​រុស្ស៊ី៖ កម្លាំង​រុស្ស៊ី​កំពុងដណ្តើម​យក​ទឹកដី​បន្តិច​ម្តងៗ​នៅ​តំបន់ Donbas ភាគ​ខាងកើត​។ កងទ័ព​រុស្ស៊ី​បាន​កាន់កាប់​ភាគ​ខាងជើង​ទន្លេ Donets មាន​ចម្ងាយ​ពីរ​ទៅ​បី​រយ​ម៉ែត្រ​ពី​លេណដ្ឋាន​អ៊ុយ​ក្រែ​ន​នៅ​ភាគខាងត្បូង​។

ទីតាំង​សំខាន់ៗ​នៃ​ក្រុង Soledar និង Bakhmut នៅ​តំបន់ Donbas កំពុង​ត្រូវបាន​បាញ់​ផ្លោង​យ៉ាង​ខ្លាំង ហើយ​ប្រជាជន​រស់​នៅ​ក្នុង​ភាពភ័យខ្លាច​ដោយសារ​កា​រ​ទម្លាក់​គ្រាប់បែក​ជា​បន្តបន្ទាប់​។ នៅក្នុង​ក្រុង Soledar ប្រជាជន​អាច​ចាក​ចេញ​ពី​ប្លុក​លំនៅឋាន​របស់​ពួកគេ​សម្រាប់​ការសង្គ្រោះ​បន្ទាន់​ប៉ុណ្ណោះ​។ គ្មាន​ថាមពល ឬ​ទឹក​ប្រើប្រាស់​នោះ​ទេ​នៅ​ក្នុង​ក្រុង Soledar ហើយ​ពលរដ្ឋ​មានការ​ភ័យខ្លាច​ដោយ​បោះជំរំ​នៅ​ក្បែរ​ទីជម្រក​គេច​ពី​គ្រាប់​ផ្លោង​។​ ​ស្ត្រី​ម្នាក់​និយាយថា គាត់​លែង​ចង់​រស់នៅ​ទៀតហើយ ខណៈ​រស់នៅក្នុង​សុបិន​អាក្រក់​មិនចេះចប់​។ គាត់​បាន​និយាយថា​ តើ​ខ្ញុំ​អាច​ប្រាប់​អ្នក​អំពី​អ្វី​បាន​? តើ​យើង​អាច​រស់នៅ​ទីនេះ​ដោយ​របៀប​ណា នៅ​ពេល​ដែល​ពួកគេ​កំពុង​បាញ់​ផ្លោង​នៅ​លើ​ក្បាល​របស់​យើង​? អ្នកវិភាគ​យោធា​ជឿ​ថា កងកម្លាំង​រុស្ស៊ី​កំពុង​ផ្តោត​លើ​កិច្ចខិតខំ​របស់​ពួកគេ​ ក្នុងការ​ដណ្តើម​យក​ទីក្រុង Bakhmut និង Siversk ក្នុង​ខេត្ត Donetsk។

ទីក្រុង Bakhmut កំពុង​ត្រូវ​បាន​បំផ្លាញ​ដោយ​គ្រាប់​ផ្លោង ហើយ​គ្រាប់​រ៉ុក្កែត​កំពុង​ធ្លាក់​នៅ​ទីនោះ​ជា​រៀងរាល់ថ្ងៃ​។ បុរស​ម្នាក់​និយាយថា​ ខ្ញុំ​ចង់​ឱ្យ​អ៊ុយ​ក្រែ​ន​ទទួល​ជ័យជំនះ ប៉ុន្តែ​លើស​ពី​នេះ​ទៅ​ទៀត​ខ្ញុំ​ចង់បាន​សន្តិភាព និង​ស្ថិរភាព ទោះ​បីជា​វា​មាន​ន័យ​ថា​ការ​យល់​ព្រម​ប្រគល់​ទឹកដី និង​រស់នៅ​ក្រោម​ការ​កាន់​កាប់​របស់​រុស្ស៊ី​ក៏ដោយ​។​ ប្រជាជន​នៅ​ទីក្រុង Bakhmut ដឹង​រួចហើយ​នូវ​អ្វី​ដែល​រុស្ស៊ី​នឹង​ធ្វើដើម្បី​សម្រេច​បាន​គោលដៅ​របស់​ខ្លួន ដោយ​គោលដៅ​ជន​ស៊ីវិល​តែងតែ​រង​ការវាយប្រហារ៕

អត្ថបទ៖ ប៊ុនថន