ភ្នំពេញ៖ ព្រឹត្តិការណ៍ដ៏វិសេសវិសាលរបស់ក្រុមហ៊ុនអ៊ិនធើ-ម៉ាទ្រីដ បេវើរិច (ខេមបូឌា) បានចូលរួមចំណែកជំរុញពិពិធកម្ម និងពង្រឹងផលិ តកម្មក្នុងស្រុក និងបានបង្ហាញឱ្យឃើញអំពីសក្តានុពលនៃវិស័យវិនិយោគនៅកម្ពុជា បានការបោះជំហានទៅមុខ នៃការកែប្រែ និងធ្វើទំនើបកម្មរចនាសម្ព័ន្ធឧស្សាហកម្មកម្ពុជា ពីឧស្សាហកម្មអតិពលកម្ម ឈានទៅជាឧស្សាហកម្មផ្អែកលើជំនាញ និងបច្ចេកវិទ្យា។

ឯកឧត្តមឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងទ័ពជើងគោក ក្នុងកម្មវីធីសម្ពោធជាផ្លូវការ រោងចក្រផលិតស្រាបៀអ៊ិនធើ-ម៉ាទ្រីដ បេវើរិច (ខេមបូឌា) នៅភូមិ ស្តៅកន្លែង២ ឃុំដីឥដ្ឋ ស្រុកកៀនស្វាយ ខេត្តកណ្តាល, ថ្ងៃទី ២៨ ខែកក្កដា ឆ្នាំ២០២២ ឯកឧត្តម បានសម្តែងនូវការអបអរសាទរ ចំពោះព្រឹត្តិការណ៍​ដ៏វិសេសវិសាល​របស់ក្រុមហ៊ុនអ៊ិនធើ-ម៉ាទ្រីដ បេវើរិច (ខេមបូឌា) ដែលជាការចូលរួមចំណែកជំរុញពិពិធកម្ម និងពង្រឹងផលិតកម្មក្នុងស្រុក ​ដោយអាចបង្កើតការងារបានរហូតដល់ទៅ ៥៥០ កន្លែង នៅក្នុង​រោងចក្រផ្ទាល់ ក៏ដូចជាការចូលរួមចំណែកបង្កើនចំណូលពន្ធរបស់រដ្ឋ ​និងលើកស្ទួយវិស័យកសិកម្ម, កសិ-ឧស្សាហកម្ម និងវិស័យពាក់ព័ន្ធផ្សេងទៀតនៅកម្ពុជា។

ឯកឧត្តម បន្តថា ព្រឹត្តិការណ៍នេះ បានបង្ហាញឱ្យឃើញអំពីសក្តានុពលនៃវិស័យវិនិយោគនៅកម្ពុជា ហើយក៏ជាការគាំទ្រដល់ការបោះជំហានទៅមុខ ​នៃចក្ខុវិស័យក្នុងការជំរុញកែប្រែ និងធ្វើទំនើបកម្ម​រចនា​សម្ព័ន្ធឧស្សាហកម្មកម្ពុជាពី ”ឧស្សាហកម្មអតិពលកម្ម“ ឈានទៅជា “ឧស្សាហកម្មផ្អែក​លើ​ជំនាញ និងបច្ចេកវិទ្យា” ដូចមានកំណត់នៅក្នុងគោលនយោបាយអភិវឌ្ឍន៍​វិស័យឧស្សាហកម្មឆ្នាំ២០១៥-២០២៥ របស់រាជរដ្ឋាភិបាល។

ថ្លែងស្វាគមន៍ក្នុងពិធីនេះ, លោកជំទាវ ឧកញ៉ា សុខ សុភាព អគ្គនាយិកាក្រុមហ៊ុនអ៊ិនធើ-ម៉ាទ្រីដ បេវើរីច (ខេមបូឌា) លើកឡើងឲ្យដឹងថា ក្រុមហ៊ុនក្រុមហ៊ុនអ៊ិនធើ-ម៉ាទ្រីដ បេវើរីច បាន​បង្កើត​ឡើងដោយវិនិយោគិនខ្មែរ ១០០% ក្រោមទំហំវិនិយោគសរុបចំនួន ៧៨ លានដុល្លាអាមេរិក។ រោងចក្រដ៏ធំអស្ចារ្យមួយនេះ ចាប់ផ្ដើមសាងសង់កាលពីខែកក្កដា ឆ្នាំ២០២០ លើផ្ទៃដី ១៥ ហិចតា និងមានសមត្ថភាពផលិតស្រាបៀរបានចំនួន ៥០ ម៉ឺនហិចតូលីត្រ ឬស្មើរនឹង ៦,៥ លានកេស ក្នុងមួយឆ្នាំៗ ។

រោងចក្រសា្របៀរ របស់ក្រុមហ៊ុនអ៊ិនធើ-ម៉ាទ្រីដ បេវើរីច (ខេមបូឌា) ដ៏ធំ និងទំនើបនេះ ត្រូវបាន​បំពាក់​ដោយម៉ាស៊ីនផលិតស្រាបៀរបច្ចេកវិទ្យាទំនើបចុងក្រោយបំផុតពីអឺរ៉ុប ដែលជាប្រទេស​មាន​ភាព​ល្បីល្បាញ ​លើវិស័យផលិតស្រាបៀរលំដាប់ពិភពលោក៕អត្ថបទ៖ សុន រ៉ាឌី