​អ៊ីតាលី៖ ជនអន្តោប្រវេសន៍​ជាង 1,000នាក់​បានមក​ដល់​កោះ Sicily ជា​ប្រជុំ​កោះ​នៅ​តំបន់ Lampedusa ប្រទេស​អ៊ីតាលី​។ បន្ទាប់ពី​ការពិនិត្យ​សុខភាព ជនអន្តោប្រវេសន៍​ត្រូវបាន​នាំទៅ​កាន់​ទីតាំង​ជនអន្តោប្រវេសន៍​របស់​កោះ​នេះ ដែលមាន​មនុស្ស​ចំនួន 2,000នាក់​បានមក​ដល់​កក​កុញ​រួចហើយ នៅក្នុង​ទីតាំង​ចំនួន 350​កន្លែង​។

​ស្ថានភាព​នៅលើ​កោះ​នេះ​នៅតែមាន​សភាព​លំបាក ​ទោះបីជា​អាជ្ញាធរ​បាន​ជម្លៀស​ជនអន្តោប្រវេសន៍​ជាច្រើន​រយ​នាក់​ទៅកាន់​ទីក្រុង Sicily ដីគោកដើម្បី​កាត់បន្ថយ​ភាព​ចង្អៀត​ណែន​ក៏ដោយ​។​ នាវា​ធុន​តូច និង​ធុន​ធំដែល​ដឹក​ជនអន្តោប្រវេសន៍​បាន​បន្ត​បើក​ចូល​ក្រុង Sicily ភាគច្រើន​ចេញពី​កំពង់ផែ​ប្រទេស​ទុយ​នី​ស៊ី និង​ប្រទេស​លី​ប៊ី​។ ​កាលពី​ចុង​សប្តាហ៍​កន្លងទៅនេះ ជនអន្តោប្រវេសន៍​ចំនួន 438នាក់​ផ្សេងទៀតរួមមាន​ទាំង​អនីតិជន​ដែល​គ្មាន​អ្នករួមដំណើរ​ចំនួន 117នាក់ និង​ស្ត្រី 35នាក់បាន​ចុះ​ពី​កំពង់ផែ Taranto ក្នុង​តំបន់ Puglia ភាគខាងត្បូង​ប្រទេស​អ៊ីតាលី បន្ទាប់ពី​ត្រូវបាន​ជួយសង្គ្រោះ​ក្នុង​ប្រតិបត្តិការ​ចំនួន​ 4 ដាច់​ដោយ​ឡែក​ពីគ្នា​ដោយ​នាវា​អង្គការក្រៅរដ្ឋាភិបាលរ​បស់​ប្រទេស​អាល្លឺម៉ង់ SeaWatch 3​៕

អត្ថបទ៖ ប៊ុនថន