បាត់ដំបង៖ បន្ទាប់ពីមានការផ្សព្វផ្សាយ និងជូនដំណឹងរបស់រដ្ឋបាលក្រុងបាត់ដំបង បងប្អូន​ប្រជាពលរដ្ឋ​មួយចំនួនបានចូលរួមរុះរើសំយាប និងផ្ទាំងប៉ាណូគ្រប់ប្រភេទចេញជាបណ្ដើរៗហើយ ប៉ុន្តែមួយចំនួនធំទៀត ពុំទាន់បានរុះរើនៅឡើយទេ។

រដ្ឋបាលក្រុងបាត់ដំបង បានជូនដំណឹងដល់ម្ចាស់លំនៅឋាន អាជីវកម្មដ្ឋាន ស្ថិតក្នុង​សង្កាត់ស្វាយប៉ោ ក្រុងបាត់ដំបង ត្រូវរុះរើសំយាប ផ្ទាំងប៉ាណូពាណិជ្ជកម្មគ្រប់ប្រភេទចេញ​ឱ្យអស់​នៅ​ត្រឹមថ្ងៃទី១ ខែ សីហា ឆ្នាំ២០២២ នេះ ជាកំហិត។

សេចក្តីជូនដំណឹងរបស់រដ្ឋបាលក្រុងបាត់ដំបង កាលពីថ្ងៃទី២៥ ខែកក្កដា នេះ បានឱ្យដឹងថា ដើម្បីលើកកម្ពស់សណ្ដាប់ធ្នាប់ សោភ័ណភាពទីក្រុងឱ្យកាន់តែប្រសើរ រដ្ឋបាលក្រុងបានជូន​ដំណឹង​ដល់ម្ចាស់លំនៅឋាន អាជីវកម្មដ្ឋាន ​ស្ថិតនៅបណ្តោយផ្លូវលេខ១កន្លះ ផ្លូវលេខ២ ផ្លូវលេខ២កន្លះ ផ្លូវលេខ៣ ​និងគ្រប់ផ្លូវកាត់ទទឹងពីផ្លូវលេខ១​ ដល់ផ្លូវលេខ៣ ​នៅតំបន់អភិរក្ស (ចាប់ពីវត្តពិភិទ្ធារាម ដល់វត្តដំរីស និង ចាប់ពីផ្លូវលេខ១ ដល់ផ្លូវលេខ៣) ​នៅសង្កាត់ស្វាយប៉ោ ​ក្រុងបាត់ដំបង ត្រូវធ្វើការ​រុះរើសំយាប ផ្ទាំងប៉ាណូ ​ពាណិជ្ជកម្មគ្រប់ប្រភេទចេញឱ្យអស់ និងកែសម្រួលតាមគំរូ និង​គោល​ការណ៍​ណែនាំ​របស់រដ្ឋបាលខេត្តបាត់ដំបង ចាប់ពីថ្ងៃជូនដំណឹង រហូតដល់ថ្ងៃទី១ ខែសីហា ឆ្នាំ២០២២ ជាកំហិត។

រដ្ឋបាលក្រុង បានបញ្ជាក់ថា ក្នុងករណីម្ចាស់លំនៅឋាន អាជីវកម្មដ្ឋានទាំងអស់ មិនអនុវត្តតាម សេចក្តីជូនដំណឹងនេះ រដ្ឋបាលក្រុង នឹងធ្វើការរុះរើយកមករក្សាទុកដើម្បីដោះស្រាយតាមផ្លូវច្បាប់​ជាធរមាន ហើយរាល់ការខូចខាត និងបាត់បង់ រដ្ឋបាលក្រុងមិនទទួលខុសត្រូវឡើយ។

រដ្ឋបាលក្រុងបាត់ដំបង សង្ឃឹម និងជឿជាក់ថា ម្ចាស់លំនៅឋាន អាជីវកម្មដ្ឋាន ​នឹងអនុវត្តតាម​សេចក្តី​ជូនដំណឹងនេះ​ដោយស្មារតីសហការខ្ពស់​ ដើម្បីលើកកម្ពស់សោភណភាព និងបរិស្ថានទីក្រុង៕អត្ថបទ៖ នឿត សុភក្ត្រ