ភ្នំពេញ៖ ករណីឆ្លងកូវីដ-១៩ បន្តកើនឡើងជាប្រចាំថ្ងៃ ចាប់ពីជាង ១០ ករណីក្នុងមួយថ្ងៃ រហូតដល់ជាង ៤០ករណី។ ការរកឃើញករណីឆ្លងថ្មីកើនឡើងជាប្រចាំថ្ងៃនេះ គឺភាគច្រើនបំផុតជាការឆ្លងក្នុងសហគមន៍។

ក្រសួងសុខាភិបាលបានព្រមានដែរថា ករណីឆ្លងគឺនឹងលើសចំនួននេះទៅទៀត បើប្រជាពលរដ្ឋនៅតែព្រងើយកន្តើយ ធ្វេសប្រហែសក្នុងការការពារ។

រយៈពេល ៣ថ្ងៃ ជាប់គ្នា ពីថ្ងៃទី ២៨ កក្កដារហូតដល់ថ្ងៃទី ៣០ ករណីឆ្លងកូវីដ-១៩ គឺមានការហក់ឡើងគួរឱ្យកត់សម្គាល់។ ករណីឆ្លងគឺបានកើនឡើងដល់ ១០៩ ករណីត្រឹមរយៈពេល ៣ថ្ងៃ ប៉ុណ្ណោះ ហើយការឆ្លងនេះ ជាស្ដែងគឺមានការនាំចូលតែ ១ ករណីប៉ុណ្ណោះ ក្រៅពីនេះជា​ករណី​ឆ្លងក្នុងសហគមន៍ ដែលរកឃើញលើប្រជាពលរដ្ឋដែលស្នើសុំវិញ្ញាបនបត្រ​ចេញទៅក្រៅប្រទេស។ នេះជាការបញ្ជាក់ក្នុងសេចក្ដីជូនព័ត៌មានប្រចាំថ្ងៃ របស់ក្រសួងសុខាភិបាល។

លោកជំទាវ ឱ វណ្ណឌីន អ្នកនាំពាក្យក្រសួងសុខាភិបាល ​បានព្រមានថែមថា ករណីឆ្លងគឺអាស្រ័យ​លើការចូលរួមអនុវត្តវិធានការការពារ “៣ការពារ និង ៣កុំ “ របស់ប្រជាពលរដ្ឋផ្ទាល់។ ប្រសិនបើការព្រងើយកន្តើយនិងមើលរំលងលើលទ្ធភាពឆ្លងលឿនរបស់វីរុសនេះបន្តមានច្រើន នោះការកើនឡើងនូវករណីឆ្លងក៏នឹងអាចកើតមានដែរ។

លោកជំទាវ អំពាវនាវ បងប្អូនចូលរួមបន្តអនុវត្ត ៣ការពារ និង៣កុំ ហើយទៅទទួលយក​វ៉ាក់សាំង​កូវីដ-១៩ ដូសជំរុញឱ្យបានទាន់ពេលដែលដល់វេនត្រូវចាក់។ ទន្ទឹមនឹងការរកឃើញករណីឆ្លងប្រចាំថ្ងៃកើនឡើងបែបនេះ ប្រជាពលរដ្ឋសង្កេតឃើញថា មាន​មនុស្សជាច្រើនចាប់ផ្ដើមធ្វេសប្រហែសច្រើនជាងមុន​ ដោយការធ្វេសប្រហែស គឺមិន​ពាក់ម៉ាស​ការពារ នៅទីសាធារណៈ ។

ចំនួនករណីឆ្លងរកឃើញជាបន្តបន្ទាប់នេះ គឺជាករណីដែលបញ្ជាក់លទ្ធផលពី PCR ពុំបានរាប់​បញ្ចូល​ការ​រកឃើញវិជ្ជមានតាមរយៈលទ្ធផល​ដែលចេញដោយ ​ឧបករណ៍​តេស្តរហ័សនោះទេ។

កម្ពុជាបានចាក់វ៉ាក់សាំ​ងដូសទី ៣ ដល់ប្រជាពលរដ្ឋប្រមាណ ​៩.៧៤ លាននាក់​ ការចាក់ដូសទី ៤​សម្រេច​បានប្រហែល ៣.៥លាននាក់ និងកាចាក់ដូសទី ​៥សម្រេចបាន ៤៧៣.៨៤៥ នាក់ នៃចំនួនប្រជាពលរដ្ឋសរុប ១៦លាននាក់៕ អត្ថបទ៖ គឹមហុក