ភ្នំពេញ៖ ឯកឧត្តម ឧបនាយករដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ នៅព្រឹកថ្ងៃទី១ ខែសីហានេះ បានប្រកាសសមាសភាព គណៈកម្មការគ្រប់គ្រង និងអភិវឌ្ឍន៍​ទេសចរណ៍​សៀមរាប-អង្គរ អមជាមួយការប្រកាសផែនការសកម្មភាព ឆ្នាំ២០២២-២០២៣ ដើម្បីជំរុញទស្សនាកម្ពុជា ឆ្នាំ២០២៣។

ឯកឧត្តម អគ្គបណ្ឌិតសភាចារ្យ អូន ព័ន្ធមុនីរ័ត្ន ក្នុងនាមជាប្រធានគណៈកម្មការគ្រប់គ្រង និង អភិវឌ្ឍន៍ទេសចរណ៍សៀមរាប-អង្គរ បានថ្លែងថា យន្តការអនុវត្តចំណុះឱ្យគណៈកម្មការគ្រប់គ្រង និង អភិវឌ្ឍន៍ទេសចរណ៍សៀមរាប-អង្គរ គឺជាមូលដ្ឋានដ៏សំខាន់ ដើម្បីធានាប្រសិទ្ធភាពក្នុងការ​អនុវត្តផែនការមេអភិវឌ្ឍន៍ទេសចរណ៍ខេត្តសៀមរាប ឆ្នាំ២០២១-២០៣៥ ខណៈផែនការមេនេះ គឺជាផែនការអភិវឌ្ឍវិស័យទេសចរណ៍ដំបូងគេដែលត្រូវបានដាក់ឱ្យអនុវត្តដោយរាជរដ្ឋាភិបាល និងជាសញ្ញានៃការចាប់ផ្តើមការកសាងវិស័យទេសចរណ៍ឡើងវិញ ក្រោយវិបត្តិនៃជំងឺកូវីដ-១៩។

ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន បន្តថា ការអនុវត្តផែនមេអភិវឌ្ឍខេត្តសៀមរាប​ឆ្នាំ២០២១ ឆ្នាំ២០៣៥ ​បានធ្វើឡើងស្របពេល ​រាជរដ្ឋាភិបាល​បាន​ស្ថាបនាផ្លូវ ៣៨ ខ្សែនៅក្នុងខេត្តសៀមរាប បានសម្រួលដល់ការធ្វើដំណើររបស់ភ្ញៀវទេសចរជាតិ ​និងអន្តរជាតិ ព្រមទាំង​បង្កើន​ភាព​ទាក់ទាញ​របស់​ខេត្តសៀមរាប ដែល​ស័ក្ដិសម​ជា​គោលដៅ​ទេសចរណ៍​សំខាន់បំផុត​របស់កម្ពុជា ។

ឯកឧត្តម ថោង ខុន រដ្ឋមន្ត្រីក្រសួងទេសចរណ៍ ​មានប្រសាសន៍ថា នៅតាមតំបន់គោលដៅ​ទេសចរណ៍​នៅខេត្តសៀមរាបទាំង៦ តំបន់នោះ នឹងត្រូវរួមគ្នាជំរុញអភិវឌ្ឍន៍​ផលិតផល និងសេវាកម្ម​ទេសចរណ៍ថ្មីៗ ដើម្បីជំរុញការទាក់ទាញបន្ថែម ​ប្រកបដោយភាពច្នៃប្រឌិត គុណភាព សុវត្ថិភាព​តម្លៃសមរម្យ ​ជាពិសេសគឺការជំរុញរៀបចំកញ្ចប់ទស្សនកិច្ច ​តម្លៃសមរម្យមកទស្សនា​ខេត្តសៀមរាប​ជូនភ្ញៀវជាតិ និងភ្ញៀវអន្តរជាតិ ដើម្បីឆ្ពោះទៅកាន់ការ​ប្រារព្ធ​យុទ្ធនាការ​ ទស្សនាកម្ពុជា ឆ្នាំ២០២៣ ។

សូមបញ្ជាក់ថា ខេត្តសៀមរាប ក្នុងរយៈពេល៦ខែ ដើមឆ្នាំ២០២២នេះ ​បានទទួលភ្ញៀវទេសចរ​អន្តរជាតិ​ទៅទស្សនា ប្រមាណ ៦ម៉ឺននាក់ ​កើនឡើង១០២៥% និងបាន​ទទួលទេសចរ​ក្នុងស្រុក​ទៅទស្សនាមានជាង ​១លាននាក់ កើនប្រមាណ៧៩៨%ធៀបរយៈពេលដូចគ្នាឆ្នាំ២០២១៕ អត្ថបទ៖ ស៊ុម សុខជា