្រ និង​ងាយរងគ្រោះក្នុងអំឡុងពេលប្រយុទ្ធនឹងជំងឺកូវីដ-១៩” នៅថ្ងៃទី ២៧ ខែកក្កដា ឆ្នាំ ២០២២ នេះថា ​ កម្មវិធី​ឧបត្ថម្ភ​សាច់ប្រាក់ជូនគ្រួសារក្រីក្រ ​និងងាយរងគ្រោះ ​ក្នុងអំឡុងពេលប្រយុទ្ធ​នឹង​ជំងឺកូវីដ-១៩ គឺជាផ្នែកមួយដ៏សំខាន់នៃអន្តរាគមន៍ ដែលបានដាក់ចេញដោយរាជរដ្ឋាភិបាលកម្ពុជា ក្រោម​ស្មារតីបុរេសកម្ម ​ដោយបានឆ្លើយតបខ្ពស់​ ក្នុងការផ្តល់កិច្ចគាំពារដល់គ្រួសារក្រីក្រ និងងាយរងគ្រោះ ។

ចំណែកលទ្ធផលនៃការវាយតម្លៃ, គឺមិនត្រឹមតែបានបង្ហាញពីប្រសិទ្ធភាព ​និងតម្លាភាព នៃការ​អនុវត្តកម្មវិធីប៉ុណ្ណោះទេ ​ថែមទាំងបានបង្ហាញឱ្យឃើញកាន់តែច្បាស់ ពីតួនាទីនៃអន្តរាគមន៍​ផ្នែក​ជំនួយសង្គម ដែលបានជួយសម្រួលជីវភាពរបស់ប្រជាពលរដ្ឋ និងបានជំរុញកំណើន​សេដ្ឋកិច្ច​ផងដែរ។

ចំពោះបច្ច័យលើផ្នែកម៉ាក្រូសេដ្ឋកិច្ចវិញ, កម្មវិធីនេះ ​បានចូលរួមដល់កំណើនសេដ្ឋកិច្ចប្រមាណ ០.៥៥% ក្នុងឆ្នាំ២០២០ និង ០.៤៥ % ក្នុងឆ្នាំ២០២១ ។​ មិនតែប៉ុណ្ណោះកម្មវិធីនេះ ក៏បានរួមចំណែក​ក្នុង​ការកាត់បន្ថយអត្រានិកម្មភាព ចំនួន ០.៥៧% ក្នុងឆ្នាំ២០២០ និង ០.៦២% ក្នុងឆ្នាំ២០២១ និង​កាត់​បន្ថយអត្រាភាពក្រីក្របានប្រមាណ ២.៧ % ក្នុងឆ្នាំ២០២០ និង ៣.៤ % ក្នុងឆ្នាំ២០២១។

លោកស្រី Sonali Dayaratne នាយិការង ​នៃកម្មវិធីអភិវឌ្ឍន៍សហប្រជាជាតិ ​បានលើកឡើងថា របាយការណ៍​វាយតម្លៃនេះ ​បានបង្ហាញអំពីភស្តុតាង ​ដែលមានលក្ខណៈវិទ្យាសាស្រ្ត ដែលជា​មូលដ្ឋាន​រឹងមាំ ​ក្នុងការគិតគូរវិនិយោគបន្ថែមលើប្រព័ន្ធគាំពារសង្គម ដែលនឹងអាចផ្តល់ការ​គាំទ្រ​យ៉ាង​មាន​ប្រសិទ្ធភាពសម្រាប់គ្រួសារក្រីក្រ​ និងងាយរងគ្រោះ​ ដែលទទួលរងនូវផលប៉ះពាល់ និងធានាថា គ្មានអ្នកណាម្នាក់ត្រូវបានបោះបង់ចោលនោះឡើយ។ ការវាយតម្លៃនេះ អនុញ្ញាត​ឱ្យយើងយល់ និងមើលឃើញកាន់តែច្បាស់អំពីប្រសិទ្ធភាព សម្រាប់គ្រួសារក្រីក្រ និងងាយរងគ្រោះ ក៏ដូចជាម៉ាក្រូសេដ្ឋកិច្ច។

ដោយឡែក លោកស្រី Benita Chudleigh លេខាទីមួយនៃស្ថានទូតអូស្ត្រាលីប្រចាំកម្ពុជា មាន​ប្រសាសន៍ថា​ ក្នុងនាមជាមិត្តរបស់កម្ពុជា ប្រទេសអូស្ត្រាលីប្តេជ្ញាសហការជាមួយដៃគូនានា ដើម្បីរិះរកវិធីលើកកម្ពស់ជីវភាពរស់នៅរបស់ប្រជាពល រដ្ឋកម្ពុជា និងសូមអបអរសាទរដល់​រាជរដ្ឋាភិបាល​កម្ពុជា​ ដែលបានប្រើប្រាស់ប្រព័ន្ធទិន្នន័យអត្តសញ្ញាណកម្មគ្រួសារក្រីក្រ (IDPoor) ដែលរដ្ឋាភិបាលអូស្ត្រាលី​បានផ្តល់ការគាំទ្រក្នុងទសវត្សរ៍កន្លងមកនេះ ដើម្បីកំណត់អត្តសញ្ញាណ​ប្រជាជនដែលជួបការខ្វះខាតបំផុត ​ធ្វើជាក្រុមគោលដៅនៃកម្មវិធីឧបត្ថម្ភសាច់ប្រាក់នេះ។

សូមបញ្ជាក់ថា កម្មវិធីឧបត្ថម្ភសាច់ប្រាក់ជូនគ្រួសារក្រីក្រ ​និងងាយរងគ្រោះ បានដាក់ឱ្យដំណើរ​ការ​កាលពីថ្ងៃទី ២៤ ខែ មិថុនា ឆ្នាំ២០២០ ដោយកម្មវិធីនេះមានគោលបំណងផ្តល់ការគាំទ្រ និង​សម្រួល​ជីវភាពគ្រួសារក្រីក្រ​ និងងាយរងគ្រោះដែលមានបណ្ណសមធម៌ប្រមាណជាង ៦៨ ​ម៉ឺនគ្រួសារ ដោយបានអនុវត្តបានរយៈពេលចំនួន ២៥ ខែកន្លងមក និងចំណាយថវិកាសរុបប្រមាណ ៧៤៤ លានដុល្លារ ៕ អត្ថបទ៖ សុន រ៉ាឌី