​​មី​យ៉ាន់​ម៉ា៖ សារព័ត៌មាន​រដ្ឋ​បាន​និយាយ​នៅ​ថ្ងៃ​ចន្ទ​នេះ​ថា ប្រមុខ​យោធា​សហភាព​មី​យ៉ាន់​ម៉ា​លោក Min Aung Hlaing នឹង​បន្ថែម​ពេលវេលា​ដាក់​ប្រទេស​ក្នុង​គ្រាអាសន្ននៅ​ក្នុង​ប្រទេស​នេះ​រយៈពេល ​៦​ខែ​ទៀត ដែល​មាន​សេចក្ដីរាយការណ៍​ថា ក្រសួងការពារជាតិ និង​ក្រុមប្រឹក្សាសន្តិសុខ​របស់​របប​សឹក​នេះ​បាន​អនុម័ត​រួចហើយ​។​

​របប​សឹក​នេះ​បាន​ប្រកាស​ដាក់​ប្រទេស​ក្នុង​គ្រាអាសន្ន​លើកដំបូង ក្រោយ​ដណ្ដើម​អំណាច​ពី​រដ្ឋាភិបាល​ជាប់ឆ្នោត​របស់​លោក​ស្រី Aung San Suu Kyi ក្នុង​រដ្ឋប្រហារ​កាលពី​ថ្ងៃ​ទី​១ ​ខែ​កុម្ភៈ ​ឆ្នាំ​២០២១ កន្លងទៅ​។ ​សារព័ត៌មាន Global New Light of Myanmar បាន​រាយការណ៍​ថា បណ្ដា​សមាជិក​ក្រុមប្រឹក្សាសន្តិសុខ​នេះ​បាន​គាំទ្រ​ជា​ឯកច្ឆន្ទ ​លើ​សំណើ​បន្ថែម​ពេលវេលា​ប្រកាស​ដាក់​ប្រទេស​ក្នុង​គ្រាអាសន្ន​រយៈពេល​ ៦​ខែ​ទៀត។

​សារព័ត៌មាន​នេះ​បាន​ចុះផ្សាយ​ដោយ​សំអាង​ដល់​ប្រភព​ពី​លោក Min Aung Hlaing ដែល​និយាយ​ថា នៅ​ក្នុង​ប្រទេស​របស់​យើង យើង​ត្រូវតែ​បន្ត​ពង្រឹង​ប្រព័ន្ធ​ប្រជាធិបតេយ្យ​ពហុបក្ស​ពិតប្រាកដ និង​មាន​វិន័យ​ច្បាស់លាស់ដែល​ជា​បំណង​ប្រាថ្នា​របស់​ប្រជាពលរដ្ឋ​។ សហភាព​មី​យ៉ាន់​ម៉ា​បាន​ធ្លាក់​ក្នុង​ភាព​ចលាចល​ចាប់​តាំង​ពី​រដ្ឋប្រហារ ដែល​ធ្វើ​ឲ្យ​ជម្លោះ​រីក​រាលដាល​ពាសពេញ​ប្រទេស​នៅ​តំបន់​អាស៊ី​អាគ្នេយ៍​មួយ​នេះ បន្ទាប់ពី​យោធា​បាន​បង្ក្រាប​ការ​តវ៉ា​ភាគច្រើនជា​ការ​តវ៉ា​ដោយ​ស្ងៀមស្ងាត់​នៅ​ក្នុង​ទីក្រុង​នានា​៕

អត្ថបទ៖ សុខមាន