​ទួរគី៖ មន្ត្រីជាន់ខ្ពស់​ប្រទេស​ទួរគី​បាន​និយាយថា ការនាំចេញ​គ្រាប់​ធញ្ញជាតិ​របស់​ប្រទេស​អ៊ុយ​ក្រែ​ន អាច​នឹង​ចាប់ផ្តើម​ឡើងវិញ​នៅ​ថ្ងៃ​ចន្ទ​នេះ​ពី​កំពង់ផែ​ភាគខាងត្បូង​។ អ្នកនាំពាក្យ​ប្រធានាធិបតី​ទួរគី​លោក Ibrahim Kalin បាន​ប្រាប់​ប្រព័ន្ធ​ផ្សព្វផ្សាយ​ក្នុងស្រុក​កាលពី​ថ្ងៃ​អាទិត្យ​ថា នាវា​ទី​មួយ​ដែល​ដឹក​គ្រាប់​ធញ្ញជាតិ​អ៊ុយ​ក្រែ​ន​អាច​នឹង​ចាកចេញ​នៅ​ថ្ងៃ​ចន្ទ​នេះ​។

លោក Kalin និយាយ​ថា ការ​ផ្ទុក​គ្រាប់​ធញ្ញជាតិ​នៅ​លើ​នាវា​ត្រូវ​បាន​រៀបចំ​រួចហើយ​។ ប្រទេស​ទួរគី និង​អង្គការ​សហប្រជាជាតិ​បាន​ចុះ​កិច្ចព្រមព្រៀង​រវាង​អ៊ុយ​ក្រែ​ន និង​រុស្ស៊ី​ដើម្បី​ចាប់ផ្តើម​នាំចេញ​ស្រូវ​សាលី​របស់​អ៊ុយ​ក្រែ​ន និង​គ្រាប់​ធញ្ញជាតិ​ផ្សេងទៀត​តាម​ច្រក​សមុទ្រ​ខ្មៅ​។​ រដ្ឋមន្ត្រីការបរទេស​សហរដ្ឋអាមេរិក​លោក Antony Blinken បាន​ជំ​រុញ​ឱ្យ​រដ្ឋមន្ត្រីការបរទេស​រុស្ស៊ី​លោក Sergey Lavrov អនុវត្ត​តាម​កិច្ចព្រមព្រៀង នៅ​ពេល​ដែល​រដ្ឋមន្ត្រី​ទាំង២ បាន​ជួប​សន្ទនា​គ្នា​តាម​ទូរស័ព្ទ​កាលពី​ថ្ងៃ​សុក្រ​សប្ដាហ៍​មុន​។ ​ប្រធានាធិបតី​អ៊ុយ​ក្រែ​ន​លោក Volodymyr Zelenskyy បាន​សរសេរ​នៅលើ​បណ្តាញ​សង្គម Twitter កាលពី​ថ្ងៃអាទិត្យ​ថា ការ​ប្រមូល​ផល​នៅ​អ៊ុយ​ក្រែ​ន​នា​ឆ្នាំនេះ​អាច​ធ្លាក់​ចុះ​ប្រហែល​ពាក់កណ្តាល​។

លោក​និយាយ​ថា គោលដៅ​ចម្បង​របស់​អ៊ុយ​ក្រែ​ន​គឺ​ទប់ស្កាត់​វិបត្តិ​ស្បៀងអាហារ​ពិភពលោក​ ដែល​បង្កឡើង​ដោយ​ការ​វាយ​លុក​របស់​រុស្ស៊ី​។ លោក Andriy Yermak ប្រធាន​ការិយាល័យ​ប្រធានាធិបតី​អ៊ុយ​ក្រែ​ន​បាន​សរសេរ​នៅ​លើ​បណ្តាញ​សង្គម​ថា សហគ្រិន​ម្នាក់​ដែល​គ្រប់គ្រង​ក្រុមហ៊ុន​នាំ​ចេញ​គ្រាប់​ធញ្ញជាតិ​ធំ​មួយ​របស់​ប្រទេស បាន​ស្លាប់​នៅ​ក្នុង​ការវាយប្រហារ​របស់​រុស្ស៊ី​លើ​ទីក្រុង Mykolaiv។ ខណៈ​រុស្ស៊ី​បន្ត​ការ​វាយ​លុក​ខ្លាំងក្លា​របស់​ខ្លួន ហើយ​កងទ័ព​អ៊ុយ​ក្រែ​ន​វាយបក​វិញ​នៅ​ភាគ​ខាង​ត្បូង អ្នក​វិភាគ​កំពុង​រង់​ចាំ​មើល​ថា ​តើ​ពេលណា​ការនាំចេញ​គ្រាប់​ធញ្ញជាតិ​របស់​អ៊ុយ​ក្រែ​ន​នឹង​បន្ត​ឡើង​វិញ​បាន៕​

អត្ថបទ៖ ប៊ុនថន