​អ៊ុយក្រែន៖ ប្រធានាធិបតី​អ៊ុយ​ក្រែ​ន​លោក Volodymyr Zelenskyy បាន​ចូលរួម​រំលែក​ទុក្ខ​ដល់​ក្រុម​គ្រួសារ និង​មិត្តភ័ក្ដិ​របស់​មហាសេដ្ឋី​ផ្នែក​កសិកម្ម​ម្នាក់លោក Oleksiy Vadatursky និង​ភរិយាដែល​បាន​ទទួល​មរណភាព ​ក្រោម​ការ​បាញ់​ផ្លោង​របស់​រុស្ស៊ី​ទៅលើ​ទីក្រុង Mykolaiv កាលពី​ថ្ងៃអាទិត្យ​។

មេដឹកនាំ​អ៊ុយ​ក្រែ​ន​បាន​និយាយ​ថា​ មនុស្ស​ដូចជា​ពួកគេ ក្រុមហ៊ុន និង​តំបន់​ភាគ​ខាងត្បូង​អ៊ុយ​ក្រែ​ន​របស់​យើង​ធានា​បាន​នូវ​សន្តិសុខ​ស្បៀង​របស់​ពិភពលោក​។ លោក Zelenskyy បាន​អរគុណ​ដល់​ពលរដ្ឋ​ទីក្រុង Mykolaiv សម្រាប់​ភាព​ស្មោះត្រង់ និង​សម្រាប់​ការ​ការពារ​ទីក្រុង និង​តំបន់ ហើយ​លោក​បាន​និយាយ​ថា ​ជា​យុទ្ធសាស្ត្រ​រុស្ស៊ី​គ្មាន​ឱកាស​ឈ្នះ​សង្គ្រាម​នេះ​ទេ​។​ ​នៅ​ក្នុង​សុន្ទរកថា​លោក Zelenskyy បាន​ស្នើ​ជន​ស៊ីវិល​ដែល​នៅ​សេសសល់​ក្នុង​តំបន់ Donbas ឱ្យ​ចាកចេញក្នុងពេល​មានការ​ប្រយុទ្ធ​គ្នា​កាន់តែខ្លាំង​។ មានការ​សម្រេចចិត្តរ​បស់​រដ្ឋាភិបាល​លើ​ការ​ជម្លៀស​​ជា​ចាំបាច់​ចេញពី​តំបន់ Donetsk ដែល​អ្វីៗ​គ្រប់យ៉ាង​កំពុង​ត្រូវ​បាន​រៀបចំ មានការ​គាំទ្រ​ពេញលេញ ការ​ផ្តល់​ជំនួយ ទាំង​ការ​ដឹក​ជញ្ជូន​ និង​ផ្តល់​ការ​ចំណាយ​។

យើង​ត្រូវការការសម្រេចចិត្ត​ពី​សំណាក់​ប្រជាជន​ខ្លួនឯង ​ដែល​មិនទាន់​បានសម្រេច​ក្នុងការ​ចាកចេញ យើង​នឹង​ជួយ​អ្នក​។​ ​កាលពី​ថ្ងៃអាទិត្យ អង្គភាព​សេវាកម្ម​សង្គ្រោះបន្ទាន់​រប​ស់អ៊ុយ​ក្រែ​ន ​បាន​ចែករំលែក​វីដេអូ​នៃ​ក្រុម​អ្នក​ពន្លត់អគ្គីភ័យ និង​ក្រុម​ជួយសង្គ្រោះ​ដែល​កំពុង​ប្រយុទ្ធ​នឹង​អគ្គិភ័យ ​បន្ទាប់ពី​ការវាយប្រហារ​ដោយ​គ្រាប់​រ៉ុក្កែត​របស់​រុស្ស៊ី​ទៅលើ​ទីក្រុង​កំពង់ផែ Mykolaiv​។ អភិបាលក្រុងលោក Vitaliy Kim បានបញ្ជាក់​កាលពី​ថ្ងៃអាទិត្យ​ថា ការបាញ់​ផ្លោង​បណ្តាល​ឲ្យ​សេដ្ឋី​មាន​បំផុត​ម្នាក់​របស់​អ៊ុយ​ក្រែ​ន​គឺលោក​Oleksiy Vadatursky និង​ភរិយា​របស់លោក​ស្លាប់​។ លោក Vadatursky ជា​អ្នកដឹកនាំ​ពាណិជ្ជកម្មផលិត​គ្រាប់​ធញ្ញជាតិ និង​នាំចេញ៕

អត្ថបទ៖ ប៊ុនថន