​​អូឡាំពិក៖ ខណៈ​ដែល​នៅសល់​ជាង ៣០០​ថ្ងៃ​ប៉ុណ្ណោះ​ ព្រឹត្តិការណ៍​កីឡា​អូឡាំពិក​រដូវរងា​ឆ្នាំ ២០២២ នឹង​ចូល​មកដល់ ​ទីក្រុង​ប៉េកាំង​ប្រទេស​ចិន​ដែល​ជា​ម្ចាស់ផ្ទះ ​បាន​ប្រកាស​ពី​ការរៀបចំ​ការប្រកួត​សាកល្បង​ជាច្រើន​ប្រភេទ​កីឡានៅ​ក្នុង​កីឡដ្ឋាន ​ដែល​នឹង​ប្រើប្រាស់​ក្នុងនាម​ជា​ម្ចាស់ផ្ទះ​នៅ​ឆ្នាំក្រោយ​។

​​កីឡដ្ឋាន​ដែល​ចិន​នឹង​ប្រើប្រាស់​ទាំង​អស់​នោះ នឹង​ត្រូវ​ចាប់ផ្ដើម​ទទួល​ការប្រកួត​សាកល្បង​ចាប់ពី​ថ្ងៃ​ព្រហស្បតិ៍​នេះ​ រហូតដល់​ថ្ងៃទី​១០ ខែ​មេសា​នេះ​។ ​អត្ត​ព​លិ​ក ៤៤៦នាក់ មន្ត្រី​ពាក់ព័ន្ធ ២៣២​នាក់នឹង​ចូល​រួម​ការប្រកួត​សាកល្បង​ទាំង​អស់​នេះ​លើ ៥​ប្រភេទ​កីឡា ៣៣​វិញ្ញាសា​នៅ​កីឡដ្ឋាន Wukesong Sport Center, National Indoor Stadium, Capital Indoor Stadium, National Aquatics Center និង​កីឡដ្ឋាន National Speed Skating Oval ដែល​ទើប​សាងសង់​រួម ដែល​មាន​មូលដ្ឋាន​នៅ​ក្នុង​ទីក្រុង​ប៉េកាំង​ទាំងអស់​។​

​​អត្ត​ព​លិ​ក​ទាំងអស់ ក៏ដូចជា​មន្ត្រី​ពាក់ព័ន្ធ​ទាំងអស់ ​សុទ្ធសឹងតែ​មក​ពី​ក្នុងស្រុក​ទាំងអស់ មិន​មាន​អ្នក​មកពី​ក្រៅ​ប្រទេស​ឡើយ​ដោយសារ​វិបត្តិ Covid-19​។ ​​ថ្វីបើ​អ្នកចូលរួម​សុទ្ធតែ​ក្នុងស្រុក​ពិតមែន វិធានការ​សុខាភិបាល​ដើម្បី​ទប់ស្កាត់​ការ​រីក​រាលដាល Covid-19 នៅតែ​ធ្វើឡើង​យ៉ាង​តឹង​រ៉ឺ​ង និង​​ការ​ធ្វើតេស្ត​សមត្ថភាព​សុខាភិបាល​ អំឡុង​ការរៀបចំ​ព្រឹត្តិការណ៍​កីឡា​ដែល​មាន​មនុស្ស​ចូលរួម​ច្រើន​បែបនេះ​ផង​ដែរ​៕

​អត្ថបទ​៖​នាង សុភា​វុ​ធ