ភ្នំពេញ៖​ នៅថ្ងៃទី៣១​ ខែកក្កដានេះ​ កម្ពុជា​បន្តដឹកនាំជួបពិភាក្សាគ្នាជាមួយបណ្តាមន្រ្តីជាន់ខ្ពស់ការបរទេសអាស៊ានពីរបៀបវរ:សម្រាប់កិច្ចប្រជុំរដ្ឋមន្រ្តីការបរទេសអាស៊ានលេីកទី៥៥​ និងកិច្ចប្រជុំពាក់ព័ន្ធ។

ក្នុងនាមកម្ពុជាជាប្រធានអាស៊ាន និងមុនឈានទៅរកពិធីកិច្ចប្រជុំរដ្ឋមន្រ្តីការបរទេសអាស៊ានលើកទី៥៥ និងកិច្ចប្រជុំពាក់ព័ន្ធក្នុងក្របខ័ណ្ឌអាស៊ា​ន រយ:ពេល៨ថ្ងៃ ពីថ្ងៃទី២៩ ខែកក្កដា ដល់ថ្ងៃទី០៥ ខែសីហា ឆ្នាំ២០២២​ នៅថ្ងៃទី៣១​ ខែកក្កដា​នេះ​ មន្រ្តីជាន់ខ្ពស់ការបរទេសកម្ពុជា​ បានដឹកនាំកិច្ចប្រជុំចំនួនពីររួមមាន​ កិច្ចប្រជុំគណ:កម្មការនៃកិច្ចប្រជុំឧត្តមមន្រ្តីការបរទេសអាស៊ាន​ (SOM) និងកិច្ចប្រជុំរបស់គណ:កម្មការអចិន្រ្តៃយ៍តំណាងអាស៊ាន​ (CPR)​។ 

គិតមកទល់ពេលនេះឧត្តមមន្រ្តីអាស៊ានថ្នាក់រដ្ឋលេខាធិការ​ និងអគ្គនាយករបស់បណ្តាក្រសួងការបរទេសអាស៊ាន​បានមកដល់កម្ពុជាហេីយ ខណ:នៅថ្ងៃទី០១​ សីហា​ស្អែកនេះ​ បណ្តារដ្ឋមន្រ្តីការបរទេសអាស៊ាននឹងអញ្ជេីញដល់កម្ពុជាជាបន្តបន្ទាប់។ 

ដោយឡែកកិច្ចប្រជុំរដ្ឋមន្រ្តីការបរទេសអាស៊ានបក​ និងដៃគូ​ ក៏មានបណ្តារដ្ឋមន្រ្តីក្រសួងការបរទេសប្រទេសមហាអំណាយមួយចំនួននឹងចូលរួម​ ដូចជា​ ចិន អាមេរិក កូរ៉េ ជប៉ុន កាណាដា អង់គ្លេស រុស្ស៊ី ឥណ្ឌា អូស្រ្តាលី ញូហ្សឺឡែន និងសហគមន៍អឺរ៉ុប។ 

កិច្ចប្រជុំរដ្ឋមន្រ្តីការបរទេសអាស៊ានលើកទី៥៥ និងកិច្ចប្រជុំពាក់ព័ន្ធនាពេលនេះ រួមមានកិច្ចប្រជុំគណៈកម្មការតំបន់អាស៊ីអាគ្នេយ៍គ្មានអាវុធនុយក្លេអ៊ែរ,​ ជំនួបរវាងរដ្ឋមន្រ្តីការបរទេសអាស៊ានជាមួយតំណាងគណៈកម្មការអន្តររដ្ឋាភិបាលអាស៊ានស្តីពីសិទ្ធិមនុស្ស,​ រដ្ឋមន្រ្តីការបរទេសអាស៊ានលើកទី៥៥,​ សន្និសីទក្រោយកិច្ចប្រជុំរដ្ឋមន្រ្តីការបរទេសអាស៊ាន ជាមួយដៃគូសន្ទនារបស់អាស៊ាន,​ កិច្ចប្រជុំរដ្ឋមន្រ្តីការបរទេសអាស៊ានបូកបី លើកទី២៣,​ កិច្ចប្រជុំរដ្ឋមន្រ្តីការបរទេសនៃកិច្ចប្រជុំកំពូលអាស៊ី-បូព៌ា លើកទី១២,​ កិច្ចប្រជុំវេទិកាតំបន់អាស៊ានលើកទី២៩។ 

ស្របពេលជាមួយកិច្ចប្រជុំរដ្ឋមន្រ្តីការបរទេសអាស៊ានលើកទី៥៥ រដ្ឋមន្រ្តីការបរទេស និងអគ្គលេខាធិការអាស៊ាន នឹងអញ្ជើញធ្វើជាសាក្សីការចុះហត្ថលេខាលើលិខិតុបករណ៍ការចូលជាសមាជិកនៃសន្ធិសញ្ញាមិត្តភាព និងកិច្ចសហប្រតិបត្តិការនៅក្នុងតំបន់អាស៊ីអាគ្នេយ៍ (TAC) ដោយព្រះរាជាណាចក្រដាណឺម៉ាក, សាធារណរដ្ឋក្រិក, ព្រះរាជាណាចក្រហូឡង់, ប្រទេសអូម៉ង់, រដ្ឋកាតា និងអារ៉ាប់រួមអេមីរ៉ាត់​ ខណ:រដ្ឋមន្រ្តីការបរទេស និងអគ្គលេខាធិការអាស៊ាន ក៏នឹងអញ្ជើញចូលរួមក្នុងកម្មវិធីប្រគល់ពានរង្វាន់អាស៊ានឆ្នាំ២០២១ផងដែរ។

ក្នុងឱកាសនៃកិច្ចប្រជុំរដ្ឋមន្រ្តីការបរទេសអាស៊ានលើកទី៥៥ នឹងមានកិច្ចប្រជុំត្រីភាគីចំនួនបីដាច់ដោយឡែកពីគ្នា រវាងកម្ពុជា និងលេខាធិការដ្ឋានអាស៊ាន ជាមួយនឹងប្រទេសដៃគូសន្ទនារបស់អាស៊ានចំនួនបី រួមមាន ប្រទេសន័រវេស ប្រទេសតួកគី និងប្រទេសស្វីស។

​ក្រៅពីប្រទេសដៃគូសន្ទនាតាមវិស័យរបស់អាស៊ាន និងប្រទេសទាំងប្រាំមួយ ដែលចូលជាសមាជិកនៃសន្ធិសញ្ញាមិត្តភាព និងកិច្ចសហប្រតិបត្តិការនៅក្នុងតំបន់អាស៊ីអាគ្នេយ៍ (TAC) ខាងលើ ប្រទេសចំនួនបួនផ្សេងទៀត នឹងត្រូវបានអញ្ជើញជាភ្ញៀវនៃប្រធានអាស៊ានឆ្នាំ២០២២ រួមមានប្រទេសប៉ាពួញូវហ្គីណេ ម៉ារ៉ុក ទីម័រខាងកើត និងអាស៊ែបៃហ្សង់។