​បាល់ទាត់៖ ក្រុម​ជើងឯក​ពិភពលោក​ ៤សម័យ​អាល្លឺម៉ង់​បាន​រង​បរាជ័យ​មិន​គួរ​ឲ្យ​ក្នុង​ទឹកដី​ខ្លួនឯង ក្រោម​ថ្វី​ជើង​ក្រុម​ភ្ញៀវម៉ា​សេ​ដ្វា​ន​ខាងជើង​ ក្នុងការ​ប្រកួត​វគ្គ​ជំ​រុះ World Cup ២០២២ តំបន់​អឺរ៉ុប​។ ​​Goran Pendev​ បើក​ការនាំ​មុខមុន​ឲ្យ​ក្រុម​ភ្ញៀវ​ម៉ា​សេ​ដ្វា​ន​ខាងជើង មុនពេល​ដែល Ilkay Gundogan ​តាម​ស្មើ វិញ​ដោយ​បាល់​ពិន័យ ១១ម៉ែត្រ​នៅ​វគ្គ​ទី២​។

​​តែ​ម៉ា​សេ​ដ្វា​ន​ដែលមាន​ចំណាត់ថ្នាក់​ពិភពលោក​លេខ ៦៥ នោះ​ក៏​រកបាន​គ្រាប់​ជ័យជំនះ​មិនគួរ​ឲ្យ​ជឿ​នៅ​នាទី​ទី៨៥ ដោយ​ខ្សែបំរើ Napoli, Eljif Elmas​។ ​​នេះ​ជា​បរាជ័យ​ដំបូង​សំរាប់​ក្រុម​អាល្លឺម៉ង់​ក្នុង​វគ្គ​ជំ​រុះ World Cup ៣៥ប្រកួត​ជាប់​គ្នា ​បន្ទាប់ពី​បរាជ័យ​ក្នុង​វគ្គ​ជំ​រុះ​ចុងក្រោយ​បំផុត​តាំងពី​ឆ្នាំ២០០១ នៅពេល​ចាញ់​អង់គ្លេស ៥-១​។​ ​​អាល្លឺម៉ង់​នៅពេលនេះ​កំពុង​ឈរ​លេខ​៣ ក្នុង​ពូ​ល​ J មាន ៦ពិន្ទុ​ក្រោយ​លេង​បាន ៣ប្រកួត​ឈ្នះ២ ចាញ់១ ខណៈ​អា​ម៉េ​នី​ឈរ​លើ​គេ​មាន ៩ពិន្ទុ​ក្រោយ​ឈ្នះ​រ៉ូ​ម៉ា​នី ៣-២ យប់មិញ​។ ​​រីឯ​ក្រុម​អង់គ្លេស​រកបាន​ជ័យជំនះ ៣ ប្រកួត​ជាប់​គ្នា​ក្នុង​ពូ​ល​ក្រោយ​យកឈ្នះ​ប៉ូឡូញ ២-១​។ ​​Harry Kane ស៊ុត​បាល់​ពិន័យ ១១ម៉ែត្រ​នាំមុខ​មុន​នៅ​នាទី​ទី១៩ មុន​ពេលដែល​ប៉ូឡូញ​តាម​ស្មើ​វិញ​នៅ​វគ្គ​ទី​ពីរ​នាទី​ទី៥៨ ដោយ Jakub Molder​។

​​ក្រុម​របស់លោក Gareth Southgate ត្រូវ​រង់ចាំ​ដល់​នាទី​ទី៨៥ ដោយ​ការ​ស៊ុត​បញ្ចូល​ទី​របស់​ខ្សែការពារ Manchester United, Harry Maguire​។ ​​ជ័យជំនះ​នេះ​ធ្វើអោយ​អង់គ្លេស​លេង ៣​ប្រកួត​ឈ្នះ​ទាំងបី​មាន ៩ពិន្ទុ​ឈរលើ​គេ​ក្នុង​ពូ​ល I តាម​ពីក្រោយ​ដោយ​ហុង​គ្រី​មាន ៧ពិន្ទុ​។​

​​ងាក​មក​ក្រុម​ជើងឯក​ពិភពលោក​ឆ្នាំ២០១០ គោ​ជល់​អេ​ស្ប៉ា​ញ​រកបាន ៣ពិន្ទុ​ក្រោយ​ឈ្នះ​ក្រុម​ភ្ញៀវ​កូ​សូ​វ៉ូ ៣-១​។ ​​Dani Olmo ​បើក​ការ​នាំមុខ​នៅ​នាទី​ទី៣៤ មុន​ពេលដែល​ខ្សែប្រយុទ្ធ Manchester City, Ferran Torres បន្ថែម​មួយគ្រា​ប់​ទៀត​មុន​ចប់​វគ្គ​ទី១​។ កូ​សូ​វ៉ូ​ក៏​តប​បាន​មួយ​គ្រាប់​ដោយ Besar Halimi ​តែ Gerard Moreno តែ​ត​បញ្ចូល​ទី​គ្រាប់​ចុងក្រោយ​ឲ្យ​អេ​ស្ប៉ា​ញ​យកឈ្នះ​កូ​សូ​វ៉ូ ៣-១ បន្ត​ឈរលើ​គេ​ក្នុង​ពូ​ល B មាន ៧ពិន្ទុ តាម​ពីក្រោយ​ដោយ​ស៊ុយអែត​មាន ៦ពិន្ទុ និង​ក្រិ​កមាន ២ពិន្ទុ​។

​​ចំណែកឯ​ក្រុម​ជើងឯក​ពិភពលោក ២០១៨ បារាំង​ក៏​មិន​ភ្លាត់​ ៣ពិន្ទុ​ដែរ​ក្រោយ​ឈ្នះ​នៅ​ទឹកដី​បូ​ស្នៀ ១-០ ដោយ​គ្រាប់​បាល់​ជ័យជំនះ​ ១គ្រា​ប់គ​ត់របស់ Antoine Griezmann​។ ​​បី​ពិន្ទុ​នេះ​ធ្វើឲ្យ​ក្រុម​របស់លោក Didier Deschamps ​បន្ត​នាំមុខគេ​ក្នុង​ពូ​ល​មាន ៧ពិន្ទុ​ក្រោយ​លេង​បាន ៣ប្រកួត​ ខណៈ​ក្រុម​លេខ២ អ៊ុយ​ក្រែ​ន​មាន​ត្រឹម ៣ពិន្ទុ​ក្រោយ​ស្មើ​កា​ហ្សា​ក់​ស្ថាន​ក្នុង​ដី​ខ្លន​ឯង ១-១ យប់មិញ​។ ​​លទ្ធផល​ផ្សេងទៀត​មាន​ក្រុម​ជើងឯក​ពិភពលោក ២០០៦ អ៊ីតាលី​បន្ត​ឈ្នះ ៣ប្រកួត​ជាប់​គ្នា​ក្រោយ​យកឈ្នះ​នៅ​ទឹកដី​លី​ទុយ​អា​នី ២-០ បន្ត​នាំមុខគេ​ក្នុង​ពូ​ល C មាន ៩ពិន្ទុ​៕

​អត្ថបទ​៖​នាង សុភា​វុ​ធ