ភ្នំពេញ៖ កម្មវិធីល្ខោនខ្មែរ គឺជាកម្មវិធីប្រឡងប្រណាំងស្នាដៃល្ខោនខ្មែរគ្រប់ទម្រង់ ដែលរៀបចំឡើង​ដោយសហភាពសហព័ន្ធយុវជនកម្ពុជាខេត្តស្វាយរៀង ហើយចំពោះរដូវកាល​ទី១នេះ គឺជាការ​ប្រកួតប្រជែង​ទៅលើវិញ្ញាសា «ទម្រង់របាំក្បាច់បុរាណខ្មែរ» ទទួលបានការគាំទ្រដោយក្រសួង​វប្បធម៌ និងវិចិត្រសិល្បៈនិងសហការផ្សព្វផ្សាយដោយ​ស្ថានីយទូរទស្សន៍ BTV។

អ្វីដែលរឹតតែពិសេសជាងនេះ ដើម្បីឱ្យការវាយតម្លៃសមត្ថភាពរបស់បេក្ខជន ដែលចូលរួមប្រកួត​ប្រជែង​ប្រព្រឹត្តទៅដោយមានភាពសុក្រឹត ​និងយុត្តធម៌ ​កម្មវិធីល្ខោនខ្មែរបានអញ្ជើញនូវគណៈកម្មការ​​ ៤ រូប ដែលសុទ្ធសឹងតែជាវីរសិល្បករ សិល្បការិនីរបាំបុរាណ និងជាព្រឹទ្ធាចារ្យដែលមានបទ​ពិសោធន៍​យ៉ាងចាស់វស្សាលើវិស័យសិល្បៈ និងវប្បធម៌ រួមមាន៖

១). ឯកឧត្តមសាស្ត្រាចារ្យ ព្រឿង ឈៀង៖ ជាទីប្រឹក្សាក្រសួងវប្បធម៌ និងវិចិត្រសិល្បៈ និងជាសាស្ត្រា ចារ្យ បង្រៀននៅសាកលវិទ្យាល័យភូមិន្ទវិចិត្រសិល្បៈ។ លោកគ្រូមានឯកទេសតួស្វា។

(២). លោកស្រីព្រឹទ្ធាចារ្យ ប៉ែន សុខហួន៖ មានឯកទេសនាយរោង។ ព្រឹទ្ធាចារ្យរាជបណ្ឌិតសភា ប៉ែន សុខហួន កំពុងបង្រៀននៅសាលាមធ្យមវិចិត្រសិល្បៈ។

៣). លោកជំទាវសាស្រ្តាចារ្យ សុទ្ធ សុម៉ាលី៖ ជាអនុរដ្ឋលេខាធិការនៃក្រសួងវប្បធម៌ និង​វិចិត្រសិល្បៈ។ មានស្របពេលដែលឯកទេសរបស់លោកជាតួយក្ស អ្នកគ្រូក៏អាចរាំតួនាង និងតួនាយរោងផងដែរ។

(៤). លោកស្រីសាស្រ្តាចារ្យ សំ សត្យា៖ មានឯកទេសតួនាង។ បច្ចុប្បន្ន លោកស្រីជាព្រឹទ្ធបុរសរង​នៅ​មហាវិទ្យាល័យនាដសាស្ត្រ នៃសាកលវិទ្យាល័យភូមិន្ទវិចិត្រសិល្បៈ។

វត្តមានរបស់លោកទាំង៤ នឹងធ្វើឱ្យកម្មវិធីមានភាពរំជើបរំជួល ព្រមទាំងមានភាពកក់ក្តៅ ​ជាពិសេស​បេក្ខជន បេក្ខនារីនឹងបានឆ្លងកាត់ការបង្វឹក ​និងការណែនាំដ៏យកចិត្តទុកដាក់របស់លោកផងដែរ។ សូមបញ្ជាក់ផងដែរថា ​សម្រាប់បេក្ខជនទូទាំង ២៥ រាជធានី-ខេត្ត ដែលមានចំណាប់អារម្មណ៍​ចូលប្រកួត លក្ខន្តិកៈងាយស្រួលណាស់ ​ដោយគ្រាន់តែបំពេញពាក្យចូលរួមប្រកួត ភ្ជាប់ជាមួយ​ថវិកាត្រឹមតែ ១០.០០០រៀល និងវីដេអូសម្ដែងទម្រង់របាំក្បាច់បុរាណខ្មែរណាមួយ ​យ៉ាងតិច ៥ នាទី រួចផ្ញើមកកាន់ទំព័រហ្វេសប៊ុករបស់សហភាពសហព័ន្ធយុវជនកម្ពុជា ខេត្តស្វាយរៀង ឬតេលេក្រាមលេខ 099 914 121 ដែលមានឈ្មោះថា «ល្ខោនខ្មែរ UYFC SVR»។ ការទទួលពាក្យចូលរួមប្រកួត និងវីដេអូ ​ចាប់ពីថ្ងៃទី២៥ ខែកក្កដា តទៅ ​រហូតដល់ថ្ងៃទី០៨ ខែកញ្ញា ឆ្នាំ២០២២។

ជ័យលាភីលេខ១ នៅវគ្គផ្ដាច់ព្រ័ត្រនៃកម្មវិធី នឹងទទួលបានរង្វាន់លើកទឹកចិត្តជាទឹកប្រាក់ ១២ លានរៀល។ ជ័យលាភីលេខ២ ទទួលបានទឹកប្រាក់ ៨ លានរៀល ​និងជ័យលាភីលេខ៣ ទទួលបានទឹកប្រាក់ ៤ លានរៀល៕​